ឧកញ៉ានួនប្ញទ្ធី៖ គួរវិនិយោគលើអចលនទ្រព្យឲ្យហើយ ពេលចប់កូវីដទៅ ចំណេញអូតូមេទិច

Proeksa Meas
15 ខែមិថុនា 2020
ព័ត៌មានអចលនទ្រព្យ
62 មើល

ក្នុងដំណាក់កាលកូវីដ ១៩ គឺជាពេលវេលាល្អសម្រាប់វិនិយោគលើវិស័យអចលនទ្រព្យនៅកម្ពុជា ដោយសារតែតម្លៃនៅសមរម្យល្អ ចំណែកឯការលក់ចេញវិញនឹងចំណេញដោយដោយស្វ័យប្រវត្តិ បន្ទាប់ពីស្ថានភាពកូវីដ ១៩ គ្រាន់បើឡើងវិញ។

នេះបើយោងតាម ឧកញ៉ា នួន ឫទ្ធី អគ្គនាយកក្រុមហ៊ុន Khmer Appraisal Foundation (KFA) ក្នុងកិច្ចសម្ភាសន៍ជាមួយនឹងសារព័ត៌មាន FRESH NEWS ជុំវិញប្រធានបទ៖ «វិស័យអចលនទ្រព្យកម្ពុជា មុនពេល ក្នុងពេល និងក្រោយពេលជំងឺកូវីដ១៩» កាលពីថ្ងៃទី ១៥ មិថុនា ២០២០នេះ។

ឧកញ៉ា បានឲ្យដឹងថា វិបត្តិកូវីដនេះមិនមែនជាវិបត្តិមួយដែលអូសបន្លាយយូរទេ ដូច្នេះអ្នកវិនិយោគត្រូវតែត្រៀមរួចជាស្រេចទាំងស្មារតី ទាំងសមត្ថភាព និងលទ្ធភាព ដើម្បីបន្តការវិនិយោគលើវិស័យអចលនទ្រព្យនេះបន្តទៀត។

ឧកញ៉ាបានបន្តថា៖ «បងប្អូនដែលវិនិយោគលើវិស័យអចលនទ្រព្យគួរតែវិនិយោគបន្ត មានលទ្ធភាពគួរតែវិនិយោគ។ អ្វីដែលយើងគួរតែវិនិយោគ គឺពេលនេះគឺជាពេលដ៏ល្អសម្រាប់វិនិយោគបំផុត។ តម្លៃអចលនទ្រព្យនៅតែល្អ អ្នកលក់ត្រូវការលក់ អ្នកទិញគួរតែទិញនៅពេលនេះ។ ពេលនេះយើងអាចចំណេញបានពី ៣០ ទៅ ៤០ ភាគរយ នៅពេលចប់កូវីដវិញ យើងនឹងចំណេញអូតូមេតិច។»

ឧកញ៉ាបានមានប្រសាសន៍ទៀតថា៖ «តែពេលទិញត្រូវមើលលើទីតាំង មើលលើឯកសារគតិយុត្តិ គម្រោង គឺគម្រោងដែលនៅកៀកនឹងគម្រោង ដែលគេគ្រោងពង្រីក។ ឧទាហរណ៍ ប្រមុខរាជារដ្ឋាភិបាល លោកនឹងរៀបចំខេត្តនៅភូមិភាគឦសាន ជាប៉ូលទី៤ នេះជាគម្រោង។ គម្រោងមិនមែនយើងទៅទិញដីព្រៃ ដីបរិស្ថាន ដីហាមឃាត់ ដីឧទ្យាន នោះមិនមែនជាការចំណេញទេ។ យើងទិញនូវដីដែលស្របច្បាប់ ដីមានតម្លៃសមរម្យ ហើយយើងរង់ចាំឱកាសក្នុងការអភិវឌ្ឍ។»

អ្នកជំនាញផ្សេងទៀតក៏បានព្យាករថា ទីផ្សារវិស័យសំណង់ និងអចលនទ្រព្យនឹងមានសន្ទុះឡើងវិញក្នុងឆ្នាំ២០២១ ទោះបីជាទីផ្សារនៃវិស័យទាំងពីនេះមានការធ្លាក់ចុះជាបន្តបន្ទាប់ កាលពីចុងឆ្នាំ ២០១៩ គួបផ្សំជាមួយនឹងឥទ្ធិពលនៃ ឲការរីករាលដាលនៃជំងឺកូវីដ១៩ នាពេលបច្ចុប្បន្ននេះ៕ (អានបន្ថែម)

- Video Advertisement -