ជប៉ុនចង់វិនិយោគលើវិស័យសំខាន់២ នៅកម្ពុជា ដោយប្រើបច្ចេកវិទ្យាទំនើបរបស់ខ្លួន ច្នៃវត្ថុធាតុដើម

• 15 ខែ​កញ្ញា 2023
• Uncategorized
• 9 មើល

វិនិយោគិនជប៉ុន ចាប់អារម្មណ៍ខ្លាំងចង់វិនិយោគលើវិស័យសហគ្រាសធុនតូច និងមធ្យម ដោយប្រើបច្ចេកវិទ្យាទំនើបរបស់ជប៉ុន ដើម្បីកែច្នៃវត្ថុធាតុដើមរបស់កម្ពុជា ផលិតជាផលិតផលសម្រេចសម្រាប់នាំចេញ ជាពិសេសចង់ជួយបណ្តុះបណ្តាលជំនាញវិជ្ជាជីវៈសំខាន់ៗជាច្រើនដល់ពលរដ្ឋកម្ពុជាថែមទៀតផង។

នេះបើតាមការលើកឡើងរបស់ឯកឧត្តម តាកាហាស៊ី ហ្វូមីអាគី ប្រធានសមាគមជប៉ុន-កម្ពុជា ក្នុងជំនួបរវាងឯកឧត្តម និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី១២ ខែកញ្ញា ឆ្នាំ២០២៣។

ឯកឧត្តម តាកាហាស៊ី ហ្វូមីអាគី បានឱ្យដឹងថា ក្រុមអ្នកវិនិយោគិនជប៉ុនមានចំណាប់អារម្មណ៍ខ្លាំងលើការវិនិយោគក្នុងវិស័យសហគ្រាសធុនតូច និងមធ្យម (SMEs)នៅកម្ពុជា ដោយសង្កត់ធ្ងន់លើ ២វិស័យសំខាន់ៗរួមមាន៖ (១.) ការផលិតទំនិញកែច្នៃ ដោយប្រើវត្ថុធាតុដើមរបស់កម្ពុជា និងបច្ចេកវិទ្យាទំនើបមកពីប្រទេសជប៉ុន ដើម្បីផលិតជាផលិតផលសម្រេច សម្រាប់នាំចេញ និង (២.) ការបណ្តុះបណ្តាលជំនាញវិជ្ជាជីវៈ ដោយផ្តោតលើ៖ សេវាបដិសណ្ឋារកិច្ច, មេកានិក យានយន្ត (សេវាជួសជុលរថយន្តជប៉ុន), ការតុបតែង និងកែសម្ផស្ស, សេវាថែទាំអ្នកជំងឺ-មនុស្សចាស់ និងជំនាញបច្ចេកវិទ្យាព័ត៌មាន និងឌីជីថល។

ឯកឧត្តម តាកាហាស៊ី ហ្វូមីអាគី បន្ថែមទៀតថា នៅខែវិច្ឆិកាខាងមុខនេះ គណៈប្រតិភូធុរកិច្ចជប៉ុន នឹងមកធ្វើទស្សនកិច្ចនៅកម្ពុជាជាថ្មីម្ដងទៀត និងស្នើសុំពិភាក្សាការងារជាមួយសម្តេចមហាបវរធិបតី។

ជាមួយនឹងចំណាប់អារម្មណ៍នេះ សម្តេចបវរធិបតី បានជំរុញឱ្យសមាគមធុរកិច្ចជប៉ុន សហការ និងបង្កើនទំនាក់ទំនងការងារ ជាមួយភាគីពាក់ព័ន្ធរបស់កម្ពុជា ដើម្បីសម្រេចឱ្យបាននូវវត្ថុបំណងទាំងនេះ។

• Cooperation and networking
• Projects Development