អាជ្ញាធរខេត្តបន្ទាយមានជ័យរៀបចំអភិរក្សតំបន់កូនភ្នំពង្រមានផ្ទៃដីជាង ១៥០០ ហិកតា

• 8 ខែ​កុម្ភៈ 2023
• Uncategorized @km
• 10 មើល

អាជ្ញាធរខេត្តបន្ទាយមានជ័យ និងក្រុមមន្ត្រីជំនាញ កំពុងរៀបចំការពារ និងអភិរក្សតំបន់កូនភ្នំពង្រ មានផ្ទៃដីប្រមា​ណ ១៥៧៦ហិកតា ដែលស្ថិតនៅភូមិសាស្ត្រសង្កាត់កំពង់ស្វាយ ក្រុងសិរីសោភ័ណ។

បើតាមកិច្ចប្រជុំកាលពីថ្ងៃទី០៧ ខែកុម្ភៈ ឆ្នាំ២០២៣ គម្រោងអភិរក្សតំបន់កូនភ្នំពង្រ គឺដើម្បីថែរក្សាការពារ និងអភិរក្សធនធានធម្មជាតិព្រៃភ្នំសម្រាប់ប្រជាពលរដ្ឋជំនាន់ក្រោយ ជាពិសេសរួមចំណែកដល់ការការពារបរិស្ថាន និងអភិវឌ្ឍជាតំបន់ទេសចរណ៍ទៀតផង។

លោក លី សារី អភិបាលរង ខេត្តបន្ទាយមានជ័យ បានជំរុញក្រុមការងារទាំងអស់ត្រូវចុះពិនិត្យទីតាំងជាក់ស្តែង និងសិក្សាឱ្យបានច្បាស់លាស់នូវឯកសារគតិយុត្តពាក់ព័ន្ធ ដើម្បីងាយស្រួលក្នុងការគ្រប់គ្រង និងអាចកំណត់បាននូវទំហំកម្មសិទ្ធិនៅតំបន់នេះ។​

បន្ថែមពីនេះ លោកអភិបាលរង ក៏បានជំរុញបន្ថែមឱ្យមានការផ្សព្វផ្សាយបញ្ជ្រៀបការយល់ដឹងដល់ភាគីពាក់ព័ន្ធ រួមទាំងប្រជាពលរដ្ឋក្នុងតំបន់នោះ ដើម្បីចូលរួមចំណែកទាំងអស់គ្នាក្នុងការការពារ អភិរក្ស និងគ្រប់គ្រងធនធានធម្មជាតិ ដែលជាសម្បត្តិសម្រាប់មនុស្សជាតិទាំងមូល។

• Laws and Regulation