តើសំណង់បែបណា តម្រូវឲ្យមានការវាយតម្លៃផលប៉ះពាល់បរិស្ថាន?

• 6 ខែ​កក្កដា 2019
• Uncategorized
• 7 មើល

ដើម្បីឲ្យការគ្រប់គ្រងសំណង់ ដែលផ្តោតទៅលើការផ្សារភ្ជាប់បរិស្ថាន និងសង្គម ក្រសួងបរិស្ថាន បញ្ជាក់ថា គ្រប់សំណង់ធំៗ គឺតម្រូវឲ្យមានការវាយតម្លៃហេតុប៉ះពាល់បរិស្ថានជាមុនសិន មុននឹងស្នើសុំលិខិតសាងសង់ ពីក្រសួងគ្រប់គ្រងដែនដី នគររូបនីយកម្ម និងសំណង់។

បើតាមក្រសួងបរិស្ថាន នៅក្នុងគម្រោងសំណង់ មុននឹងការចេញលិខិតអនុញ្ញាតឲ្យមានការសាងសង់ គឺគម្រោងខ្លះត្រូវមានភ្ជាប់មកជាមួយនូវលទ្ធផលនៃការវាយតម្លៃហេតុប៉ះពាល់បរិស្ថាន ថាតើសំណង់ ប្រភេទណាដែលត្រូវឆ្លងកាត់ ការវាយតម្លៃហេតុប៉ះពាល់បរិស្ថាន។

យោងតាមការប្រកាសរបស់ក្រសួងបរិស្ថាន គឺសំណង់ដែលត្រូវឆ្លងកាត់ការវាយតម្លៃហេតុប៉ះពាល់បរិស្ថាន និងសង្គមនេះ មានសំណង់ដែលពាក់ព័ន្ធជាមួយនឹងហេដ្ឋារចនាសម្ព័ន្ធ ដូចជា ការអភិវឌ្ឍន៍ទីក្រុងគ្រប់ទំហំ តំបន់ឧស្សាហកម្មគ្រប់ទំហំ សំណង់ស្ពានថ្នល់ទ្រទម្ងន់លើសពី ៣០តោនឡើង។

ចំណែក សំណង់អគារដែលមានកំពស់លើសពី១២ជាន់ឡើងទៅ ឬមួយផ្ទៃក្រឡាចាប់ពី៨ពាន់ម៉ែត្រឡើងទៅ ភោជនីដ្ឋានដែលមានចំនួនលើសពី ៥០០កៅអី សំណង់សណ្ឋាគារលើសពី៦០បន្ទប់ សំណង់សណ្ឋាគារតំបន់ឆ្នេរគឺពី៤០បន្ទប់ ហើយសំណង់ផ្លូវជាតិដែលលើសពី១០០គីឡូម៉ែត្រ សំណង់ផ្លូវដែកគ្រប់ទំហំ សំណង់កំពង់ផែគ្រប់ទំហំ រួមនឹងសំណង់អាកាសយានដ្ឋានគ្រប់ទំហំគឺត្រូវឆ្លងកាត់ការវាយតម្លៃហេតុប៉ះពាល់បរិស្ថាន។

ឯកឧត្តម នេត្រ ភក្រ្តា រដ្ឋលេខាធិការ និងជាអ្នកនាំពាក្យក្រសួងបរិស្ថាន នៅក្នុងសន្និសីតកាសែត កាលពីថ្ងៃ សុក្រ បានលើកឡើងថា ការវាយតម្លៃហេតុផលប៉ះពាល់បរិស្ថាននេះត្រូវមានការចូលរួមពីគ្រប់អន្តរក្រសួងដែលពាក់ព័ន្ធ។

ឯកឧត្តម នេត្រ ភក្រ្តា ថ្លែងថា៖ «ក្នុងនីតិវិធីវាយតម្លៃហេតុប៉ះពាល់បរិស្ថាននេះ ទីមួយត្រូវមានការស្នើសុំច្បាប់ នៅក្រសួងបរិស្ថាន។ បន្ទាប់ក្រុមហ៊ុនដែលធ្វើការស្នើសុំ ត្រូវមានក្រុមហ៊ុនទីប្រឹក្សាមួយ ដើម្បីរៀបចំ និងវាយតម្លៃ សិក្សា ហើយរបាយការណ៍នេះត្រូវយកទៅដាក់មកនាយកដ្ឋាន វាយតម្លៃហេតុប៉ះពាល់បរិស្ថានរបស់ក្រសួង»។

ឯកឧត្តម បន្ថែមថា ក្រសួងចាត់មន្រ្តីជំនាញទៅធ្វើការសិក្សាបន្ថែមទៅលើហ្នឹង ដើម្បីផ្ទៀងផ្ទាត់អំពីរបាយការណ៍ ដែលក្រុមហ៊ុនទីប្រឹក្សារកឃើញ និងមន្រ្តីជំនាញរបស់យើងរកឃើញ ថាតើទិន្នន័យដែលដាក់មកនេះ វាត្រឹមត្រូវ ដែរឬទេ ហើយមានផលប៉ះពាល់អ្វីខ្លះ៕