ខេត្តកែបកំពុងរៀបចំសង់ផែថ្មី១ទៀតតម្លៃជាង ១លានដុល្លារ ខណៈផែសេះសសង់បាន៧០%

• Sommana Yan
• 11 ខែ​ឧសភា 2023
• Uncategorized @km
• 410 មើល

អាជ្ញាធរខេត្តកែប កំពុងរៀបចំសាងសង់កំពង់ផែដឹកទំនិញថ្មីមួយទៀត តម្លៃជាង ១លានដុល្លារ ខណៈកំពង់ផែសេះស បាននិងកំពុងសាងសង់សម្រេចបាន ៧០%ហើយ។ នេះបើតាមការលើកឡើងរបស់ ឯកឧត្តម សោម ពិសិដ្ឋ អភិបាលខេត្តកែប ក្នុងសន្និសីទសារព័ត៌មាន ស្ដីពី “ភាពជោគជ័យក្នុងរយៈពេល ៥ឆ្នាំកន្លងមក” របស់រដ្ឋបាលខេត្តកែប កាលពីថ្ងៃទី១១ ខែឧសភា ឆ្នាំ២០២៣។

ឯកឧត្តមអភិបាល បានលើកឡើងថា កំពង់ផែសេះស កំពុងសាងសង់មិនទាន់រួចរាល់ ១០០% ទេ តែសាងសង់សម្រេច​បាន ៦០ ទៅ ៧០% ហើយ ដែលគ្រោងនឹងបញ្ចប់នាពេលឆាប់ៗខាងមុខនេះ។

ឯកឧត្តមអភិបាល បានបន្ថែមថា ទន្ទឹមនឹងនេះ រដ្ឋបាលខេត្តកែប កំពុងដាក់គម្រោងស្នើសុំវិនិយោគផែដឹកទំនិញថ្មីមួយទៀតលើដីសាធារណៈរបស់រដ្ឋ។

ឯកឧត្តមអភិបាល បានបញ្ជាក់ទៀតថា គម្រោងវិនិយោគនេះ ស្ថិតក្នុងគម្រោងវិនិយោគរបស់វិស័យឯកជន ដែលមានទំហំទឹកប្រាក់ប្រមាណជាង ១លានដុល្លារ។

គួរបញ្ជាក់ថា គម្រោងវិនិយោគសាងសង់កំពង់ផែទេសចរណ៍ថ្មីនៅខេត្តកែប ឬស្គាល់ទូទៅថាជាផែសេះស ត្រូវបានបើកការដ្ឋានជាផ្លូវការនៅថ្ងៃទី១៥ ខែកញ្ញា ឆ្នាំ២០២១ ដែលជាការវិនិយោគរបស់ឯកជនក្រោមទុន ១,៩លានដុល្លារ ។ (អានបន្ថែម)