សម្ដេច ហ៊ុន សែន នឹងបើកការដ្ឋានស្ពានអាកាសផ្លូវជាតិលេខ៥ នៅឫស្សីកែវ ថ្ងៃទី៣១ មករានេះ

27 ខែមករា 2022
Uncategorized
6 មើល

គម្រោងស្ពានអាកាសថ្មី តាមបណ្ដោយផ្លូវជាតិលេខ៥ នៅខណ្ឌឬស្សីកែវ នឹងត្រូវបើកការដ្ឋានជាផ្លូវការ នៅថ្ងៃចន្ទទី៣១ មករា ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

ស្ពានអាកាសថ្មីនេះ ស្ថិតត្រង់ចំណុចប្រសព្វរវាងផ្លូវជាតិលេខ៥ និងស្ពានបេតុងអារមេខ្សែកាបឫស្សីកែវ ស្ថិតក្នុងភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ។

ស្ពានអាកាសនេះសាងសង់ឡើងដើម្បីជួយសម្រួលការកកស្ទះចរាចរណ៍តាមផ្លូវជាតិលេខ៥ និងចរាចរណ៍ពីផ្លូវជាតិលេខ៦ ដែលឆ្លងពីស្ពានមក។

គួរបញ្ជក់ថា ត្រង់ចំណុចនោះ រដ្ឋាភិបាលក៏កំពុងសង់ស្ពានឆ្លងទន្លេផងដែរ គឺស្ពានឫស្សីកែវ-ជ្រោយចង្វារ ដើម្បីជួយរំដោះចរាចរណ៍។ បច្ចុបន្ន ការដ្ឋានសម្រេចការសាងសង់បានប្រមាណ ៦៣,៧% ហើយ ដោយគ្រោងនឹងបញ្ចប់នឹងខែមីនា ឆ្នាំ ២០២៣ ខាងមុខ។ (អានបន្ថែម)

បច្ចុប្បន្ននេះទីក្រុងភ្នំពេញមានស្ពានអាកាសចំនួន ៥ រួចមកហើយ ដែលកំពុងដាក់ឱ្យប្រើប្រាស់ដូចជា ស្ពានអាកាសក្បាលថ្នល់ ស្ពានអាកាសស្ទឹងមានជ័យ ស្ពានអាកាស៧មករា ស្ពានអាកាស៥មករា (តិចណូ) និង ស្ពានអាកាសផ្សារដីហ៊ុយ។

លើសពីនេះ ស្ពានអាកាសចោមចៅសម្រេចបាន៩០% ហើយ ដោយគ្រោងបញ្ចប់នៅខែមីនាឆ្នាំក្រោយ ខណៈរដ្ឋក៏ត្រៀមបើកការដ្ឋានស្ពានអាកាសស្តុបផ្សារស៊ិនជូរីផ្លាហ្សា នៅខែមីនាផងដែរ។ (អានបន្ថែម និងបន្ថែម)