ផ្សារបោះដុំធំជាងគេនៅកម្ពុជា បើកដំណើរការនៅព្រឹកនេះ

• Proeksa Meas
• 17 ខែ​ធ្នូ 2017
• ព័ត៌មានអចលនទ្រព្យ
• 83 មើល

តាមផែនការដែលបានគ្រោងទុក ផ្សារម៉ាក្រូ​ ដែលជាមជ្ឈមណ្ឌលចែកចាយផលិតផលបោះដុំធំបំផុតមានមូលដ្ឋានមក​ពី​ប្រទេសថៃ ​​នឹងបើកសម្ពោ​ធសាខាដំបូងរបស់ខ្លួននៅកម្ពុជា​​នៅព្រឹកនេះ ជាមួយនឹងការលក់ទំនិញរហូតដល់ជាង ២ម៉ឺនមុខឯណោះ។

ផ្សារទំនើបលក់បោះដុំមួយនេះ មានកម្ពស់២ជាន់ ទំហំ ១០ពាន់ម៉ែត្រការ៉េ ត្រូវបានសាងសង់នៅលើផ្ទៃដីទំហំ ៥ហិកតា ស្ថិតនៅបឹងពោងពាយ ខណ្ឌសែនសុខ ភាគពាយព្យរាជធានីភ្នំពេញ​​ ដែលជាតាំងស្ថិតនៅក្នុងតំបន់ជាមួយគ្នានឹងផ្សារទំនើបអ៊ីអនម៉ល២ និងគម្រោងសាងសង់ផ្សារទំនើប E-Mart ដែលមានមូលដ្ឋាននៅប្រទេសកូរ៉េ ទើបត្រូវបានប្រកាសនាពេលថ្មីៗកន្លងទៅនេះ។

ម៉ាកយីហោម៉ាក្រូបានចូលទីផ្សារកម្ពុជា មានឈ្មោះថា Makro Cambodia តាមរយៈការវិនិយោគរួមគ្នា រវាងក្រុមហ៊ុនថៃ Siam Makro ជាអ្នកកាន់កាប់ភាគហ៊ុនចំនួន ៧០ភាគរយ ហើយភាគហ៊ុននៅសល់ ក្រុមហ៊ុន LYP Group​ ជាអ្នកកាន់កាប់។ គួររំឮកផងដែរថា ផ្សារទំនើបលក់បោះដុំ ដែលនឹងត្រូវកាន់កាប់ដោយអ្នកឧកញ៉ា លី យ៉ុងផាត់ ម្ចាស់ក្រុមហ៊ុន LYP Group ធ្លាប់បានបង្ហាញមហិច្ឆតារបស់ខ្លួនថានឹងពង្រីកសាខាថ្មីចំនួន ៩ បន្ថែមទៀតនៅកម្ពុជា បន្ទាប់ពីបើកដំណើរការសាខាទីមួយ។