ប្រជាជនស្នាក់នៅអគារប៊ូឌីងទទួលយកសាច់ប្រាក់

• Proeksa Meas
• 30 ខែ​មីនា 2017
• ព័ត៌មានអចលនទ្រព្យ
• 348 មើល

ប្រជាជនជាច្រើនដែលស្នាក់នៅអគារប៊ូឌីងចាស់ទ្រុឌទ្រោម នៃរាជធានីភ្នំពេញ ហាក់ចង់លក់អចលនទ្រព្យរបស់ខ្លួនប្តូរយកប្រាក់ ជាជាងរង់ចាំការអភិវឌ្ឍឡើងវិញលើទីតាំង បើទោះបីមានការណែនាំ ពីក្រសួងរៀបចំដែនដីនគរូបនីយកម្ម និងសំណង់ (MLMUPC) ក៏ដោយ។

បន្ទាប់ពីមានពាក្យចចាមអារ៉ាមជាច្រើនឆ្នាំជុំវិញការអភិវឌ្ឍអគារនេះ ក្រសួងរៀបចំដែនដី នគរូបនីយកម្ម និងសំណង់ បានប្រកាសកាលពីខែតុលា ឆ្នាំ២០១៥ ថា ក្រសួងគ្រោងនឹងធ្វើការជាមួយនឹងអ្នកអភិវឌ្ឍន៍ដើម្បីសាងសង់អគារដែលមានការប្រើប្រាស់ចម្រុះកម្ពស់ ២១ជាន់។ ប្រជាជនស្នាក់នៅក្នុងអគារនោះ នឹងត្រូវផ្តល់ជូនអាផាតមិនថ្មីមួយនៅ ក្នុងគម្រោងអភិវឌ្ឍន៍នេះ ប្រសិនបើពួកគេសុខចិត្តផ្លាស់ប្តូរទីលំនៅរយៈពេលបួនឆ្នាំ រហូតដល់ការសាងសង់ត្រូវបានបញ្ចប់។

ទោះជាយ៉ាងណា អ្នករស់នៅទីនេះជាច្រើននៅតែមិនទុកចិត្តចំពោះការធានាទាំងនេះ ហើយចង់លក់អចលនទ្រព្យរបស់ពួកគេប្តូរជាសាច់ប្រាក់ រួចចាកចេញពីតំបន់នេះ។