មកទល់ពេលនេះ ផ្លូវជាតិលេខ២៣ ស្ថាបនារួចរាល់១០០% ហើយ ​

• Sommana Yan
• 27 ខែ​តុលា 2025
• ព័ត៌មានក្នុងស្រុក
• 295 មើល

គម្រោងលើកកម្រិតគុណភាព ជួសជុល និងថែទាំកំណាត់ផ្លូវជាតិលេខ២៣ ប្រវែង ១៩,៨ គីឡូម៉ែត្រ សម្រេចការស្ថាបនារួចរាល់១០០% ហើយ។ នេះបើយោងតាមការប្រកាសរបស់ក្រសួងសាធារណការ និងដឹកជញ្ជូន កាលថ្ងៃទី២៤ ខែតុលា ឆ្នាំ២០២៥។ ​

ក្រសួងបានឱ្យដឹងថា កំណាត់ផ្លូវជាតិលេខ២៣ (NR23) ប្រវែង ១៩,៨ គីឡូម៉ែត្រ មានទទឹងតួផ្លូវ ១១ម៉ែត្រ ចាប់ពីគល់ស្ពានកោះធំត្រើយខាងកើត ស្ថិតក្នុងឃុំជ្រោយតាកែវ ស្រុកកោះធំ (PK0+000) ដល់ផ្លូវជាតិលេខ ១៤ ឃុំពាមរាំង ស្រុកលើកដែក ខេត្តកណ្តាល (PK19+800) សម្រេចការស្ថាបនារួចរាល់១០០% ហើយ កាលពីដើមខែតុលា ឆ្នាំ២០២៥នេះ។

ផ្លូវដែលទើបជួសជុលថ្មីនេះត្រូវបានស្ថាបនាឡើង ដោយឆ្លងកាត់ឃុំចំនួនបួន គឺឃុំជ្រោយតាកែវ ឃុំកំពង់កុង ឃុំលើកដែក ស្រុកកោះធំ និងឃុំពាមរាំង ស្រុកលើកដែក ខេត្តកណ្តាល ដែលបម្រើជាតំណភ្ជាប់ដ៏សំខាន់មួយដែលគាំទ្រដល់ពាណិជ្ជកម្ម ការធ្វើដំណើរ និងកំណើនសេដ្ឋកិច្ចនៅក្នុងតំបន់។

គម្រោងនេះរួមមានការធ្វើឱ្យប្រសើរឡើងនូវចំណុចសំខាន់ៗមួយចំនួន ដូចជាការដំឡើងផ្លូវកៅស៊ូ AC សម្រាប់ភាពធន់ជាងមុន ចិញ្ចើមផ្លូវដែលមានមុខងារ ប្រព័ន្ធបង្ហូរទឹកដែលប្រសើរឡើង និងការរចនាផ្លូវដែលធន់នឹងអាកាសធាតុ ដើម្បីទប់ទល់នឹងបញ្ហាប្រឈមបរិស្ថាន។ ដើម្បីធានាបាននូវគុណភាពយូរអង្វែង ក្រសួងក៏បានសន្យាថានឹងផ្តល់ការថែទាំរយៈពេលបីឆ្នាំបន្ទាប់ពីបញ្ចប់ការសាងសង់។

គួរបញ្ជាក់ថា គម្រោងលើកកម្រិតគុណភាព ជួសជុល និងថែទាំកំណាត់ផ្លូវជាតិលេខ ២៣ រួមមាន៖ ការពង្រីកផ្លូវឱ្យមានទទឹងកាន់តែធំ ការងារសាងសង់ និងជួសជុលដោយចាក់ក្រាលកៅស៊ូ AC ការរចនាចិញ្ចើមផ្លូវការរៀបចំប្រព័ន្ធលូបង្ហូរទឹក (U-drain) ត្រង់ចំណុចសំខាន់ៗ ការរៀបចំជើងទេរដែលមានភាពធន់ទៅនឹងបម្រែបម្រួលអាកាសធាតុ និងភាតរៈបរិស្ថាន (Climate Friendly) និងការងារថែទាំខួបសម្រាប់រយៈពេល ៣ឆ្នាំ បន្ទាប់ពីការងារសាងសង់ត្រូវបានបញ្ចប់៕ (អានបន្ថែម)

• Road and Infrastructure