តម្លៃដីនៅព្រះសីហនុកើនឡើងបន្ទាប់ពីមានពាក្យចចាមរាមនៃការវិនិយោគរបស់ក្រុមហ៊ុនមហាសាល

• Proeksa Meas
• 27 ខែ​កក្កដា 2017
• ព័ត៌មានអចលនទ្រព្យ
• 222 មើល

តម្លៃដីនៅក្រុងព្រះសីហនុនាពេលបច្ចុប្បន្នមានការកើនឡើងខ្លាំង បន្ទាប់ពីមានពាក្យចចាមអារ៉ាមមួយដែលថាក្រុមហ៊ុនបុត្រសម្ព័ន្ធរបស់មហាសេដ្ឋី Jack Ma មកបណ្តាក់ទុនវិនិយោគនៅឆ្នេរអូរត្រេះ។

ខណៈពេលដែលវិនិយោគិនចិនសម្លឹងឃើញឱកាសក្នុងការវិនិយោគលើវិស័យដីធ្លី សណ្ឋាគារ អគារខុនដូ និងគម្រោងអភិវឌ្ឍជាច្រើនផ្សេងទៀត ដើម្បីប្រែក្លាយតំបន់មួយនេះជាកាស៊ីណូ និងកន្លែងកំសាន្ត ដោយតម្លៃដីក៏មានកើនឡើងបន្ទាប់ពីមានការរាលដាលនៃពាក្យចចាមរាមនេះ។

ព័ត៌មានចចាមអារ៉ាមនេះបានលេចឮយ៉ាងច្បាស់នៅឆ្នេរអូត្រេះ ដែលក្រុមហ៊ុនបុត្រសម្ព័ន្ធរបស់ក្រុមហ៊ុន Alibaba ទិញដីនៅឆ្នេរអូត្រេះទាំងមូល។ មិនយូរប៉ុន្មាន ព័ត៌មាននេះក៏ត្រូវបានច្រានចោលដោយតំណាងក្រុមហ៊ុន Alibaba។

តែយ៉ាងណា ព័ត៌មានចចាមអារ៉ាមនេះ បានធ្វើឲ្យតម្លៃដីបានកើនឡើង ១៥០ដុល្លារអាមេរិកក្នុងមួយម៉ែត្រការ៉េ ពោលគឺតម្លៃដីក្នុងមួយម៉ែត្រការ៉េលក់ក្នុងតម្លៃ ៣៥០ដុល្លារ កើនរហូតដល់ ៥០០ ដុល្លារក្នុងមួយម៉ែត្រការ៉េ៕