រដ្ឋព្រមានចាត់វិធានច្បាប់លើពលរដ្ឋដែលរំលោភដីទួលសុវត្ថិភាពនៅខេត្តក្រចេះ

• 27 ខែ​កញ្ញា 2023
• Uncategorized @km
• 7 មើល

អាជ្ញាធរខេត្តក្រចេះ បានដាក់ឱសានវាទត្រឹមដំណាច់ខែកញ្ញានេះ ដោយព្រមានចាត់វិធានការតាមផ្លូវច្បាប់លើពលរដ្ឋ ដែលកំពុងរំលោភកាន់កាប់លើដីទួលសុវត្ថិភាពទួលតាឃីនស្ថិតក្នុងឃុំបុសលាវ ស្រុកចិត្របុរី។ នេះបើតាមសេចក្តីជូនដំណឹងរបស់រដ្ឋបាលខេត្ត ចុះថ្ងៃទី២១ ខែកញ្ញា ឆ្នាំ២០២៣។

រដ្ឋបាលខេត្ត បានបញ្ជាក់ថា ដីទួលសុវត្ថិភាពទួលតាឃីន (ទួលថ្មដា ទួលជំរុំគោ និងទួលទ្រុងទា) ស្ថិតក្នុងឃុំបុសលាវ ប្រើប្រាស់ជាសាធារណៈ ក្នុងពេលមានទឹកជំនន់ ដើម្បីស្នាក់នៅជាបណ្តោះអាសន្ន ជម្លៀសសត្វពាហនៈ គោ ក្របី និងសម្ភារផ្សេងៗ ដោយមិនអនុញ្ញាតឱ្យមានការកាន់កាប់ជាកម្មសិទ្ធិឯកជនឡើយ។

អាស្រ័យហេតុនេះ រដ្ឋបាលខេត្ត បានទុកពេលឱ្យប្រជាពលរដ្ឋដែលកំពុងទន្ទ្រានកាន់កាប់ និងរស់នៅលើដីទួលសុវត្ថិភាពទួលតាឃីន ត្រូវបញ្ឈប់ការចូលទន្ទ្រាន កាន់កាប់ ដាំដុះបន្ថែម និងរុះរើខ្ទម របង ពូជដំណាំ និងសម្ភារផ្សេងៗ រួចចាកចេញពីទីទួលសុវត្ថិភាពនេះ ចាប់ពីថ្ងៃជូនដំណឹងនេះរហូតដល់ថ្ងៃទី៣០ ខែកញ្ញានេះ។

បើពុំនោះទេ ផុតរយៈពេលកំណត់នេះ អាជ្ញាធរខេត្ត នឹងដាក់គ្រឿងចក្រចូលសម្អាត និងកាយក្រវ៉ាត់ព្រំដីទួលសុវត្ថិភាពខាងលើ នឹងអនុវត្តតាមនីតិវិធីច្បាប់ដោយគ្មានលក្ខខណ្ឌចំពោះជនណាដែលមិនព្រមសហការ។

ដោយឡែក ប្រជាពលរដ្ឋដែលបានកាន់កាប់អាស្រ័យផលយូរឆ្នាំ រស់នៅជាអចិន្ត្រៃយ៍ និងកាន់កាប់អាស្រ័យផលតាមបណ្តោយផ្លូវក្នុងភូមិព្រែកកូវ ចាប់ពីចំណីផ្លូវទៅក្រោយ ៥០ម៉ែត្រ និងមានការបញ្ជាក់ច្បាស់លាស់ពីអាជ្ញាធរមូលដ្ឋាន អាជ្ញាធរខេត្ត អនុញ្ញាតឱ្យបន្តការអាស្រ័យផល និងរស់នៅជាបណ្តោះអាសន្នសិន។

• Laws and Regulation