វិនិយោគិនបោះទុនជាង២៩៥លានដុល្លារសាងសង់សណ្ឋាគារ និងរោងចក្រសូឡា

• Khat Leakhena
• 30 ខែ​សីហា 2019
• ព័ត៌មានអចលនទ្រព្យ
• 207 មើល

ក្រុមហ៊ុនចំនួន៣ នឹងបោះទុនវិនិយោគសរុបប្រមាណជាង ២៩៥លានដុល្លារអាមេរិក ដើម្បីសាងសង់សណ្ឋាគារលំដាប់ផ្កាយ និងរោងចក្រសូឡានៅខេត្តព្រះសីហនុ ខេត្តពោធិ៍សាត់ និងខេត្តកំពង់ឆ្នាំង។

កាលពីថ្ងៃទី ២៩ ខែ សីហា ក្រុមប្រឹក្សាអភិវឌ្ឍន៍កម្ពុជា ឬ ហៅកាត់ថា CDC បានអនុញ្ញាតឲ្យក្រុមហ៊ុន Hai Gang Grand Hotel Co.,Ltd សាងសង់ និងធ្វើអាជីវកម្មសណ្ឋាគារថ្នាក់ផ្កាយ ៥ ដែលមានបន្ទប់ចំនួន៩០០បន្ទប់ ស្ថិតក្នុង ភូមិ៦ សង្កាត់លេខ៤ ក្រុងព្រះសីហនុ ខេត្តព្រះសីហនុ ក្រោមទុនវិនិយោគចំនួនប្រមាណជា ១៥៣លានដុល្លារអាមេរិក និងអាចបង្កើតការងារបានចំនួន ៩៨១ កន្លែង។

ក្នុងនោះដែរ ក្រុមហ៊ុន Xigang V-Continent International Investment Co.,Ltd ក៏ទទួលបានការអនុញ្ញាតឲ្យសាងសង់ និងធ្វើអាជីវកម្មសណ្ឋាគារថ្នាក់ផ្កាយ៥ ដែលមានបន្ទប់ ចំនួន១១១១បន្ទប់ ស្ថិតនៅភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ ក្រោមទុនវិនិយោគប្រមាណជា ២២៦លានដុល្លារអាមេរិក និងអាចបង្កើតការងារបានចំនួន ១៦៦៨កន្លែង។

ដោយឡែក ចំពោះក្រុមហ៊ុន Scheitec Sustainable Co.,Ltd វិញ ក្រុមប្រឹក្សាអភិវឌ្ឍន៍កម្ពុជាក៏បានអនុញ្ញាតឲ្យក្រុមហ៊ុនសាងសង់ស្ថានីយផលិតថាមពលអគ្គិសនីដើរដោយពន្លឺព្រះអាទិត្យ កម្លាំង៦០ មេហ្គាវ៉ាត់ ដែលមានទីតាំងវិនិយោគស្ថិតនៅភូមិអន្សក្តាម ឃុំស្នាអន្សា ស្រុកក្រគរ ខេត្តពោធិ៍សាត់ ក្រោមទុនវិនិយោគប្រមាណ ៥៨លានដុល្លារអាមេរិក និងអាចបង្កើតការងារបានចំនួន ៣៥កន្លែង។

ជាងនេះទៅទៀត ក្រុមហ៊ុនដដែល ក៏នឹងសាងសង់រោងចក្រផលិតថាមពលអគ្គិសនីដើរដោយពន្លឺព្រះអាទិត្យមួយកន្លែងទៀតស្ថិតនៅភូមិរមាស ឃុំតាំងក្រសាំង ស្រុកទឹកផុស ខេត្តកំពង់ឆ្នាំង ក្រោមទុនវិនិយោគប្រមាណ ៥៨លានដុល្លារអាមេរិក។ រោងចក្រនេះ មានកម្លាំងផលិតអគ្គិសនីបានដល់ទៅ៦០ មេហ្គាវ៉ាត់ និងអាចបង្កើតការងារបានចំនួន ៣៥កន្លែង។

គួររម្លឹកផងដែរថា ថ្មីៗនេះ CDC ក៏បានអនុម័តគម្រោងវិនិយោគតម្លៃជាង៣៦លានដុល្លារអាមេរិកនៅខេត្តព្រះសីហនុផងដែរ។ (អានបន្ថែម)