ក្រុមហ៊ុនCPLប្តេជ្ញាពង្រឹងគុណភាពការវាយតម្លៃអចលនទ្រព្យនៅកម្ពុជា

• Proeksa Meas
• 30 ខែ​សីហា 2018
• ព័ត៌មានអចលនទ្រព្យ
• 253 មើល

គុណភាពនៃការវាយតម្លៃអចលនទ្រព្យនៅក្នុងប្រទេសកម្ពុជាកំពុងឈានទៅមួយកម្រិតទៀតបន្ទាប់ពីមានភាពជាដៃគូយុទ្ធសាស្រ្តថ្មីរវាងក្រុមហ៊ុនអចលនទ្រព្យឈានមុខគេនៅកម្ពុជា Cambodia Properties Limited (CPL) និងធនាគារវៀតណាម MB Bank។

ថ្លែងនៅក្នុងពិធីចុះហត្ថលេខាលើកិច្ចសហប្រតិបត្តិការភាពជាដៃគូយុទ្ធសាស្រ្តស្តីពីការវាយតម្លៃអចលនទ្រព្យដែលបានប្រព្រឹត្តិឡើងកាលពីថ្ងៃទី ២៨ ខែសីហាលោកឧកញ៉ាចេង ខេង អគ្គនាយកក្រុមហ៊ុនអចលនទ្រព្យ CPLបានប្តេជ្ញាពង្រឹងគុណភាពការវាយតម្លៃអចលនទ្រព្យអោយកាន់តែប្រសើរឡើងដើម្បីបង្កើនទំនុកចិត្តពីអតិថិជនរបស់ខ្លួន។

ក្នុងឱកាសនោះដែរ លោកឧកញ៉ាចេង ខេង ក៏បានអោយដឹងពីភាពជោគជ័យរបស់ក្រុមហ៊ុន CPL នៅក្នុងវិស័យសេវាវាយតម្លៃអចលនទ្រព្យដែលក្នុងនោះលោកបានមានប្រសាសន៍ថា ៩០ ភាគរយនៃធនាគារនៅក្នុងប្រទេសកម្ពុជាបានប្រើប្រាស់សេវាវាយតម្លៃអចលនទ្រព្យរបស់ក្រុមហ៊ុនរបស់លោកហើយធនាគារមួយចំនួនបានផ្តល់សិទ្ធិផ្តាច់មុខដល់ក្រុមហ៊ុន CPL ទៀតផង។

លើសពីនេះទៅទៀត ក្រុមហ៊ុន CPL គឺជាក្រុមហ៊ុនដែលផ្តល់សេវាវាយតម្លៃដ៏ធំមួយនៅកម្ពុជា។ យោងតាមប្រសាសន៍របស់លោកឧកញ៉ាចេងខេងក្រុមហ៊ុន CPL មានបុគ្គលិកប្រមាណ ១៥០ នាក់ ហើយក្រុមហ៊ុនអាចផ្តល់ការវាយតម្លៃអចលនទ្រព្យរហូតដល់ទៅ ៣០០០សេវា ក្នុងមួយខែ។ក្នុងរយៈពេលមួយឆ្នាំក្រុមហ៊ុន CPL រំពឹងថានឹងអាចបន្ថែមការផ្គត់ផ្គង់សេវានេះទ្វេដង។

ទន្ទឹមនឹងនេះដែរ ដើម្បីធានាបាននិរន្តភាពនិងតម្លាភាពនៃការវាយតម្លៃអចលនទ្រព្យនៅក្នុងប្រទេសកម្ពុជាលោកឧកញ៉ាឆេងខេងក៏បានអំពាវនាវដល់ភ្នាក់ងារអចលនទ្រព្យទាំងអស់ដែលផ្តល់សេវាវាយតម្លៃអចលនទ្រព្យត្រូវមានតម្លាភាពខ្ពស់នៅពេលធ្វើការវាយតម្លៃ។