អគារទីស្តីការថ្មីកម្ពស់១៨ជាន់ របស់ក្រសួងឧស្សាហកម្ម បានបញ្ចប់ការសាងសង់១០០%ហើយ

26 ខែកក្កដា 2023
ព័ត៌មានក្នុងស្រុក
9 មើល

អគារទីស្តីការថ្មីនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កម្ពស់ ១៨ជាន់ តាមបណ្តោយមហាវិថីព្រះនរោត្តម បានបញ្ចប់ការសាងសង់ហើយ។

នេះបើតាមពិធីប្រគល់ទទួលកាលពីថ្ងៃទី២៥ ខែកក្កដា ឆ្នាំ២០២៣ ក្រោមអធិបតីភាពឯកឧត្ដមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

បើតាមលោក ឃុន សេងផេង តំណាងក្រុមហ៊ុនសាងសង់ គឺក្រុមហ៊ុន ឃុន សៀ អ៊ីមផត អ៊ិចផត បានបញ្ជាក់ថា អគារទីស្តីការថ្មីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍នេះ មានកម្ពស់ ១៨ជាន់ ត្រូវបានបើកការដ្ឋានសាងសង់កាលពីថ្ងៃទី១២ ខែធ្នូ ឆ្នាំ២០១៩ និងបញ្ចប់ការសាងសង់នៅថ្ងៃទី២២ ខែកក្កដា ឆ្នាំ២០២៣កន្លងទៅនេះ។

លោក ឃុន សេងផេង បានបញ្ជាក់បន្ថែមថា អគារទីស្តីការថ្មីនេះត្រូវបានសាងសង់ឡើងប្រើរយៈពេលអស់ជាង៣ឆ្នាំ ក្រុមហ៊ុនរបស់លោក និងក្រុមហ៊ុនដៃគូគឺក្រុមហ៊ុន ម៉ាទីន ឌីហ្សាញ &សឹកសេស ប៊ីល ទទួលបានការគាំទ្រជានិច្ចទាំងផ្នែកពិគ្រោះយោបល់និងបច្ចេកទេសពីគណៈកម្មការសាងសង់របស់ក្រសួង ក្នុងកិច្ចសហការនិងយោគយល់គ្នាយ៉ាងល្អប្រសើរ។

សូមបញ្ជាក់ថា អគារទីស្តីការថ្មីរបស់ក្រសួងនេះ គឺមានជណ្តើរយោងរថយន្តចំនួន ០២គ្រឿង អាចចតរថយន្តនៅជាន់ទី១ ទី២ និងទី៣ បានចំនួន ៤៥គ្រឿង ។ ចំពោះថ្នាក់ដឹកនាំ ជារដ្ឋលេខាធិការ និងអនុរដ្ឋលេខាធិការ ក៏ត្រូវបានរៀបចំពិធីចាប់ឆ្នោត ដើម្បីជ្រើសរើសជាន់ និងបន្ទប់ធ្វើការផងដែរ ។

- Video Advertisement -