ក្រុមហ៊ុនកាស៊ីណូយក្ស NagaCorp ប្រកាសខាត ៧៧លានដុល្លារ ក្នុងឆមាសទី១ឆ្នាំ ២០២១

• Sommana Yan
• 2 ខែ​កញ្ញា 2021
• ព័ត៌មានអចលនទ្រព្យ
• 209 មើល

ក្រុមហ៊ុនកាស៊ីណូយក្ស NagaCorp បានប្រកាសខាតទុន ៧៧,២លានដុល្លារ នៅក្នុងឆមាសទី១ឆ្នាំ២០២១ នេះ បន្ទាប់ពីក្រុមហ៊ុនប្រកាសបិទទ្វារតាំងពីខែមីនា ដើម្បីចូលរួមទប់ស្កាត់ការរីករាលដាលជំងឺកូវីដ១៩នៅកម្ពុជា។

ទោះជាក្រុមហ៊ុនខាតក្ដី ក្រុមហ៊ុនក៏នៅតែមានប្រាក់ចំណូលវិជ្ជមាន ជាមួយនឹងចំណូលដុលពីការលេងហ្គេមសរុប ១២៩,៣ លានដុល្លារអាមេរិក និងប្រាក់ចំណេញមុនកាតកងចំណាយផ្សេងៗ (EBITDA) ១១,២ លានដុល្លារ។ នេះបើយោងតាមរបាយការណ៍ក្រុមហ៊ុនចេញផ្សាយនៅថ្ងៃទី ៣០ ខែសីហា។

លើសពីនេះ ក្រុមហ៊ុននៅតែបន្តធ្វើតាមគោលនយោបាយរបស់រដ្ឋាភិបាល ដោយបានបង់ពន្ធសរុប ១១,៦ លានដុល្លារក្នុងរយៈពេល ៦ ខែដំបូងនៃឆ្នាំ ២០២១ នេះ។

យ៉ាងណាក្ដី ក្រុមហ៊ុនមិនបានប្រកាសពីកាលបរិច្ឆេទបើកដំណើរការឡើងវិញនោះទេ។ ប៉ុន្តែយោងតាមសេចក្តីប្រកាសរបស់ក្រសួងទេសចរណ៍ កាលពីថ្ងៃទី ២១ ខែឧសភា កន្លងទៅ ក្រសួងនឹងពិភាក្សាធ្វើយ៉ាងណាឱ្យមានលទ្ធភាពបើកទទួលភ្ញៀវទេសចរណ៍អន្តរជាតិដែលបានចាក់វ៉ាក់សាំងបង្ការជំងឺកូវីដ១៩រួចនៅត្រីមាសទី៤ឆ្នាំនេះ។