កិច្ចសន្យាលក់-ទិញអចនលទ្រព្យមានប៉ុន្មានប្រភេទ?​ ពិនិត្យដូចម្ដេចទើបដឹងថាត្រឹមត្រូវ?

• 29 ខែ​ធ្នូ 2022
• Uncategorized @km
• 18 មើល

បើតាមក្រមរដ្ឋប្បវេណី ក្នុងការទិញ-លក់ អចលនវត្ថុ គេគួរតែធ្វើជាលិខិតយថាភូត ដែលមានលក្ខណៈទម្រង់បី គឺ (១).​ កិច្ចសន្យាធ្វើឡើងដោយសាការី (២). កិច្ចសន្យាធ្វើឡើងដោយមានប្រថាប់ត្រាឃុំ សង្កាត់ ឬក្រុង ស្រុក ខណ្ឌ និង (៣). កិច្ចសន្យាឯកជនបញ្ជាក់ដោយសាការី។  (អានបន្ថែម)

សម្រាប់អ្នកអ្នកអភិវឌ្ឍអចលនវត្ថុ ជាទូទៅឃើញថាបានធ្វើឡើងទៅតាមទម្រង់ទី១ ប៉ុន្តែអ្នកអភិវឌ្ឍខ្លះក៏ធ្វើក្នុងទម្រង់ផ្សេងផងដែរ ពិសេសក្នុងករណីបង់រំលោះ។

តើកិច្ចសន្យាលក់-ទិញធ្វើដោយអ្នកអភិវឌ្ឍខុសពីកិច្ចសន្យាទូទៅដូចម្ដេច ហើយត្រូវពិនិត្យដូចម្ដេចទើបដឹងថាត្រឹមត្រូវ?

បើពិនិត្យមើលជាក់ស្តែង ខចែងក្នុងកិច្ចសន្យាទាំងពីរនេះ មានលក្ខណៈមិនសូវខុសគ្នាប៉ុន្មាននោះទេ ប៉ុន្តែមាន ខចែងមួយចំនួ​នបានចែងយ៉ាងច្បាស់ដោយឡែកអំពីកាតព្វកិច្ចរបស់គូភាគីទាំងពីរ ដោយសារតែការលក់ទិញក្នុងគម្រោងនេះ ភា​គ​​​ច្រើនជាការបង់រំលោះ។

អ្នកអភិវឌ្ឍអចលនវត្ថុដែលទទួលបានអាជ្ញាបណ្ណ ឬលិខិតអនុញ្ញាតប្រភេទ១ អាចដំណើរការប្រតិបត្តិការលក់-ទិញបាន លុះត្រាតែអ្នកអភិវឌ្ឍនោះ បានបញ្ចប់គម្រោងសាងសង់ជាស្ថាពរដោយមានលិខិតបិទការដ្ឋាន លិខិតបញ្ជាក់ពីគុណភាពសំណង់ និង/ឬមានការវាយតម្លៃពីមន្ត្រីជំនាញរបស់នាយកដ្ឋាន ឬមន្ទីរជាមុនសិន។  (អានបន្ថែម)

ចំណែកឯ អ្នកអភិវឌ្ឍអចលនវត្ថុដែលទទួលបានអាជ្ញាបណ្ណ ឬលិខិតអនុញ្ញាតប្រភេទ២ អាចដំណើរការប្រតិបត្តិការលក់-ទិញបាន លុះត្រាតែមានលិខិតអនុញ្ញាតសាងសង់ និង/ឬលិខិតបើកការដ្ឋានសាងសង់ពីអាជ្ញាធរមានសមត្ថកិច្ចជាមុនសិន។

ក្នុងករណីមិនទាន់មានលិខិតទាំងពីរនេះ អ្នកអភិវឌ្ឍ មានសិទ្ធិទទួលប្រាក់កក់ដំបូងត្រឹមតែ ១% នៃតម្លៃលក់ប៉ុណ្ណោះ  (ប្រការ២២ នៃប្រកាសលេខ ០៨៩ សហវ.ប្រក)។

