គម្រោងកែលម្អផ្លូវ ៣៨ ខ្សែនៅខេត្តសៀមរាប បញ្ចប់បាន ១៤% ហើយ

• 14 ខែ​មករា 2021
• ព័ត៌មានក្នុងស្រុក
• 8 មើល

បើគិតត្រឹមថ្ងៃទី ១២ ខែមករា នេះ គម្រោងកែលម្អផ្លូវ ៣៨ ខ្សែ សម្រេចបានប្រមាណ ១៤,២៧% ហើយ ដោយនេះរួមបញ្ចូលទាំងការងារសាងសង់រួច និងសម្ភារៈដែលបានបញ្ជូនដល់ការដ្ឋាន។

វឌ្ឍនភាពនេះត្រូវបានបង្ហាញឱ្យដឹងនៅក្នុងកិច្ចប្រជុំចង្អៀតរវាងសម្ដេចឧបនាយករដ្ឋមន្ត្រី ទៀ បាញ់ ជាមួយឯកឧត្តម ជា សុផារ៉ា ឯកឧត្តម ស៊ុន ចាន់ថុល និងមន្ត្រីជាន់ខ្ពស់ពាក់ព័ន្ធជាច្រើនរូបទៀត កាលពីថ្ងៃទី ១៣ មករា នេះ។

គម្រោងកែលម្អផ្លូវ ៣៨ ខ្សែ បានបើកការដ្ឋានកាលពីថ្ងៃទី ៣០ ខែវិច្ឆិកា ឆ្នាំ ២០២០ ក្រោមអធិបតីភាពសម្ដេចនាយករដ្ឋមន្រ្តី ហ៊ុន សែន ដែលមានប្រវែងសរុប ១០៨ គីឡូម៉ែត្រ នឹងគ្រោងចំណាយថវិកាសរុប ១៤០ លានដុល្លារ។ (អានបន្ថែម)

ក្រៅពីគម្រោងផ្លូវ ៣៨ ខ្សែនេះ រដ្ឋាភិបាលក៏បានសម្រេចបង្វែរថវិកា ៥ លានដុល្លារ ដែលសេសសល់ពីការសាងសង់ហេដ្ឋារចនាសម្ព័ន្ធនៅសីហនុមកកែលម្អ ដងស្ទឹងសៀមរាប ដែលមានប្រវែងជាង ៩ គីឡូម៉ែត្រ ផងដែរ។

បន្ថែមពីនេះ ថវិកាប្រមាណ ៩ លានដុល្លារអាមេរិកទៀត ក៏នឹងត្រូវបានចំណាយសម្រាប់ការងារចាំបាច់ក្នុងការរៀបចំស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ ដែលនៅក្រៅគម្រោងសាងសង់ខ្សែផ្លូវទាំង ៣៨ នេះ។

• Investment and Funding
• Road and Infrastructure
• Projects Development