ទីតាំងម្ដុំផ្សារកុងតឺន័រចាស់នឹងប្ដូរមុខមាត់ជាផ្សារទំនើប The One Mall នៅចុងឆ្នាំនេះ

Kongleaphy Keam
24 ខែសីហា 2019
ព័ត៌មានអចលនទ្រព្យ
169 មើល

ទីតាំងម្ដុំផ្សារកុងតឺន័រចាស់ នៅទីក្រុងភ្នំពេញ នឹងផ្លាស់ប្ដូរមុខមាត់ទៅជាផ្សារទំនើបបែបសហគមន៍ថ្មីមួយឈ្មោះថា The One Mall នៅខែ ធ្នូ ឆ្នាំ ២០១៩ ខាងមុខនេះ។ នេះបើយោងតាមការប្រកាសរបស់ម្ចាស់គម្រោងកាលពីថ្ងៃទី ២២ សីហាកន្លងមកនេះ។

មានទីតាំងស្ថិតនៅលើអតីតផ្សាររាត្រីកុងតឺន័រក្បែរចំហៀងស្ថានទូតរុស្ស៊ី ក្នុងសង្កាត់ទន្លេបាសាក់ ខណ្ឌចំការមន ផ្សារទំនើប The One Mall នេះ នឹងមានកម្ពស់ ៣ ជាន់ ហើយនឹងសាងសង់លើផ្ទៃដី ១២ ០០០ ម៉ែត្រការ៉េ។

ផ្សារទំនើបមួយនេះ នឹងរួមមានហាងសរុបចំនួន ១៥០ កន្លែង ដែលក្នុងនោះ មានជាហាងលក់ទំនិញ ហាងលក់សម្លៀកបំពាក់ ភោជនីយដ្ឋាន កន្លែងក្មេងលេង និង កន្លែងហាត់ប្រាណ ជាដើម។

គម្រោងនេះ បានបើកការដ្ឋានសាងសង់ កាលពីខែមិថុនា កន្លងមកនេះ ដែលបច្ចុប្បន្នបានបញ្ចប់ការសាងសង់មួយជាន់ហើយ ។ បើយោងតាមការប្រកាសរបស់ម្ចាស់គម្រោង ផ្សារទំនើបថ្មីមួយនេះ គ្រោងនឹងបញ្ចប់ការសាងសង់នៅខែតុលា ហើយនឹងបើកដំណើរការជាផ្លូវការនៅ ខែធ្នូ ឆ្នាំ២០១៩ ខាងមុខនេះ។

គូរបញ្ជាក់ផងដែរថា គម្រោងនេះ គឺជាការវិនិយោគរបស់ក្រុមហ៊ុន The One Mall Management (Cambodia) Co., Ltd ដែលជាបុត្រសម្ព័ន្ធរបស់ក្រុមហ៊ុនចិន Ming Sheung International Investment Co., Ltd។