ផលិតផលខ្មែរ ៥០% នឹងដាក់លក់ក្នុងហាង 7-Eleven ដែលគ្រោងបើកអាជីវកម្មដំបូង នៅកម្ពុជាចុងឆ្នាំនេះ

• 13 ខែ​ឧសភា 2020
• ព័ត៌មានអចលនទ្រព្យ
• 9 មើល

ឯកឧត្តម អ៊ូក សោភ័ណ ឯកអគ្គរាជទូតកម្ពុជា ប្រចាំប្រទេសថៃ បានស្នើអោយក្រុមហ៊ុន CP ALL ប្រើប្រាស់បុគ្គលិកខ្មែរឱ្យបានច្រើន និងដាក់លក់ផលិតផលខ្មែរឱ្យបាន ៥០% ។

ការស្នើសុំនេះ ត្រូវបាន ឯកឧត្តមឯកអគ្គរាជទូត ថ្លែងប្រាប់ លោក ឆៃរោច ទីវ៉ាត់មុនចាក់រើន អនុប្រធានជាន់ខ្ពស់ក្រុមហ៊ុន CP ALL Plc. និងជាអគ្គនាយកក្រុមហ៊ុន CP All Cambodia ទៅលើ គម្រោងវិនិយោគហាងលក់ទំនិញ 7-Eleven នៅក្នុងប្រទេសកម្ពុជា នារសៀលថ្ងៃ ច័ន្ទ ទី១១ ខែឧសភា ឆ្នាំ ២០២០ នាទីក្រុងបាងកក ប្រទេសថៃ។

នៅក្នុងជំនួបនោះ ឯកឧត្តមឯកអគ្គរាជទូត បានសម្តែងការអបអរចំពោះក្រុមហ៊ុន CP ALL ដែលបានទទួលសិទ្ធិធ្វើអាជីវកម្មហ្វ្រេនឆាយពីក្រុមហ៊ុន 7-Eleven Inc. នៅជប៉ុន និងសហរដ្ឋអាមេរិក និងបានស្នើសុំក្រុមហ៊ុនគោរពពាក្យសន្យា គឺថានឹងប្រើប្រាស់បុគ្គលិកខ្មែរឱ្យបានច្រើន និងដាក់លក់ផលិតផលខ្មែរឱ្យបាន ៥០%។

ឆ្លៀតក្នុងឱកាសនោះដែរ លោក ឆៃរោច បានបង្ហាញពីការប្តេជ្ញាចិត្តរបស់ក្រុមហ៊ុន ក្នុងការអនុវត្តពាក្យសន្យាខាងលើ។ ភ្ជាប់ជាមួយគ្នានោះ លោកក៏បានស្នើសុំស្ថានទូតកម្ពុជា ជួយសម្របសម្រួលផ្តល់ព័ត៌មានអំពីផលិតផលខ្មែរ ជាពិសេសអាហារកែច្នៃ និងអាហារក្រៀម ដើម្បីក្រុមហ៊ុនសិក្សា និងដាក់បញ្ចូលក្នុងបញ្ជីមុខទំនិញសម្រាប់លក់នៅក្នុងសាខាដំបូង ដែលគ្រោងនឹងបើកនៅចុងឆ្នាំនេះ។

គួរបញ្ជាក់ដែរថា ខាងស្ថានទូតកម្ពុជា បានបញ្ជាក់ប្រាប់ នៅក្នុងទំព័រហ្វេសផ្លូវការរបស់ខ្លួនដែរថា ដំណាក់កាលដំបូង ក្រុមហ៊ុន CP ALL នឹងធ្វើការវិនិយោគដោយខ្លួនឯង ១០០% ដើម្បីបង្កើតហាង 7-Eleven ឱ្យបាន ៧០០ សាខា នៅកម្ពុជា ជាមុនសិន។ បន្ទាប់មកទើបលក់ Franchise ដល់ធុរជនតាមក្រោយ៕ (អានបន្ថែម)

• ធុរកិច្ច និងទីផ្សារ
• ធុរកិច្ច និងទីផ្សារ