­­រដ្ឋាភិបាលកម្ពុជា ប្តេជ្ញាអភិវឌ្ឍន៍ខេត្ត៤នៅភាគឦសាន ឱ្យកាន់តែរីកចម្រើន ដោយត្រៀម $២០០លាន បញ្ចប់ការសង់ផ្លូវក្រវាត់ព្រំដែន

• 5 ខែ​កញ្ញា 2024
• Uncategorized
• 8 មើល

ប្រមុខរាជរដ្ឋាភិបាលកម្ពុជា បានសម្រេចកញ្ចប់ថវិកាប្រមាណ ២០­­០លានដុល្លារ សម្រាប់កសាងផ្លូវតាមបណ្តោយព្រំដែន ជាប់ជាមួយប្រទេសជិតខាងដូចជា ថៃ ឡាវ និងវៀតណាម ដែលនៅសល់ប្រវែង ១,៣០០គីឡូម៉ែត្រទៀត ដោយគ្រោងចំណាយពេលសាងសង់១០ឆ្នាំ។​

ក្នុងពិធីប្រគល់វិញ្ញាបនបត្រ ជូនសិស្ស មេធាវី និងសិក្ខាកាមមេធាវីសរុប ១.៦៦០រូប នៅរាជធានីភ្នំពេញ នៅថ្ងៃទី៥ ខែសីហា ឆ្នាំ២០២៤ សម្តេចធិបតី ហ៊ុន ម៉ាណែត មានប្រសាសន៍ថា សម្តេចបានចុះហត្ថលេខាលើថវិកាជាង ២០០លានដុល្លារ ដើម្បីបញ្ចប់ផែនការធ្វើផ្លូវក្រវាត់ព្រំដែន នៅក្នុងរយៈពេល១០ឆ្នាំ ខាងមុខ។

សម្តេចធិបតី​ បានលើកឡើងថា៖ “ផ្លូវក្រវាត់ព្រំដែន ដែលយើងត្រូវធ្វើមានជាង ២.៦៦០គីឡូម៉ែត្រ។ ឥឡូវយើងធ្វើបាន ១.៣០០គីឡូម៉ែត្រ ឬស្មើនិង ៥០ភាគរយហើយ នៅសល់ ១.៣០០ គីឡូម៉ែត្រទៀត។ ដូច្នេះខ្ញុំបានចុះហត្ថលេខានៅខែ៧នេះ នូវផែនការបញ្ចប់ជូនរបស់បញ្ជាការដ្ឋានវិស្វកម្ម ដើម្បីបញ្ចប់ក្នុងរយៈពេល១០ឆ្នាំ មានថវិកាជាង ២០០លានដុល្លារ យើងបានរៀបចំរួចរាល់ហើយដើម្បីបន្តធ្វើកិច្ចការងារនេះ»។

សម្តេចធិបតីបានឱ្យដឹងទៀតថា រាជរដ្ឋាភិបាល បានប្តេជ្ញាថានឹងអភិវឌ្ឍន៍ខេត្តទាំងបួន នៅតំបន់ភូមិភាគឦសាន ឱ្យកាន់តែរីកចម្រើនបន្ថែមទៀត និងខិតខំជំរុញការបោះបង្គោលព្រំដែន ឱ្យបានរួចរាល់។

គួររលឹកថា គិតមកដល់ពេលនេះ «មូលនិធិកសាងហេដ្ឋារចនាសម្ព័ន្ធតាមព្រំដែន» ទទួលបានថវិកាជាង ១៩លានដុល្លារ ដោយមានការចូលរួមពីប្រជាពលរដ្ឋប្រមាណ ៤០ម៉ឺននាក់ហើយ ។

• Road and Infrastructure