ធនាគារ AIIB ពិនិត្យលទ្ធភាពគម្រោងសាងសង់ផ្លូវជាតិលេខ៨ ពីស្ពានព្រែកតាមាក់ ដល់ពញ្ញាក្រែក

Proeksa Meas
7 ខែកញ្ញា 2026
ព័ត៌មានសំណង់
55 មើល

កិច្ចប្រជុំបច្ចេកទេសផ្តោតលើការវាយតម្លៃផលប៉ះពាល់បរិស្ថាន-សង្គម និងផែនការហិរញ្ញវត្ថុ ដើម្បីពន្លឿនការតភ្ជាប់ហេដ្ឋារចនាសម្ព័ន្ធផ្លូវថ្នល់សំខាន់រវាងខេត្តកណ្តាល ព្រៃវែង និងត្បូងឃ្មុំ

រាជធានីភ្នំពេញ៖ ក្រសួងសាធារណការ និងដឹកជញ្ជូន បានជំរុញការអភិវឌ្ឍន៍ និងលើកកម្ពស់គុណភាពហេដ្ឋារចនាសម្ព័ន្ធផ្លូវថ្នល់នៅកម្ពុជាតាមរយៈការសិក្សាជាក់ស្តែងនូវគម្រោងថ្មីមួយទៀត ក្នុងគោលដៅពង្រឹងការតភ្ជាប់សេដ្ឋកិច្ច និងការដឹកជញ្ជូនរវាងរាជធានី និងបណ្តាខេត្តក្នុងតំបន់ភាគខាងកើតនៃប្រទេស។ នារសៀលថ្ងៃពុធ ទី២៦ ខែសីហា ឆ្នាំ២០២៦ ឯកឧត្តម នឹម សុធា អនុរដ្ឋលេខាធិការ ក្រសួងសាធារណការ និងដឹកជញ្ជូន និងជានាយករងគម្រោង បានដឹកនាំកិច្ចប្រជុំពិភាក្សាការងារជាមួយលោក Corey Wong តំណាងធនាគារវិនិយោគហេដ្ឋារចនាសម្ព័ន្ធអាស៊ី (AIIB) នៅទីស្តីការក្រសួង។ កិច្ចប្រជុំនេះមានការចូលរួមពីថ្នាក់ដឹកនាំ ក្រុមការងារបច្ចេកទេស ព្រមទាំងតំណាងក្រុមហ៊ុនទីប្រឹក្សា ES Consultant ដើម្បីពិនិត្យ និងវាយតម្លៃលើវឌ្ឍនភាពនៃការសិក្សាគម្រោងសាងសង់ផ្លូវជាតិលេខ៨ ចាប់ពីចំណុចស្ពានព្រែកតាមាក់ រហូតដល់ស្រុកពញ្ញាក្រែក ត្រង់ចំណុចប្រសព្វផ្លូវជាតិលេខ៧។

នៅក្នុងអង្គប្រជុំ ភាគីពាក់ព័ន្ធបានធ្វើការពិភាក្សា និងពិនិត្យយ៉ាងល្អិតល្អន់លើរបាយការណ៍សិក្សាសមិទ្ធិលទ្ធភាពបឋម (Feasibility Study) ដែលគ្របដណ្តប់លើទិដ្ឋភាពបច្ចេកទេសសំខាន់ៗជាច្រើន។ របៀបវារៈចម្បងនៃជំនួបនេះ គឺការវាយតម្លៃលើផលប៉ះពាល់បរិស្ថាន និងសង្គម ដើម្បីធានាថាការអភិវឌ្ឍផ្លូវនេះនឹងមិនបង្កើតផលវិបាកអវិជ្ជមានដល់សហគមន៍មូលដ្ឋាន និងបរិស្ថានជុំវិញនោះឡើយ។ ជាមួយគ្នានេះ អង្គប្រជុំបានពិនិត្យលើផែនការហិរញ្ញវត្ថុ ព្រមទាំងការកំណត់កាលវិភាគអនុវត្តគម្រោងឱ្យបានច្បាស់លាស់ សំដៅធានាឱ្យដំណើរការសាងសង់នាពេលខាងមុខអាចប្រព្រឹត្តទៅបានដោយរលូន ស្របតាមបទដ្ឋានបច្ចេកទេស និងមានប្រសិទ្ធភាពថវិកា។

នាឱកាសនោះ ឯកឧត្តម នឹម សុធា បានសម្តែងនូវការវាយតម្លៃខ្ពស់ និងកោតសរសើរចំពោះកិច្ចខិតខំប្រឹងប្រែងរបស់ក្រុមការងារបច្ចេកទេសក្រសួង តំណាងធនាគារ AIIB និងក្រុមហ៊ុនទីប្រឹក្សា ES Consultant ដែលបានសហការគ្នាយ៉ាងសកម្មនាពេលកន្លងមក។ ឯកឧត្តមអនុរដ្ឋលេខាធិការ បានស្នើឱ្យភាគីទាំងអស់បន្តពង្រឹងកិច្ចសហប្រតិបត្តិការឱ្យកាន់តែជិតស្និទ្ធបន្ថែមទៀត ដើម្បីពន្លឿនការសិក្សាស្រាវជ្រាវ និងការរៀបចំឯកសារពាក់ព័ន្ធឱ្យបានចប់សព្វគ្រប់តាមផែនការដែលបានកំណត់ ប្រកបដោយគុណភាព សុវត្ថិភាព និងប្រសិទ្ធភាពខ្ពស់។

សូមជម្រាបជូនថា ការជំរុញការសិក្សាសមិទ្ធិលទ្ធភាពគម្រោងសាងសង់ និងលើកកម្ពស់ផ្លូវជាតិលេខ៨ គឺជាជំហានយុទ្ធសាស្ត្រដ៏មានសារៈសំខាន់ក្នុងការបើកច្រករបៀងសេដ្ឋកិច្ច និងសម្រួលដល់ការដឹកជញ្ជូនកសិផល ព្រមទាំងការធ្វើដំណើររបស់ប្រជាពលរដ្ឋ។ ការរួមបញ្ចូលគ្នារវាងការគាំទ្រហិរញ្ញវត្ថុពីធនាគារ AIIB ការវាយតម្លៃផលប៉ះពាល់បរិស្ថាន-សង្គមយ៉ាងម៉ត់ចត់ និងការគ្រប់គ្រងបច្ចេកទេសច្បាស់លាស់ នឹងប្រែក្លាយផ្លូវជាតិលេខ៨ ឱ្យទៅជាខ្សែផ្លូវប្រកបដោយចីរភាព និងគុណភាពខ្ពស់ ដែលចូលរួមចំណែកយ៉ាងសកម្មដល់ការជំរុញកំណើនសេដ្ឋកិច្ចជាតិ និងការលើកកម្ពស់ជីវភាពប្រជាពលរដ្ឋក្នុងតំបន់។ (អានបន្ថែម)