ក្រុមហ៊ុនអន្តរជាតិឈានមុខផ្នែកទីផ្សារ Bluebell Trading នឹងមកគ្រប់គ្រងគម្រោងផ្សារទំនើប The Peak

25 ខែធ្នូ 2020
ព័ត៌មានក្នុងស្រុក
10 មើល

ក្រុមហ៊ុនអន្តរជាតិឈានមុខគេផ្នែកទីផ្សារនៅទ្វីបអាស៊ី Bluebell Trading Pte. Ltd បានចុះអនុស្សារណៈនៃការយោគយល់គ្នាជាមួយក្រុមហ៊ុន Oxley Gem ដើម្បីមកគ្រប់គ្រងលើគម្រោងអភិវឌ្ឍន៍ផ្សារទំនើប The Peak។ នេះបើយោងតាមសេចក្ដីប្រកាសព័ត៌មានរបស់ក្រុមហ៊ុន កាលពីថ្ងៃទី ២៤ ធ្នូ នេះ។

នាយកប្រតិបត្តិរបស់ក្រុមហ៊ុនសម្ព័ន្ធ Bluebell Group លោក Ashley Micklewright បានឱ្យដឹងថា៖ «ក្រុមហ៊ុនយើងខ្ញុំមានក្តីសប្បាយរីករាយក្នុងការសហការជាមួយក្រុមហ៊ុន Oxley-Worldbridge នៅកម្ពុជា ហើយរំពឹងថានឹងធ្វើឱ្យ The Peak ក្លាយជាផ្សារទំនើបលេចធ្លោមួយនៅអាស៊ី»។

លោកបានឱ្យដឹងទៀតថា៖ «អាជីវកម្មស្នូលរបស់ក្រុមហ៊ុន គឺការយកចិត្តទុកដាក់លើតម្រូវការរបស់អតិថិជន។ ជាមួយគ្នានេះ ក្រុមហ៊ុនក៏មានបទពិសោធន៍ធ្វើការជាមួយផ្សារទំនើបធំៗចំនួន ១០ កន្លែង និងប្រេនល្បីៗជាច្រើនទៀត នៅក្នុងទ្វីបអាស៊ីអស់ពេលជិត ៦ ទសវត្សរ៍មកហើយ»។

ក្រុមហ៊ុនសម្ព័ន្ធ Bluebell Group គឺជាក្រុមហ៊ុនឈានមុខគេផ្នែកទីផ្សារបង្កើតម៉ាកផលិតផល (Branding) នៅទ្វីបអាស៊ីចាប់តាំងពីឆ្នាំ ១៩៥៤ មក។ បច្ចុប្បន្នក្រុមហ៊ុននេះ មានវត្តមាននៅប្រទេសជប៉ុន កូរ៉េខាងត្បូង ចិន ហុងកុង តៃវ៉ាន់ ម៉ាកាវ សិង្ហបូរី ម៉ាឡេស៊ី ឥណ្ឌូនេស៊ី និង ប្រទេសថៃ និងមានទីតាំងលក់ទំនិញចំនួន ១០០០ កន្លែងទូទាំងអាស៊ី។

គួរបញ្ជាក់ផងដែរថា ផ្សារទំនើប The Peak មានកម្ពស់ ៥ ជាន់ មានផ្ទៃដីក្រឡាសរុបជាងប្រមាណ ៤០.០០០ ម៉ែត្រការ៉េ (មិនរាប់បញ្ចូលកន្លែងចតរថយន្ត) និងផ្ទៃដីក្រឡាសម្រាប់ជួល (Net Lettable Area) មានប្រមាណ ២៤.០០០ ម៉ែត្រការ៉េ។

ផ្សារទំនើបនេះ ជាផ្នែកមួយនៃគម្រោង The Peak ដែលជាអគារអភិវឌ្ឍចម្រុះ ៥៥ ជាន់ ស្ថិតនៅក្នុងខណ្ឌចំការមន ដែលកំពុងសាងសង់ក្រោមការបណ្ដាក់ទុនរបស់ក្រុមហ៊ុន Oxley ជាមួយក្រុមហ៊ុនកម្ពុជា Worldbridge Land ។ (អានបន្ថែម)