ក្រសួងគ្រោងបង្កើតស្ថានីយសាករថយន្តអគ្គិសនីលើផ្លូវល្បឿនលឿន និងតាមខេត្តក្រុង ១៥ កន្លែង

25 ខែមករា 2022
Uncategorized
4 មើល

ក្រសួងសាធារណការ និងដឹកជញ្ជូន គ្រោងបង្កើតស្ថានីយសាករថយន្តអគ្គិសនី នៅតាមដងផ្លូវ និងផ្លូវល្បឿនលឿន ក្នុងខេត្តក្រុងនានា ចំនួន១៥ ទីតាំង ដើម្បីជំរុញការប្រើប្រាស់រថយន្តអគ្គិសនីនៅកម្ពុជាឱ្យច្រើនជាងមុន ទិសដៅកាត់បន្ថយការបំភាយឧស្ម័នកាបូន។

គម្រោងនេះ ត្រូវបានលើកឡើងនៅក្នុងកិច្ចប្រជុំរវាងរដ្ឋមន្ត្រីក្រសួងសាធារណការ និងដឹកជញ្ជូន ឯកឧត្តម ស៊ុន ចាន់ថុល និងគណៈប្រតិភូសហព័ន្ធឧស្សាហកម្មយានយន្តកម្ពុជា ដឹកនាំដោយលោកបណ្ឌិត តាន់ មុនីវណ្ណ ប្រធានសហព័ន្ធ និងជាអនុប្រធានសភាពាណិជ្ជកម្មកម្ពុជា កាលពីថ្ងៃទី២៤ ខែមករា។

កិច្ចប្រជុំក៏បានចូលរួមដោយក្រុមហ៊ុនរថយន្តធំៗ ដូចជា ក្រុមហ៊ុន Mercedes និងក្រុមហ៊ុន HGB Group ផងដែរ។

ក្នុងកិច្ចប្រជុំ ឯកឧត្តម ស៊ុន ចាន់ថុល បានជំរុញ និងលើកទឹកចិត្តឱ្យជំរុញឱ្យសហព័ន្ធ និងក្រុមហ៊ុនទាំងអស់ ជួយគ្នានាំចូល និងជំរុញការប្រើប្រាសរថយន្តEV បន្ថែម។

ឯកឧត្តម ថា ដើម្បីជំរុញរឿងនេះ ក្រសួងក៏កំពុងរៀបចំសេចក្តីព្រាងគោល នយោបាយដឹកជញ្ជូនផ្លូវគោក ដើម្បីជំរុញការប្រើប្រាស់រថយន្តដើរដោយថាមពលអគ្គិសនី (EV) ផងដែរ។

ជាក់ស្ដែង ក្រសួងកំពុងសហការជាមួយUNDP សាងសង់ស្ថានីយសាករថយន្តEV ៥ កន្លែង ទូទាំងខេត្តក្រុង ។ លើសពីនេះ ក្រសួងក៏កំពុងសហការជាមួយក្រុមហ៊ុនឯកជន សាងសង់ស្ថានីយសាកលើផ្លូវល្បឿនលឿន និង១០ទីតាំងផ្សេងទៀត ផងដែរ។

គួរបញ្ជាក់ថា បើតាមរបាយការណ៍របស់ CBRE (Cambodia) ការប្រើប្រាស់រថយន្ត EV នឹងរួមចំណែកប្រមាណ ៣០% នៃការលក់រថយន្តថ្មីក្នុងរយៈពេល២៤ខែខាងមុខនៅកម្ពុជា។

- Video Advertisement -