ប្រព័ន្ធលូ និងទីលានកប់សម្រាមតម្លៃជិត ១៣លានដុល្លារ នៅពោធិ៍សាត់សម្រេចជាង ៦៤%ហើយ

• 19 ខែ​កក្កដា 2021
• Uncategorized
• 9 មើល

គម្រោងសាងសង់ប្រព័ន្ធលូរំដោះទឹកកខ្វក់ និងទីលានកប់សំណល់រឹង នៅខេត្តពោធិ៍សាត់ ដែលកំពុងសាងសង់ក្រោមកម្ចីហិរញ្ញប្បទានរបស់ ADB ជាង ១២,៩លានដុល្លារ មកទល់បច្ចុប្បន្ន សម្រេចបានជាង ៦៤% ហើយ ។ នេះបើតាមកិច្ចប្រជុំរបស់រដ្ឋបាលខេត្ត កាលពីថ្ងៃទី ១៦ ខែកក្កដា កន្លងទៅនេះ។

ជាក់ស្ដែង សម្រាប់គម្រោងសាងសង់ប្រព័ន្ធលូរំដោះទឹកដែលកំពុងអនុវត្តដោយក្រុមហ៊ុន គីរីដងរ៉ែក សម្រេចបាន ៦២% ហើយ។ មកទល់ពេលនេះ ក្រុមហ៊ុន បានសាងសង់លូថ្មីរួចរាល់ប្រវែង ២៣គីឡូម៉ែត្រ និងស្តារប្រព័ន្ធលូចាស់បានប្រវែង ២៣គីឡូម៉ែត្រ។

ក្រៅពីនេះ ក្រុមហ៊ុនក៏កំពុងសាងសង់អាងប្រតិកម្មទឹកកខ្វក់នៅក្នុងសង្កាត់ផ្ទះព្រៃ លើផ្ទៃដី ៣ហិកតា និងស្តារប្រឡាយសម្រាប់បញ្ចេញទឹកពីអាងប្រតិកម្មនេះបានប្រវែង ២៨០០ម៉ែត្រ ហើយដែរ។

ក្រៅពីសាងសង់ប្រព័ន្ធលូ ក្រុមហ៊ុនក៏នឹងធ្វើផ្លូវកៅស៊ូ DBST បានប្រវែង ១៨គម មួយខ្សែ ធ្វើផ្លូវបេតុង ជុំវិញតំបន់ផ្សារថ្មីពោធិ៍សាត់ប្រវែង ២គម និងស្តារឡើងវិញនូវទំនប់ភូមិកោះប្រវែង ១,៥ គម ផងដែរ។

គម្រោងដែលបានរៀបរាប់ខាងលើនេះ នឹងចំណាយថរិកាសរុបប្រមាណ ១១,៥ លានដុល្លារ ដោយ គ្រោងបញ្ចប់នៅដើមឆ្នាំ២០២២។

យ៉ាងណាមិញ សម្រាប់គម្រោងទីលានកប់សំណល់រឹងវិញ សម្រេចបាន៦៧% ហើយ។ គម្រោងកំពុងសាងសង់ដោយក្រុមហ៊ុន អ៊ឹង ស៊ឹមស៊ា លើផ្ទៃដី ១៥ហិកតា នៃផ្ទៃដីសរុប ២៨ហិកតា ស្ថិតក្នុងសង្កាត់រលាប ក្រោមថវិកា ១,៤លានដុល្លារអាមេរិក ដោយគ្រោងនឹងបញ្ចប់នៅខែតុលា ឆ្នាំ២០២១ នេះ។

គួរបញ្ជាក់ថា គម្រោងកែលម្អបរិស្ថានជុំវិញបឹងទន្លេសាបក្នុងភូមិសាស្ត្រក្រុងពោធិ៍សាត់នេះ បានចាប់ផ្តើមសិក្សាតាំងតែពីឆ្នាំ២០១៣ ប៉ុន្តែទើបចាប់ផ្តើមអនុវត្តក្នុងឆ្នាំ២០២០ នេះទេ ដែលមានក្រសួងសាធារណការ និងដឹកជញ្ជូនជាម្ចាស់គម្រោង។

• ថាមពល និងបរិស្ថាន
• គម្រោងអភិវឌ្ឍន៍
• Energy and Environment
• Projects Development
• គម្រោងអភិវឌ្ឍន៍
• ថាមពល និងបរិស្ថាន