សួនសមិទ្ធផលនយោបាយឈ្នះឈ្នះចំនួន៤ នឹងកសាងឱ្យហើយចុងឆ្នាំនេះ

Proeksa Meas
4 ខែមិថុនា 2020
Uncategorized @km
297 មើល

សួនសមិទ្ធផលនយោបាយឈ្នះឈ្នះ ចំនួន៤ បន្ថែមទៀត នឹងត្រូវកសាងនៅបរិវេណវិមានឈ្នះឈ្នះ ដើម្បីអបអរសាទរខួបទិវានយោបាយឈ្នះឈ្នះ ដែលនឹងប្រព្រឹត្តទៅនៅខែ ធ្នូ ឆ្នាំ ២០២០ នេះ។ នេះបើយោងតាមការចុះផ្សាយព័ត៌មានផ្លូវការរបស់ក្រសួងការពារជាតិ ក្នុងថ្ងៃទី ០៤ ខែ មិថុនា នេះ។

នៅក្នុងកិច្ចប្រជុំក្រុមការងារសាងសង់វិមានឈ្នះឈ្នះនៅថ្ងៃទី០៣ ខែមិថុនា ឆ្នាំ២០២០នេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងក្រុមក្រុមការងារសាងសង់វិមានឈ្នះ ឈ្នះ ព្រមទាំងមន្ត្រីដែលពាក់ព័ន្ធ បានសម្រេចឱ្យធ្វើសួនចំនួន៤ គឺសួនឃឿនការពារជាតិ, សួនវិស័យរក្សាសន្តិភាព, សួនវិស័យសន្តិសុខសង្គមសាធារណៈ និងសួនប្រវត្តិកាលស្ថាបត្យកម្មវិមានឈ្នះឈ្នះ ក្នុងបរិវេណវិមានឈ្នះឈ្នះនេះ។

យោងតាមប្រសាសន៍រដ្ឋមន្ត្រីការពារជាតិថ្លែងក្នុងឱកាសនោះ សួនសមិទ្ធផលនីមួយៗ សុទ្ធតែមានអត្ថន័យខុសៗគ្នា។ សួនឃឿនការពារជាតិ ស្ថាបនាឡើងដើម្បីរំលឹកគុណដល់ កងយោធពលខេមរភូមិន្ទ។ សួនវិស័យរក្សាសន្តិភាព សាងសង់ឡើង ដើម្បីរំលឹកដល់សមិទ្ធផលរបស់កងកម្លាំងមួកខៀវកម្ពុជា ដែលចូលរួមបេសកកម្មរក្សាសន្តិភាព និងសកម្មភាពមនុស្សធម៌ ជាមួយអង្គការសហប្រជាជាតិ និងអង្គភាពកម្ចាត់មីន ស៊ីម៉ាក។ សួនប្រវត្តិកាលស្ថាបត្យកម្មវិមានឈ្នះឈ្នះ គឺដើម្បីបង្ហាញពីសមិទ្ធផលអ្នកដែលបានចូលរួមសាងសង់វិមានឈ្នះឈ្នះ។ ចំណែកឯទីបួន គឺសួនវិស័យសន្តិសុខសង្គម ដែលត្រូវកសាងឡើងដើម្បីបង្ហាញពីសមិទ្ធផលនានា របស់កងរាជអាវុធហត្ថ និងនគរបាលកម្ពុជា។

សម្ដេច បានបញ្ជាក់ថា ក្រោយសម្រេចឲ្យសាងសង់ សួនសមិទ្ធផលទាំង ៤ នេះ ក្រុមការងារនីមួយៗត្រូវពន្លឿនការងារសាងសង់សួនរបស់ខ្លួន ឲ្យបានរួចរាល់ ដើម្បីអបអរសាទរខួបទិវានយោបាយឈ្នះ ឈ្នះ រយៈពេល ៤៣ ឆ្នាំ ដែលនឹងប្រព្រឹត្តិធ្វើឡើងនៅថ្ងៃទី ២៩ ខែធ្នូ ខាងមុខនេះ។

គួររម្លឹកផងដែរថា កាលពីថ្ងៃទី៣០ ឧសភា ២០២០ ស្តូបអនុស្សាវរីយ៍នយោបាយឈ្នះ-ឈ្នះទំហំប្រមាណ ៨, ៨ ហិកតា ក្នុងខេត្តកោះកុងក៏បានបើកការដ្ឋានសាងសង់ផងដែ ក្នុងគោលបំណងរំលឹកគុណដល់វីរបុរសជំនាន់មុន ដែលបានលះបង់អាយុជីវិតក្នុងសម័យសង្រ្គាម៕

(អានបន្ថែម)