ក្រុមប្រឹក្សាអភិវឌ្ឍន៍កម្ពុជាអនុម័តគម្រោងវិនិយោគធំៗ ២ ទៀត តម្លៃជិត ៧០ លានដុល្លារ

• 15 ខែ​កុម្ភៈ 2021
• ព័ត៌មានក្នុងស្រុក
• 10 មើល

ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្មីៗនេះ បានអនុម័តឱ្យក្រុមហ៊ុនឯកជនវិនិយោគសាងសង់រោងចក្រធំៗចំនួន ២ តម្លៃជិត ៧០ លានដុល្លារ នៅខេត្តកណ្តាល និងស្វាយរៀង។

ក្រុមហ៊ុនទី ១ គឺក្រុមហ៊ុន ONION MOBILITY CO., LTD ដែលនឹងវិនិយោគ ២០ លានដុល្លារអាមេរិក បង្កើតរោងចក្រផ្គុំតម្លើងទោចក្រយានយន្ត និងត្រីចក្រយានយន្ត ដើរដោយថាមពលអគ្គិសនី ដែលមានទីតាំងស្ថិតនៅក្នុងតំបន់សេដ្ឋកិច្ចពិសេស សុវណ្ណភូមិ ខេត្តកណ្តាល។

ដោយឡែក ក្រុមហ៊ុនទី ២ គឺក្រុមហ៊ុន SHANE (CAMBODIA) FURNITURE CO., LTD ដែលនឹងវិនិយោគ ៤៧,៧ លានដុល្លារអាមេរិក បង្កើតរោងចក្រផលិតសាឡុង គ្រែ និងគ្រឿងសង្ហារឹមគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស៊ីន បាវិត ខេត្តស្វាយរៀង។

បើយោងតាមក្រុមប្រឹក្សាអភិវឌ្ឍន៍កម្ពុជា គម្រោងទាំង ២ នេះនឹងចូលរួមបង្កើតការងារជាង ១២០០ កន្លែងដល់ប្រជាពលរដ្ឋក្នុងតំបន់។

គួរបញ្ជាក់ផងដែរថា ក្នុងអំឡុងត្រឹម១៥ ថ្ងៃ នៃខែកុម្ភៈ តែប៉ុណ្ណោះ ក្រុមប្រឹក្សាអភិវឌ្ឍន៍កម្ពុជា បានសម្រេចអនុម័តគម្រោងធំៗ យ៉ាងហោច ១២ គម្រោង រួចមកហើយ ឬស្មើនឹងទុនវិនិយោគសរុបប្រមាណជិត ៧០០ លានដុល្លារ។ (អានបន្ថែម និងបន្ថែម)

ដោយឡែក សម្រាប់ឆ្នាំ ២០២០ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគសរុបចំនួន ២៣៨ គម្រោង ឬស្មើនឹងទុនវិនិយោគសរុបប្រមាណជាង ៨ ពាន់លានដុល្លារអាមេរិក។ (អានបន្ថែម)

• Investment and Funding
• Road and Infrastructure
• Projects Development