ADB ផ្តល់ប្រាក់កម្ចី ៤០លានដុល្លារ ជួយបង្កើនស្ថិរភាពហិរញ្ញវត្ថុនៅកម្ពុជា ពិសេសSME

• Me Wathana
• 18 ខែ​តុលា 2021
• ព័ត៌មានអចលនទ្រព្យ
• 264 មើល

ធនាគារអភិវឌ្ឍន៍អាស៊ី (ADB) បានសម្រេចផ្តល់ប្រាក់កម្ចីចំនួន ៤០លានដុល្លារ ដើម្បីជួយបង្កើនស្ថិរភាពវិស័យហិរញ្ញវត្ថុកម្ពុជា ពិសេសសម្រាប់វិស័យSME ដែលរងសម្ពាធពីវិបត្តិកូវីដ។ នេះបើតាមសេចក្តីប្រកាសពត៌មានរបស់ធនាគារអភិវឌ្ឍន៍អាស៊ី ADB កាលពីថ្ងៃទី១៨ ខែតុលា ឆ្នាំ២០២១។

បើតាមលោកស្រី Benita Ainabe អ្នកឯកផ្នែកហិរញ្ញវត្ថុរបស់ធានាអភិវឌ្ឍន៍អាស៊ី បានឱ្យដឹងថា ជំនួយនេះ នឹងជួយអភិវឌ្ឍនូវវិស័យសហគ្រាសធុនតូច និងមធ្យម (SME) ឱ្យងើបឡើងពីជំងឺរាតត្បាត ពោលគឺដើម្បីធានាការទទួលបានឥណទាន។

ការផ្តល់ជំនួយនេះ គឺជាអនុកម្មវិធីទី៣ នៃកម្មវិធីអភិវឌ្ឍវិស័យហិរញ្ញវត្ថុប្រកបដោយបរិយាប័ន្ន បន្ទាប់ពីបានអនុវត្តអនុកម្មវិធីចំនួន ២ រួចមកហើយ ចាប់ពីឆ្នាំ២០១៦ ដល់ឆ្នាំ ២០១៩។

គួរបញ្ជាក់ថា ការផ្តល់កម្ចីនេះ ធ្វើឡើងក្រោយ ADB ពិនិត្យឃើញថា ហេដ្ឋារចនាសម្ព័ន្ធហិរញ្ញវត្ថុរបស់ប្រទេសកម្ពុជាមិនទាន់អភិវឌ្ឍបានពេញលេញ ខណៈប្រជាពលរដ្ឋកម្ពុជាត្រឹមតែ១៨% ប៉ុណ្ណោះ ដែលមានការយល់ដឹងផ្នែកហិរញ្ញវត្ថុ។

ក្រៅពីផ្ដល់កម្ចីនេះ ADB ក៏បានក្រើនរំលឹកថា ជំងឺរាតត្បាតកូវីដ១៩ កំណើនលើសលុបនៃកម្ចីអចលនទ្រព្យ និងកំណើនឥណទានលឿន នៅតែជាកត្តាបង្កហានិភ័យដល់វិស័យហិរញ្ញវត្ថុកម្ពុជា។