សហគ្រាសផលិតកែវក្រដាស បំពង់បឺត ឆ្នៃពីម្សៅអង្ករ តម្លៃជាង៥លានដុល្លារ ដាក់ឲ្យដំណើរការហើយ

20 ខែកញ្ញា 2021
Uncategorized
10 មើល

សហគ្រាស ផលិតកែវក្រដាស និងបំពង់បឺត តម្លៃជាង៥លានដុល្លារអាមេរិក ដែលស្ថិតនៅលើទឹកដីស្រុកក្រគរ ខេត្តពោធិ៍សាត់ ត្រូវបានប្រកាសដាក់សម្ពោធឱ្យប្រើប្រាស់ជាផ្លូវការហើយ កាលថ្ងៃទី១៩ ខែកញ្ញា ឆ្នាំ២០២១ ក្រោមវត្តមាន ឯកឧត្តម ម៉ៅ ធនិន អភិបាលខេត្តពោធិ៍សាត់។

នាឪកាសនោះ លោកជំទាវ ទិត សុខុម ស្ថាបនិកសហគ្រាស TK & D បានឱ្យដឹងថា ដោយសង្កេតឃើញតាមបណ្តាប្រទេសជឿនលឿនមួយចំនួន បានយកចិត្តទុកដាក់ខ្ពស់ទៅលើបញ្ហាសុខភាព អនាម័យ និងបរិស្ថាន ដោយមានទឹកចិត្តស្រលាញ់ជាតិផងនោះ ទើបបង្កើតសហគ្រាសនេះឡើង ដើម្បីការពារបរិស្ថាន និងសេដ្ឋកិច្ចកម្ពុជា។

លោកជំទាវបន្ថែមថា សហគ្រាស TK & D នឹងធ្វើការផលិតកែវក្រដាស និងបំពង់បឺត ធ្វើពីម្សៅអង្ករ ម្សៅពោត និងម្សៅដំឡូង សម្រាប់ផ្គត់ផ្គង់ទីផ្សារក្នុងស្រុក ដោយមិនប្រើសារធាតុគីមីធ្វើឱ្យប៉ះពាល់ដល់សុខភាព និងបរិស្ថាន ជាពិសេសកាត់បន្ថយកាកសំណល់ប្លាស្ទិក បង្កើតភាពបៃតងនៅកម្ពុជា។

ក្នុងឱកាសនោះដែរ ឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ បង្ហាញការគាំទ្រចំពោះការវិនិយោគនេះ និងសូមស្នើដល់សហគ្រាស ឱ្យទទួលទិញវត្ថុធាតុដើមផ្ទាល់ពីកសិករក្នុងខេត្តធ្វើការដាំដុះ និងប្រមូលផលបាន សម្រាប់ផ្គត់ផ្គង់ក្នុងតម្រូវការផលិត។

គួរបញ្ជាក់ថា សហគ្រាសផលិតកែវក្រដាស និងបំពង់បឺតនេះ បង្កើតឡើងក្រោមទុនវិនិយោគប្រមាណជាង៥លានដុល្លារសហរដ្ឋអាមេរិក ហើយត្រូវសាងសង់ឡើងនៅលើផ្ទៃដីប្រមាណជាង២ហិកតា ដែលស្ថិតក្នុងភូមិតាកែវក្រោម ឃុំបឹងកន្ទួត ស្រុកក្រគរ ខេត្តពោធិ៍សាត់។ សហគ្រាសក៏អាចបំពេញតម្រូវការទីផ្សារពលកម្ម ជូនប្រជាពលរដ្ឋកម្ពុជាបានប្រមាណជាង១០០នាក់ឯណោះ៕

គួរបញ្ជាក់ថា កាលពីពេលថ្មីៗនេះ រដ្ឋាភិបាលក៏ទើបអនុម័តឱ្យក្រុមហ៊ុន RMA (Cambodia) Plc ដែលជាក្រុមហ៊ុនចែកចាយរថយន្ត ម៉ាក Ford នៅកម្ពុជា វិនិយោគ២១ លានដុល្លារ បង្កើតរោងចក្រដំឡើងរថយន្ត Ford ថ្មីមួយ នៅខេត្តពោធិ៍សាត់ផងដែរ។ (អានបន្ថែម)

- Video Advertisement -