រដ្ឋកំណត់ឱ្យម្ចាស់អាជីវកម្មបញ្ចាំ និងប្រាតិភោគ ត្រូវប្រើទម្រង់របាយការណ៍ថ្មីជាកំហិត

• 8 ខែ​ធ្នូ 2022
• ព័ត៌មានអចលនទ្រព្យ
• 7 មើល

និយ័តករអាជីវកម្មអចលនវត្ថុ និងបញ្ចាំ តម្រូវឱ្យម្ចាស់ក្រុមហ៊ុន និងសហគ្រាស ដែលបានទទួលអាជ្ញាបណ្ណប្រកបអាជីវកម្មបញ្ចាំ និងប្រាតិភោគដោយអនុប្បទាន ត្រូវតែប្រើប្រាស់ទម្រង់របាយការណ៍ប្រចាំខែ ​និងរ​បាយការណ៍ហិរញ្ញវត្ថុប្រចាំឆ្នាំថ្មី ចាប់ពីថ្ងៃទី០១ ខែមករា ឆ្នាំ២០២៣ នេះតទៅ។

នេះបើតាមសេចក្តីជូនដំណឹងរបស់និយ័តករអាជីវកម្មអចលនវត្ថុ និងបញ្ចាំ ចុះថ្ងៃទី១៤ ខែវិច្ឆិកា ឆ្នាំ២០២២។

ម្ចាស់ក្រុមហ៊ុន និងសហគ្រាសទាំងអស់ ត្រូវបំពេញកាតព្វកិច្ចធ្វើរបាយការណ៍ដូចមានកំណត់ក្នុងប្រកាសលេខ ០៣០ សហវ.​ប្រក ចុះថ្ងៃទី១៣ ខែមករា ឆ្នាំ២០១៧ ស្ដីពី ការគ្រប់គ្រងអាជីវកម្មទទួលបញ្ចាំ និងទទួលប្រាតិភោគដោយអនុប្បទាន ដោយប្រើប្រាស់ទម្រង់របាយការណ៍ថ្មីដែលបានកំណត់ដោយនិយ័តករ។

បន្ថែមពីនេះ ក្រុមហ៊ុនទាំងអស់ ត្រូវធ្វើការទំនាក់ទំនង និងបញ្ជូនរបាយការណ៍មកនិយ័តករដោយផ្ទាល់ ដែលមានអាសយដ្ឋានស្ថិតនៅអគារ អ.ស.ហ.លេខ១៦៨F ជាន់ទី៧ ផ្លូវលេខ៥៩៨ សង្កាត់ច្រាំងចំរោះទ ខណ្ឌឬស្សីកែវ រាជធានីភ្នំពេញ ឬ តាមរយៈប្រព័ន្ធ Telegram ដែលមានទូរស័ព្ទលេខ ០៧៨ ២៦៦ ២៦៨ នៅរៀងរាល់ម៉ោងធ្វើការ ចាប់ពីថ្ងៃទី០១ ខែមករា ឆ្នាំ២០២៣ នេះតទៅ។

យ៉ាងណាមិញ ម្ចាស់អាជីវកម្ម ឬអតិថិជន ដែលមានបំណងចង់បើក ឬប្រើប្រាស់សេវាអាជីវកម្មបញ្ចាំ និងប្រាតិភោគដោយអនុប្បទាន (ការបញ្ចាំផ្តាច់) គួរតែសិក្សាឱ្យបានច្បាស់លាស់ជាមុនសិន ថាតើសេវាទាំងពីរនេះដូចគ្នា ឬខុសគ្នាយ៉ាងដូចម្តេច ដើម្បឱ្យនីតិវិធីនៃការបញ្ចាំទ្រព្យត្រូវបានធានា និងស្របតាមច្បាប់។ (អានបន្ថែម)

• ច្បាប់ និងបញ្ញាត្តិ
• ច្បាប់ និងបញ្ញាត្តិ