ស្ពានកោះប៉ែនដាក់សម្ពោធឲ្យប្រើប្រាស់ជាផ្លូវការ

Proeksa Meas
14 ខែមីនា 2018
Uncategorized
270 មើល

ស្ពានកោះប៉ែន ប្រភព: SPM Pageនៅព្រឹក ថ្ងៃទី១៤ ខែមីនា ឆ្នាំ២០១៨ នេះសម្តេចនាយករដ្ឋមន្ត្រី ហ៊ុន សែន បានអញ្ជើញជាអធិបតីសម្ពោធដាក់ឲ្យប្រើប្រាស់ជាផ្លូវការនូវស្ពានឆ្លងដៃទន្លេមេគង្គទៅកាន់កោះប៉ែន។ស្ពានកោះប៉ែននេះ មានបណ្តោយប្រវែង ៧៧៩ម៉ែត្រ ទទឹង ៩,២ម៉ែត្រ កម្ពស់ពី ២៣ ទៅ ២៤ម៉ែត្រ និង អាចផ្ទុកទម្ងន់បានចន្លោះពី ២០ ទៅ៣០តោន។ ស្ពាននេះឆ្លងកាត់ទន្លេមេគង្គពីភូមិព្រែកដើមចាន់ សង្កាត់សំបួរមាស ក្រុងកំពង់ចាម ទៅកាន់កោះកំពង់ត្រុំ ក្នុងភូមិសាស្ត្រ ឃុំកោះមិត្ត ស្រុកកំពង់សៀម ខេត្តកំពង់ចាម។ស្ពានកោះប៉ែនបានចាប់ផ្តើមសាងសង់កាលពីខែឧសភា ឆ្នាំ២០១១ ហើយគឺជាស្ពានដែលសាងសង់ដោយកូនខ្មែរសុទ្ធសាធ និងប្រើថវិកាផ្ទាល់របស់រាជរដ្ឋាភិបាលកម្ពុជាតម្លៃប្រមាណ ១៣លានដុល្លារអាមេរិក។សម្តេចនាយករដ្ឋមន្ត្រី ហ៊ុន សែន បានមានប្រសាសន៍ថា ៖ “ខ្ញុំមានមោទនភាពណាស់ដែល ប្រទេសកម្ពុជាឥឡូវនេះអាចកសាងស្ពានដោយខ្លួនឯងបាន ។ ខ្ញុំជឿជាក់ថានៅពេលអនាគតប្រសិនបើយើងទាំងអស់គ្នារួបរួមគ្នាយើងនឹងអាចកសាងអ្វីៗបានដោយខ្លួនឯងមិនត្រឹមតែស្ពាននេះទេ” ។សម្តេចបានបន្ថែមថាស្ពាននេះចាត់ទុកថាជាភាពជោគជ័យមួយរបស់កម្ពុជាយើងដែលបង្ហាញឱ្យពិភពលោកឃើញថាប្រទេសកម្ពុជាក៏កំពុងជួយអភិវឌ្ឍខ្លួនឯងផងដែរមិនមែនរង់ចាំតែជំនួយពីប្រទេសដទៃទេ”។ស្ពាននេះ ជាចំណងដៃដ៏ពិសិដ្ឋសម្រាប់បងប្អូនប្រជាពលរដ្ឋប្រមាណជា ២ម៉ឺនគ្រួសារនៅលើប្រជុំកោះដូចជាកោះប៉ែន, កោះមិត្ត និង កោះត្រុំជាដើម សម្រាប់ការធ្វើដំណើរ និងការដឹកជញ្ជូន ដែលពីមុនមកពួកគាត់ត្រូវធ្វើដំណើរដោយឆ្លងទូកដ និងឆ្លងសាឡាង។ជាពិសេសជាងនេះទៀត គឺក្រោយពេលមានស្ពាននេះហើយ តំបន់កោះប៉ែននឹងទាក់ទាញភ្ញៀវទេសចរណ៍បន្ថែមទៀត ព្រោះតំបន់នេះគឺជាកន្លែងទាក់ទាញទេសចរណ៍ស្រាប់។