ព្រលានពោធិ៍ចិនតុងនឹងបិទទ្វាទាំងស្រុង នៅពេលព្រលានថ្មីបើកដំណើរការនៅខែកក្កដា, បច្ចុប្បន្នសង់ជាង៩៦%

• 14 ខែ​ឧសភា 2025
• Uncategorized
• 8 មើល

គិតត្រឹមពាក់កណ្តាលខែឧសភានេះ អាកាសយានដ្ឋានអន្តរជាតិតេជោក្រុងតាខ្មៅ សម្រេចការសាងសង់បានប្រមាណជាង ៩៦%  ហើយបានចំណាយទុនអស់ប្រមាណជា ១,៦ពាន់លានដុល្លារ។ ចំពោះការងារដែលនៅសេសសល់ក្រុមហ៊ុនសាងសង់កំពុងពន្លឿនបញ្ចប់ ដើម្បីអាចបើកដំណើរការជាផ្លូវការនៅថ្ងៃទី១០ ខែកក្កដាខាងមុខ។ ពេលវាលាដ៏សំខាន់នេះ នឹងត្រូវចារក្នុងប្រវត្តិសាស្រ្ត ព្រោះវាក៏ជាថ្ងៃបិទបញ្ចប់ប្រតិបត្តិការទាំងស្រុងនូវ​អាកាសយានដ្ឋានអន្តរជាតិភ្នំពេញ (ឬព្រលានពោធិ៍ចិនតុង) ក្នុងនោះក៏មានក្រុមហ៊ុនអាកាសចរណ៍ Korean Air បានក្លាយជាក្រុមហ៊ុនមានជើងហោះហើរចុងក្រោយបង្អស់នៅអាកាសយានដ្ឋានអន្តរជាតិភ្នំពេញនេះផងដែរ។

នេះបើតាមការបញ្ជាក់របស់ឯកឧត្តម ស៊ីន ចាន់សេរីវុត្ថា រដ្ឋលេខាធិការ និងអ្នកនាំពាក្យ នៃរដ្ឋលេខាដ្ឋានអាកាសចរណ៍ស៊ីវិល នៅថ្ងៃទី១៣ ខែឧសភា ឆ្នាំ២០២៥នេះ។

ឯកឧត្តមបានគូសបញ្ជាក់ថា ការងារដែលនៅសេសសល់ ភាគច្រើនពាក់ព័ន្ធនឹងការងាររៀបចំតុបតែង ការងារលម្អ និងដំឡើងផ្លាកសញ្ញា ជាដើម។

សម្រាប់ជំហានបន្ទាប់ ឯកឧត្តមបានឱ្យដឹងថា នឹងមានកិច្ចប្រជុំដើម្បីពិនិត្យវាយតម្លៃ និងសាវនកម្មលើកទី២ នៃការងារសាងសង់ ដែលគ្រោងធ្វើឡើងនៅចុងខែឧសភា ឬដើមខែមិថុនា ឆ្នាំ២០២៥ នេះ។

“ដូច្នេះបើគ្មានអ្វីប្រែប្រួលនោះទេ នៅថ្ងៃទី១០ ខែកក្កដា ឆ្នាំ២០២៥ គឺជាថ្ងៃគោលដៅដែលភាគីពាក់ព័ន្ធទាំងអស់បានគ្រោងទុក ក្នុងការដាក់ឱ្យប្រតិបត្តិការអាកាសយានដ្ឋានអន្តរជាតិតេជោ (TIA/ KTI) ជាផ្លូវការហើយ!”។

ជាមួយគ្នានេះដែរ ឯកឧត្តមរដ្ឋលេខាធិការក៏បានរំលឹកពីពេលវេលានៃការបិទបញ្ចប់ប្រតិបត្តិការអាកាសយានដ្ឋានអន្តរជាតិភ្នំពេញ(ឬព្រលានពោធិ៍ចិនតុង) ដែលនឹងត្រូវបិទដំណើរការទាំងស្រុងនៅម៉ោង០០:00 យប់រំលងអធ្រាត្រថ្ងៃទី៩ ឈានចូលថ្ងៃទី១០ ខែកក្កដា ២០២៥ ដោយសារប្រតិបត្តិការទាំងអស់ នឹងត្រូវរើទៅកាន់ព្រលានយន្តហោះអន្តរជាតិតេជោតាមផែនការដែលបានគ្រោងទុក។ ទន្ទឹមនឹងនេះ ជើងហោះហើររបស់ក្រុមហ៊ុនអាកាសចរណ៍ Korean Air បានក្លាយជាជើងហោះហើរចុងក្រោយបង្អស់ក្នុងប្រវត្តិសាស្ត្រនៅព្រលានយន្តហោះពោធិ៍ចិនតុង។

អាកាសយានដ្ឋានអន្តរជាតិតេជោនេះ ត្រូវបានអភិវឌ្ឍដោយក្រុមហ៊ុនវិនិយោគអាកាសយានដ្ឋានកម្ពុជា (CAIC) ដែលជាដៃគូរវាងរាជរដ្ឋាភិបាលកម្ពុជា និងក្រុមហ៊ុន OCIC មានផ្ទៃដីទំហំ ២.៦០០ហិកតា។ អាកាសយានដ្ឋានថ្មីនេះ នឹងក្លាយទៅជាមជ្ឈមណ្ឌលដ៏សំខាន់សម្រាប់វិស័យទេសចរណ៍ និងពាណិជ្ជកម្ម ដែលជំរុញកំណើនសេដ្ឋកិច្ច និងការតភ្ជាប់សម្រាប់កម្ពុជា។(អានបន្ថែម)

• infrastructure development