តម្លៃជួលផ្ទៃក្រឡាក្នុងផ្សារទំនើបនៅឆ្នាំ២០១៩នឹងធ្លាក់ចុះ

• Me Wathana
• 16 ខែ​កុម្ភៈ 2019
• ព័ត៌មានអចលនទ្រព្យ
• 143 មើល

កំណើនផ្សារទំនើបនៅរាជធានីភ្នំពេញក្នុងឆ្នាំ ២០១៩ នឹងធ្វើឲ្យតម្លៃជួលផ្ទៃក្រឡាមានការប្រកួតប្រជែងកាន់តែខ្លាំង ដែលនេះនឹងធ្វើឲ្យតម្លៃមានការធ្លាក់ចុះ នេះបើយោងតាមរបាយការណ៍ចេញផ្សាយដោយភ្នាក់ងារអចលនទ្រព្យអន្តរជាតិ CBRE Cambodia។

កាលពីពេលថ្មីៗនេះ ក្រុមហ៊ុន CBRE Cambodia បានព្យាករណ៍ថា ក្នុងឆ្នាំ ២០១៩នេះ តម្លៃជួលផ្ទៃក្រឡាក្នុងទីផ្សារលក់រាយឬផ្សារទំនើបគឺនឹងមានការធ្លាក់ចុះ ដោយសារមានការបន្ថែមការផ្គត់ផ្គង់ពីផ្សារទំនើបផូឌៀម(ជាផ្សារស្ថិតក្នុងអគារឬគម្រោងណាមួយ) មានចំនួន១១៦.៦ ភាគរយ និងផ្សារទំនើបបែបសហគមន៍ ចំនួន១២៦.៣ ភាគរយ និងផ្សារទំនើបធំៗចំនួន ២៦.៤ ភាគរយ។

ការកើនឡើងនៃការផ្គត់ផ្គង់ទាំងនេះ គឺនឹងធ្វើឲ្យទីផ្សារលក់រាយមានផ្ទៃក្រឡាជួលរហូតដល់ទៅ ៣៧៥,០០០ ម៉ែត្រការ៉េក្នុងឆ្នាំ ២០១៩នេះ ដែលជំរុញដោយផ្សារទំនើបបួនប្រភេទរួមមាន៖ មជ្ឈមណ្ឌលបែបផ្សារទំនើបដែលភាគច្រើនមានតែហាងលក់ទំនិញ ផ្សារទំនើបបែបសហគមន៍ ផ្សារទំនើបធំៗ និងផ្សារទំនើបផូឌៀម។

ក្នុងនោះដែរ តម្លៃជួលផ្ទៃក្រឡាក្នុងទីផ្សារលក់រាយសម្រាប់ផ្សារទំនើបបែបសហគមន៍គឺនឹងធ្លាក់មកប្រមាណជា ២៦.៨ ដុល្លារអាមេរិកក្នុងមួយម៉ែត្រការ៉េក្នុងមួយខែ ហើយផ្សារទំនើបបែបសហគមន៍នេះទៀតសោត គឺនឹងមានការប្រកួតប្រជែងខ្លាំងជាងផ្សារទំនើបប្រភេទផ្សេងៗទៀត។