កូរ៉េខាងត្បូង នឹងជួយបង្កើតមជ្ឈមណ្ឌលកែច្នៃម្ហូបអាហារនៅកម្ពុជា

26 ខែតុលា 2022
Uncategorized
10 មើល

វិទ្យាស្ថានគ្រប់គ្រងម្ហូបអាហារកូរ៉េ គ្រោងជួយបង្កើតមជ្ឈមណ្ឌលកែច្នៃម្ហូបអាហារនៅកម្ពុជា ដើម្បីលើកកម្ពស់ការផលិតចំណីអាហារ និងចូលរួមចំណែកកាត់បន្ថយការនាំចូលពីបរទេស។

គម្រោងបង្កើតមជ្ឈមណ្ឌលនេះ ត្រូវបានលើកយកពិភាក្សា ក្នុងកិច្ចប្រជុំមួយរវាង ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងលោក Kim Young Chanនាយកគ្រប់គ្រងគម្រោង នៃវិទ្យាស្ថាន គ្រប់គ្រងម្ហូបអាហារកូរ៉េ នៅទីស្តីការក្រសួង កាលពីពេលថ្មីៗនេះ។

ក្នុងជំនួបខាងលើនេះ លោក Kim Young បានលើកឡើងថា ការសាងសង់ FTC នៅកម្ពុជា គឺដើម្បីពង្រឹងសមត្ថភាពប្រកួតប្រជែងជាសកលនៃឧស្សាហកម្មចំណីអាហារ និងពង្រឹងសមត្ថភាព ស្រាវជ្រាវ និងអភិវឌ្ឍន៍ (R&D) និងវិទ្យាសាស្ត្រ បច្ចេកវិទ្យា និងនវានុវត្តន៍ ក្នុងវិស័យកែច្នៃចំណីអាហារ។

លោក Kim Young បន្តថា គោលដៅរបស់គម្រោងនេះ មានរយៈពេលវែង ៥ឆ្នាំ ដោយអនុវត្តចាប់ពីខែឧសភា ឆ្នាំ ២០២៣ ដល់ចុងឆ្នាំ ២០២៧។

សម្រាប់ការសាងសង់អគារ FTC នេះ ឯកឧត្តម ចម ប្រសិទ្ធ មានប្រសាសន៍ថា ក្រសួង នឹងផ្តល់ដីទំនេរ ដើម្បីសាងសង់ និងអាចប្រើប្រាស់ចំណែកណាមួយនៃអគារ ៧ ជាន់ទាំង ២ របស់អគ្គនាយកដ្ឋាន និងវិទ្យាស្ថានជាតិ វិទ្យាសាស្ត្របច្ចេកវិទ្យា និងនវានុវត្តន៍របស់ក្រសួង ។

- Video Advertisement -