បារាំងចាប់អារម្មណ៍ចង់វិនិយោគលើគម្រោងសង់ផ្លូវដែកល្បឿនលឿននៅកម្ពុជា

• 26 ខែ​មករា 2023
• Uncategorized
• 10 មើល

ប្រតិភូបារាំង បានបង្ហាញបំណងចង់បោះទុនវិនិយោគលើផ្លូវដែកល្បឿនលឿននៅកម្ពុជា ដើម្បីជួយអភិវឌ្ឍន៍ហេដ្ឋារចនាសម្ព័ន្ធដឹកជញ្ជូនកម្ពុជាឱ្យកាន់តែល្អប្រសើរថែមទៀត។ នេះបើតាមជំនួបរវាងប្រតិភូបារាំង ជាមួយឯកឧត្តម ស៊ុន ចាន់ថុលរដ្ឋមន្រ្តីក្រសួងសាធារណការ និងដឹកជញ្ជូន នៅថ្ងៃទី២៥ ខែមករា។

នាឱកាសនោះដែរ លោក François Corbin តំណាងពិសេសរបស់រដ្ឋមន្ត្រីអឺរ៉ុប និងកិច្ចការបរទេស សម្រាប់ទំនាក់ទំនងសេដ្ឋកិច្ចជាមួយអាស៊ាន បានផ្ដល់ចំណាប់អារម្មណ៍ជាខ្លាំងក្នុងការដាក់ទុនវិនិយោគលើផ្លូវដែកល្បឿនលឿនក្នុងប្រទេសកម្ពុជា និងបានប្តេជ្ញាពង្រឹងកិច្ចសហប្រតិបត្តិការទ្វេភាគីឱ្យកាន់តែប្រសើរឡើងថែមទៀត។

ទន្ទឹមនឹងនេះដែរ ឯកឧត្តម ស៊ុន ចាន់ថផុល ក៏បានលើកឡើងដែរថា កិច្ចប្រជុំនេះ នឹងជួយពង្រីកនូវទំនាក់ទំនងជាមួយបណ្ដាក្រុមហ៊ុនធំៗរបស់ប្រទេសបារាំង ដែលវិនិយោគលើគ្រប់វិស័យឱ្យកាន់តែមានភាពជិតស្និទ្ធបន្ថែមទៀត។ ជាមួយគ្នានេះផងដែរ ក្រសួង និងក្រុមហ៊ុនធំៗរបស់បារាំង ក៏បានឯកភាពនឹងពិនិត្យឡើងវិញលើការសិក្សាប្រព័ន្ធផ្លូវដែក លើផ្លូវថ្នល់ (Tramways)ថែមទៀតផង។

គួររម្លឹកថា ការបង្ហាញបំណងចង់វិនិយោគលើផ្លូវដែកល្បឿនលឿនរបស់ប្រតិភូបារាំងនាពេលនេះ គឺធ្វើឡើងស្របពេលសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសស្វាគមន៍ និងបានប្រកាសថា កម្ពុជាអនុញ្ញាតឱ្យធ្វើការវិនិយោគ ១០០% សម្រាប់ផ្លូវដែកថ្មីល្បឿនលឿនពីទីក្រុងភ្នំពេញ ទៅកាន់ទីក្រុងហូជីមិញ ពិសេសបានជំរុញឱ្យអ្នកធុរកិច្ចបារាំងធ្វើការវិនិយោគ ក្នុងការសាងសង់រថភ្លើងល្បឿនលឿន និងការដឹកជញ្ជូននៅកម្ពុជាផងដែរ។ នេះបើយោងតាមប្រសាសន៍របស់សម្តេចតេជោ ក្នុងជំនួបជាមួយរដ្ឋមន្ត្រីប្រតិភូអម រដ្ឋមន្ត្រីក្រសួងអឺរ៉ុប និងការបរទេសបារាំង ឯកឧត្តម អូលីវេ្យ បិច កាលពីថ្ងៃទី២៥ មករា៕

• Road and Infrastructure