រដ្ឋចេញនីតិវិធីទទួលស្គាល់ក្រុមហ៊ុន និងអ្នកជំនាញវាយតម្លៃអចលនវត្ថុក្នុងវិស័យបរធនបាលកិច្ច

• 10 ខែ​វិច្ឆិកា 2022
• Uncategorized @km
• 3 មើល

អាជ្ញាធរសេវាហិរញ្ញវត្ថុមិនមែនធនាគារ បានកំណត់លក្ខខណ្ឌ និងនីតិវិធីទទួលស្គាល់ក្រុមហ៊ុនវាយតម្លៃ និងអ្នក​​ជំនាញ​​​វាយតម្លៃអចលនវត្ថុ ក្នុងវិស័យបរធនបាលកិច្ច ក្រោយទទួលបានអាជ្ញាបណ្ណពីនិយ័តករបរធនបាលកិច្ច (ន.ប.ធ)។ នេះបើតាមប្រកាស​លេខ ០៥២ អ.ស.ហ ប្រ.ក ចុះថ្ងៃទី០៣ ខែវិច្ឆិកា ឆ្នាំ២០២២ ស្តីពីការ​ទទួលស្គាល់​ក្រុមហ៊ុនវាយតម្លៃក្នុង​វិស័យ​បរធន​បាលកិច្ច​។

ក្រុមហ៊ុនវាយតម្លៃដែលមានបំណងស្នើសុំការទទួលស្គាល់ពី ន.ប.ធ ត្រូវដាក់ពាក្យស្នើសុំទៅតាមទម្រង់ និងឯកសារ​ភ្ជាប់ ដូចជា៖

• ទទួលបានអាជ្ញាបណ្ណពី ន.ប.ធ
• បានបង្កើត និងមានធុរកិច្ចនៅក្នុងព្រះរាជាណាចក្រកម្ពុជា យ៉ាងហោចណាស់ ២ឆ្នាំ គិតមកត្រឹមថ្ងៃដាក់​ពាក្យ​ស្នើសុំការទទួលស្គាល់
• មានអ្នកជំនាញវាយតម្លៃយ៉ាងតិចចំនួន ១រូប។

ចំណែក អ្នកជំនាញវាយតម្លៃត្រូវដាក់ពាក្យស្នើសុំការទទួលស្គាល់មក ន.ប.ធ ទៅតាមទម្រង់ និងឯកសារភ្ជាប់ ដូច​ខាងក្រោម៖

• មានវិញ្ញាបនបត្រវិជ្ជាជីវៈដែលចេញដោយ ន.ប.ធ
• មានបទពិសោធន៍វាយតម្លៃក្នុងវិស័យអចលនទ្រព្យ យ៉ាងតិច ៣ឆ្នាំ
• ផ្តល់លិខិតតែងតាំងពីក្រុមហ៊ុនវាយតម្លៃ
• ចូលរួមវគ្គបណ្តុះបណ្តាល និងការប្រឡងដែលរៀបចំដោយ ន.ប.ធ ឬដោយស្ថាប័នបណ្តុះបណ្តាល​ដែល​ទទួលសិទ្ធិពី ន.ប.ធ ហើយលទ្ធផលប្រឡងមានសុពលភាព ២ឆ្នាំ គិតចាប់ពីកាលបរិច្ឆេទដែល ន.ប.ធ ប្រកាសលទ្ធផលប្រឡង។ បុគ្គលដាក់ពាក្យស្នើសុំត្រូវចូលរួមការអប់រំវិជ្ជាជីវៈបន្ត ដែលរៀបចំដោយ ន.ប.ធ ឬដោយស្ថាប័នបណ្តុះបណ្តាលដែលទទួលបានសិទ្ធិពី ន.ប.ធ មុនពេលលទ្ធផលប្រឡងអស់​​សុពលភាព។

មួយវិញទៀត ការទទួលស្គាល់ក្រុមហ៊ុនវាយតម្លៃ និងអ្នកជំនាញវាយតម្លៃ មានសុពលភាពអនុលោមទៅតាម​សុពល​ភាព​នៃអាជ្ញាបណ្ណពី ន.ប.ធ គិតចាប់ពីកាលបរិច្ឆេទនៃការទទួលស្គាល់ក្រុមហ៊ុនវាយតម្លៃ និងអ្នកជំនាញវាយតម្លៃ។

គួរបញ្ជាក់ថា បរធនបាលកិច្ច សំដៅដល់ ការគ្រប់គ្រង និងចាត់ចែងបរធនដែលផ្តល់ដោយបរធនបាលទាយក សម្រាប់​ជាប្រយោជន៍ដល់អត្ថគាហកៈ ដោយអនុលោមតាមលិខិតបរធនបាលកិច្ច ឬ បទប្បញ្ញត្តិជាធរមាន។

សព្វថ្ងៃនេះ នៅកម្ពុជា បរទេសអាចទិញដីនៅកម្ពុជាបានតាមរយៈក្រុមហ៊ុនបរធនបាល ដែលបានចុះ​បញ្ជី​បរធន​បាល​កិច្ចនៅក្រសួងសេដ្ឋកិច្ច និងហិរញ្ញវត្ថុត្រឹមត្រូវ។ (អានបន្ថែម)

• Laws and Regulation