លើសពីណនេះ  ប្រកាសលេខ ០៨៩ សហវ.ប្រក ចុះថ្ងៃទី២០ ខែមករា ឆ្នាំ២០២០ ស្តីពីការគ្រប់គ្រងអាជីវកម្មអភិវឌ្ឍអច​ល​​នវត្ថុ ក៏បានចែងតម្រូវឱ្យកិច្ចសន្យាលក់-ទិញក្នុងគម្រោងអភិវឌ្ឍអចលនវត្ថុ ត្រូវគោរពតាមលក្ខខណ្ឌដូចខាងក្រោម​នេះ៖

• ឈ្មោះអ្នកអភិវឌ្ឍ និងឈ្មោះអ្នកទិញ ដោយបញ្ជាក់អំពីអត្តសញ្ញាណ និងអាសយដ្ឋានរបស់ភាគីទាំងពីរឱ្យ បានច្បាស់ និងមានសាក្សីដឹងឮ
• ទីតាំងគម្រោង ទំហំដី និងតម្លៃលក់-ទិញដែលបានព្រមព្រៀងគ្នា កាតព្វកិច្ចរបស់គូភាគីដែលទទួលបន្ទុកបង់ពន្ធប្រថាប់ត្រា និងបង់កម្រៃសេវាផ្សេងៗទៀត
• កាលបរិច្ឆេទបញ្ចប់គម្រោង
• ឈ្មោះ ទីតាំងរបស់ធនាគារ និងលេខគណនីអភិវឌ្ឍអចលនវត្ថុ ដែលអ្នកអភិវឌ្ឍត្រូវបើកតាមប្រការ ៣០នៃ ប្រកាសខាងលើ (ចំពោះអ្នកអភិវឌ្ឍដែលទទួលបានអាជ្ញាបណ្ណប្រភេទ២)
• នីតិវិធី និងកាលវិភាគបង់ប្រាក់
• ចំនួនទឹកប្រាក់ដែលត្រូវធ្វើការផាកពិន័យចំពោះការបង់ប្រាក់យឺតយ៉ាវ ត្រូវតែសមាមាត្រទៅនឹងចំនួនទឹកប្រាក់ ដែលត្រូវធ្វើការផាកពិន័យចំពោះការសាងសង់យឺតយ៉ាវ
• សិទ្ធិរបស់អ្នកទិញពាក់ព័ន្ធទៅនឹងដី ឬលំហចំណែកឯកជន និងចំណែករួម​ (ខនេះ គឺចែងពាក់ព័ន្ធនឹងការទិញ-លក់អគារសហកម្មសិទ្ធិ ឬខុនដូ)
• សិទ្ធិក្នុងការរំលាយកិច្ចសន្យា
• កាតព្វកិច្ចក្នុងការកាត់ឈ្មោះផ្ទេរកម្មសិទ្ធិ (ជាទូទៅ ម្ចាស់អាជីវកម្ម ជាអ្នករត់ឯកសារផ្ទេរសិទ្ធិជូនអតិថិជន) (អានបន្ថែម)
• ការធានាខុសត្រូវលើគុណភាព និងសុវត្ថិភាពសំណង់
• ប្រសិនបើដីអភិវឌ្ឍនោះ ជាដីជួលពីរដ្ឋ ឬឯកជន អ្នកអភិវឌ្ឍត្រូវបញ្ជាក់អំពីរយៈពេលដែលអ្នកទិញមាន សិទ្ធិកាន់កាប់អចលនវត្ថុ និងអំពីថ្ងៃខែចាប់ផ្តើម និងថ្ងៃខែដែលត្រូវបញ្ចប់សិទ្ធិនៃការជួលដីនោះ (ចំពោះការជួលនេះ ភាគច្រើនជាការជួលរយៈពេលវែង ដូចនេះ អ្នកទិញអចលនវត្ថុក្នុងគម្រោងទាំងនេះ គួរសិក្សាពីសិទ្ធិ​​​​​ជួលអចិន្ត្រៃយ៍ជាមុនសិន) (អានបន្ថែម)
• ប្រសិនបើដីអភិវឌ្ឍនោះជាប់បន្ទុក ត្រូវប្រកាសប្រាប់អ្នកទិញអំពីក្បាលដីជាប់បន្ទុកផ្សេងៗ និងត្រូវធានាការផ្ទេរកម្មសិទ្ធិស្របច្បាប់ បន្ទាប់ពីអ្នកទិញបានអនុវត្តកាតព្វកិច្ចបង់ប្រាក់រួចរាល់។

• Laws and Regulation