អាកាសយានដ្ឋានអន្តរជាតិសៀមរាបអង្គរ សម្ពោធដាក់ឱ្យប្រើប្រាស់ផ្លូវការហើយ

• 16 ខែ​វិច្ឆិកា 2023
• ព័ត៌មានក្នុងស្រុក
• 7 មើល

អាកាសយានដ្ឋានអន្តរជាតិសៀមរាបអង្គរ (Siem Reap Angkor International Airport) ត្រូវបានសម្ពោធដាក់ឱ្យប្រើប្រាស់ជាផ្លូវការ ក្រោមអធិបតីភាពសម្តេច ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី១៦ វិច្ឆិកា ២០២៣។

នាឱកាសនោះដែរ សម្តេចបានសង្កត់ធ្ងន់ពីចក្ខុវិស័យវែងឆ្ងាយនៃការសម្រេចចិត្តប្តូរពីព្រលានយន្តហោះចាស់ដែលមានចម្ងាយត្រឹមតែ ៥គីឡូម៉ែត្រប៉ុណ្ណោះ ពីក្រុងសៀមរាប មកសង់ព្រលានយន្តហោះថ្មី មានចម្ងាយរហូតដល់ ៥០គីឡូម៉ែត្រ ពីក្រុងសៀមរាប នោះក៏ព្រោះតែរដ្ឋាភិបាលបានឈរលើគោលដៅសំខាន់ពីរ គឺអភិវឌ្ឍន៍ និងអភិរក្ស ដើម្បីចូលរួមថែទាំសម្បត្តិដូនតាខ្មែរឱ្យបានយូរអង្វែង ។

សម្តេចបន្តថា អាកាសយានដ្ឋានអន្តរជាតិសៀមរាបអង្គរថ្មីនេះ នឹងក្លាយជាកាលានុវត្តភាពប្រកបដោយសក្តានុពលដ៏ខ្លាំងក្លា និងសំខាន់សម្រាប់​វិស័យទេសចរណ៍ខេត្តសៀមរាប ដែលជាគោលដៅទេសចរណ៍ដ៏សំខាន់​របស់កម្ពុជា និយាយដោយឡែក ព្រមទាំងវិស័យទេសចរណ៍ និងវិស័យសេដ្ឋកិច្ច​នៅទូទាំងប្រទេសនិយាយជារួម។

គួររំលឹកថា មុនពេលសម្ពោធបើកជាផ្លូវការ អាកាសយានដ្ឋានអន្តរជាតិសៀមរាបអង្គរនេះ បានបើកដំណើរការបណ្តោះអាសន្ន បានរយៈពេល១ខែហើយ កាលពីថ្ងៃទី១៦ តុលា ២០២៣ កន្លងទៅនេះហើយ។​ (អានបន្ថែម)

ក្នុងអំឡុងពេល១ខែនេះ ទទួលបានជើងហោះហើរមកកាន់ខេត្តសៀមរាបចំនួន ៣៤ជើងក្នុង១ថ្ងៃ។ ចំនួនភ្ញៀវបរទេសទិញសំបុត្រចូលទស្សនាតំបន់រមណីយដ្ឋានអង្គរមានជាង៣ពាន់នាក់ក្នុង១ថ្ងៃ ដែលពីមុនមានត្រឹមតែ១ពាន់នាក់ប៉ុណ្ណោះក្នុង១ថ្ងៃ តែនៅមុនពេលវិបត្តិកូវីដ១៩ ចំនួនភ្ញៀវបរទេសដែលទិញសំបុត្រចូលទស្សនាតំបន់រមណីយដ្ឋានអង្គរមានដល់ជាង ៨ពាន់ ទៅ ៩ពាន់នាក់ក្នុង១ថ្ងៃ ឯណោះ។ រយៈពេល ១០ខែ ឆ្នាំ២០២៣នេះ កម្ពុជារកចំណូលបានចំនួន ២៧.៨៨២.៤៣៥ដុល្លារ ពីការលក់សំបុត្រចូលទស្សនារមណីយដ្ឋានអង្គរទៅភ្ញៀវទេសចរបរទេសចំនួន ៦០២.៥៧០នាក់។ (អានបន្ថែម)

• Road and Infrastructure