បច្ចុប្បន្ន ផ្លូវជាតិលេខ១០ សង់បាន ៩៦%,  ខណៈស្ពានខ្ពស់ជាងគេសង់បាន ៩៣% គ្រោងបើកឱ្យប្រើប្រាស់នៅចុងខែមីនា

• Sommana Yan
• 21 ខែ​មករា 2025
• ព័ត៌មានក្នុងស្រុក
• 146 មើល

មកទល់បច្ចុប្បន្ន គម្រោងស្ថាបនាផ្លូវជាតិលេខ១០ មានប្រវែងសរុប ១៩៨,៥១៨ គីឡូម៉ែត្រ សម្រេចការសាងសង់បាន ៩៦,១៦%, ខណៈស្ពានខ្ពស់ជាងគេប្រវែង៥៣០ម៉ែត្រ សម្រេចបាន ៩៣% ហើយគ្រោងនឹងបើកឱ្យប្រើប្រាស់សាកល្បងនៅចុងខែមីនា ឆ្នាំ២០២៥នេះ។

នេះបើយោងតាមបញ្ជក់របស់ ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន នៅថ្ងៃទី២០ ខែមករា ឆ្នាំ២០២៥។

ឯកឧត្តម ផន រឹមបានឱ្យដឹងថា ការងារផ្លូវថ្នល់, ការងារស្ពាន, ការងារស្ពានខ្ពស់ជាងគេប្រវែង៥៣០ម៉ែត្រសម្រេចបាន៩៣%(គ្រោងដាក់ឱ្យប្រើប្រាស់សាកល្បងនៅចុងខែមីនា ឆ្នាំ២០២៥ខាងមុខ), ការងារលូកាត់ទទឹងថ្នល់ និងការងារលូបណ្តោយថ្នល់ និងជញ្ជាំងការពារជើងទេ។

មកទល់បច្ចុប្បន្ន កំណាត់ផ្លូវលេខ១០ មានស្ថានភាពដូចតទៅ៖ ពីpk0(សំឡូត)-pk60(ក្រពើពីរ)កៅស៊ូDBST ,ពីpk 60-pk 85 ក្រួសក្រហម និងកំពុងចាក់ថ្មធ្វេីស្រទាប់គ្រឹះ បាញ់កៅស៊ូ ,ពីpk 85-pk112(អូរសោម)កៅស៊ូ DBST,

ពីpk 112 -pk 175 កំពុងបាញ់កៅស៊ូ DBST( សូមបញ្ជាក់ផងដែរ ពីpk 122 ដល់pk129 យើងប្រើប្រាស់ចាស់ដែលជាផ្លូវក្រួសក្រហមវាងស្ពានខ្ពង់) ,និងពីpk 175-pk 198 (កោះកុង)កៅស៊ូDBST ។

ស្របពេលដែលចរាចរណ៍លើផ្លូវជាតិលេខ១០ កំពុងដំណើរការយ៉ាងរលូន ឯកឧត្តមបានណែនាំថា អ្នកដំណើរទាំងអស់ត្រូវមានការប្រុងប្រយ័ត្ន ដោយសារកំណាត់ផ្លូវខ្លះនៅជាក្រួសក្រហម មានសភាពហុយ ពិបាកក្នុងការមើលផ្លូវ ។

គួរបញ្ចាក់ថា ផ្លូវជាតិលេខ១០នេះ ជាប្រភេទផ្លូវ Grade III ក្រាលកៅស៊ូពីរស្រទាប់ (DBST) មានប្រវែងផ្លូវសរុប១៩៨,៥១៨គីឡូម៉ែត្រ និងទទឹង ៩ម៉ែត្រ ត្រូវបានសាងសង់ឡើងក្រោមហិរញ្ញប្បទានពីរដ្ឋាភិបាលចិន មានទំហំទឹកប្រាក់សរុបប្រមាណជាង ១៨៨លានដុល្លារ។ (អានបន្ថែម)

ផ្លូវមួយខ្សែនេះត្រូវបានគេរំពឹងថានឹងពង្រឹងការតភ្ជាប់ និងការអភិវឌ្ឍន៍ក្នុងតំបន់នៅពេលសាងសង់រួចរាល់។