7-Eleven លើកផ្លាកនៅពីរទីតាំងក្នុងក្រុងភ្នំពេញ ដោយប្រកាសថានឹងបើកឆាប់ៗ

8 ខែមេសា 2021
ព័ត៌មានអចលនទ្រព្យ
12 មើល

ផ្សារមីនីម៉ាតដ៏ពេញនិយម 7-Eleven កាលពីថ្មីៗនេះ បានលើកផ្លាកនៅទីតាំង ២កន្លែង ក្នុងក្រុងភ្នំពេញ ជាមួយនឹងសេចក្ដីប្រកាសមុខការដ្ឋានដែលសរសរថា «ជួបគ្នាទីនេះ ក្នុងពេលឆាប់ៗ»។

បើសង្កេតតាមទីតាំងជាក់ស្ដែង សាខាទី ១ គឺស្ថិតនៅតាមបណ្ដោយផ្លូវជាលេខ ៥ ម្ដុំព្រែកព្នៅ ឯមួយសាខាមួយទៀត ស្ថិតនៅតាមបណ្ដោយផ្លូវជាលេខ៦ ម្ដុំព្រែកលាប។

លើសពីនេះ ពីក្រោយផ្លាកដែលសរសរថា «ជួបគ្នាទីនេះ ក្នុងពេលឆាប់ៗ» ក៏ឃើញថាមានការដ្ឋានកំពុងសាងសង់ផងដែរ។ ចំណុចនេះអាចបញ្ជាក់ថា ភ្នំពេញអាចនឹងមានផ្សារមីនីម៉ាត 7-Eleven ទាំងពីរសាខាក្នុងពេលឆាប់ៗខាងមុខនេះ។

យ៉ាងណាមិញ បើយោងតាមសេចក្ដីប្រកាសចុងក្រោយរបស់ក្រុមហ៊ុន CP All Plc ដែលក្រុមហ៊ុន Franchise ផ្សារ 7-Eleven មកកម្ពុជា កាលពីខែ វិច្ឆិកា ឆ្នាំ២០២០ ទោះកំពុងមានវិបត្តិកូវីដក្ដី ក្រុមហ៊ុននៅតែបន្តផែនការបើកសាខានៅកម្ពុជាឱ្យបានក្នុងឆ្នាំ២០២១ នេះ។

គួរបញ្ជាក់ផងដែរថា ផែនការប្រកាសថានឹងបើក 7-Eleven នៅកម្ពុជា ត្រូវបានធ្វើឡើងតាំងពីខែ ឧសភា ឆ្នាំ២០២០ មកម៉្លេះ។ (អានបន្ថែម)

ទាក់ទិននឹង ផ្សារមីនីម៉ាតដ៏ពេញនិយមមួយនេះ គិតត្រឹមចុងឆ្នាំ ២០២០ 7-Eleven មានសាខានៅប្រទេសជប៉ុនជាង ២ ម៉ឺនសាខា នៅប្រទេសថៃ ជាង១ម៉ឺនសាខា និងកូរ៉េជាង ១ម៉ឺនសាខា ក៏ដូចជានៅប្រទេសដទៃទៀតសរុប ១៨ ប្រទេស។