កម្ពុជាកំពុងពិភាក្សាជាមួយវៀតណាមលើគម្រោងផ្លូវដែកភ្នំពេញ-ហូជីមិញ

• Proeksa Meas
• 9 ខែ​កុម្ភៈ 2018
• Uncategorized
• 165 មើល

រដ្ឋាភិបាលកម្ពុជាបានស្នើគម្រោងផ្លូវដែកភ្នំពេញ-ហូជីមិញទៅប្រទេសវៀតណាមដើម្បីពិចារណាក្នុងគោលបំណងបង្កើនការតភ្ជាប់រវាងប្រទេសទាំងពីរ។

សំណើនេះត្រូវបានធ្វើឡើងនៅក្នុងកិច្ចប្រជុំផ្លូវការរវាងឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្រ្តីក្រសួងសាធារណការ និងដឹកជញ្ជូន និងឯកឧត្តម Nguyen Nhat អនុរដ្ឋមន្រ្តីក្រសួងដឹកជញ្ជូន នៃសាធារណរដ្ឋសង្គមនិយមវៀតណាម កាលពីដើមសប្តាហ៍កន្លងទៅនេះ ដើម្បីពិភាក្សាអំពីកិច្ចសហប្រតិបត្តិការជាយុទ្ធសាស្ត្រនៅក្នុងវិស័យដឹកជញ្ជូន។

ផ្លូវដែកនឹងភ្ជាប់ទីក្រុងភ្នំពេញទៅបាវិតនិងទៅកាន់ទីក្រុងហូជីមិញ។ នៅដំណាក់កាលនេះគម្រោងនេះនៅតែជាផែនការអភិវឌ្ឍន៍ដែលបានស្នើសុំ ហើយនឹងត្រូវសិក្សាបន្ថែមទៀតអំពីរបៀបទាក់ទាញវិនិយោគិនមកវិនិយោគបន្ថែមទៀតនៅក្នុងគម្រោងនេះ។

យោងតាមអ្នកនាំពាក្យរបស់ក្រសួងសាធារណការ និងដឹកជញ្ជូន លោក វ៉ា ស៊ឹមសុរិយា គម្រោងនេះគឺជាផ្នែកមួយនៃអនុស្សរណៈយោគយល់ស្តីពី៖ “យុទ្ធសាស្រ្តកិច្ចសហប្រតិបត្តិការក្នុងវិស័យដឹកជញ្ជូន (២០១៨-២០២៥)” ដែលត្រូវបានបញ្ចប់ ហើយនឹងត្រូវចុះហត្ថលេខាដោយថ្នាក់ដឹកនាំនៃក្រសួងទាំងពីរ។

លើសពីនេះទៀត ផ្លូវល្បឿន​លឿន (Express Way) ពីរាជធានីភ្នំពេញ-អ្នកលឿង-បាវិត ក៏កំពុងស្ថិតនៅក្រោមការសិក្សាផងដែរ ដែលក្នុងនោះនឹងមានការចូលរួមពីទីភ្នាក់ងារសហប្រតិបត្តិការអន្តរជាតិជប៉ុនហៅកាត់ថា JICA ។