ការដ្ឋានស្ពានខ្សែកាបធំៗ ២ ខ្សែ នៃគម្រោងអភិវឌ្ឍកោះនរា ជារួមសម្រេចបាន ១៤,៧% ហើយ

• 15 ខែ​កញ្ញា 2021
• Uncategorized
• 15 មើល

ការដ្ឋានសាងសង់ស្ពានខ្សែកាបធំៗ ២ ខ្សែ នៅភ្នំពេញ តភ្ជាប់ពីទីក្រុងកោះនរា ទៅផ្លូវជាតិលេខ ១ និងទៅកោះពេជ្រ ជាមធ្យមបានសម្រេចជាង ១៤,៧% ហើយ បើគិតត្រឹមខែកញ្ញា។ នេះបើយោងតាម អ្នកគ្រប់គ្រងគម្រោង លោក ម៉ែន បូលី។

លោកប៉ូលី បានប្រាប់ទស្សនាវដ្តីសំណង់ និងអចលនទ្រព្យ នៅថ្ងៃទី ១៥ កញ្ញា នេះថា ស្ពានទី ១ ដែលតភ្ជាប់កោះនរាទៅផ្លូវជាតិលេខ១ សម្រេចបានត្រឹម ២,៥% ប៉ុណ្ណោះ ខណៈស្ពានកោះពេជ្រ-កោះនរា សម្រេចបាន ២៧% ហើយ។

គម្រោងទាំង ២ កំពុងអនុវត្តដោយក្រុមហ៊ុន OCIC ដោយបានបើកការដ្ឋាន កាលពីខែតុលា ឆ្នាំ២០២០។ (អានបន្ថែម)

ស្ពានទី១ ជាប្រភេទស្ពានបេតុងយោងកាបដែលមានដែករាងឥន្ធនូ ២សងខាង តភ្ជាប់ពីផ្លូវជាតិលេខ១ ទៅកាន់តំបន់អភិវឌ្ឍន៍កោះនរា មានបណ្តោយប្រវែង ៦០ម៉ែត្រ និងទទឹងប្រវែង ២១ម៉ែត្រ។ ស្ពាននេះគ្រោងចំណាយថវិកាចំនួន ១,៦ លានដុល្លារអាមេរិក។

ដោយឡែក ស្ពានទី ២ ជាប្រភេទស្ពានបេតុងខ្សែកាប តភ្ជាប់ពីតំបន់អភិវឌ្ឍន៍កោះនរា ទៅកាន់ទីក្រុងរណបកោះពេជ្រ មានបណ្តោយប្រវែង ៨២៤ ម៉ែត្រ និងទទឹងប្រវែង ២៤,៥ ម៉ែត្រ និងមានសសរខ្សែកាបកម្ពស់ ៦០ ម៉ែត្រ ចំនួន ២ដើម ដែលមានចម្លាក់ក្បាច់ខ្មែរ។

ស្ពាននេះមានចរាចរទ្វេរទិស ២ទៅ ២មក ហើយគ្រោងចំណាយថវិកាចំនួន ៣៨លានដុល្លារអាមេរិក។

គួរបញ្ជាក់ផងដែរថា គម្រោងស្ពានទាំង ២ នេះ គឺជាផ្នែកមួយនៃគម្រោងអភិវឌ្ឍន៍កោះនរាឱ្យទៅជាទីក្រុងរណបថ្មីមួយរបស់ក្រុមហ៊ុន OCIC។ មកដល់ពេលនេះ ការសាងសង់ហេដ្ឋារចនាសម្ព័ន្ធនៃកោះនរា សម្រេចបានជាង ៤៨% ហើយ។ (អានបន្ថែម)

• គម្រោងអភិវឌ្ឍន៍
• Projects Development
• គម្រោងអភិវឌ្ឍន៍