គម្រោងផ្លូវសំខាន់ៗចំនួន៤នឹងបើកសម្ពោធជាផ្លូវការក្នុងពេលប៉ុន្មានខែខាងមុខ

• 15 ខែ​កុម្ភៈ 2023
• ព័ត៌មានក្នុងស្រុក
• 12 មើល

គម្រោងផ្លូវជាតិសំខាន់ៗចំនួន ៤​ រួមមាន គម្រោងផ្លូវក្រវាត់ក្រុងទី៣ ផ្លូវជាតិលេខ ៥ ផ្លូវជាតិលេខ ២ និង ២២ នឹងត្រូវបានបើកសម្ពោធជាផ្លូវការ នៅក្នុងរយៈពេលប៉ុន្មានខែខាងមុខនេះ។

លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់អំពីកាលបរិច្ឆេទបើកដំណើរការគម្រោងផ្លូវក្រវាត់ក្រុងទី៣ ថានឹងត្រូវបើកដំណើរការឱ្យប្រើប្រាស់ជាផ្លូវការ នៅក្នុងខែឧសភា ឆ្នាំ ២០២៣ ខាងមុខនេះ។

លោកបានបញ្ជាក់ថា «ផ្លូវក្រវាត់ក្រុងទី៣ ត្រូវបានសន្យាហើយថានឹងបញ្ចប់នៅខែមិថុនា ហើយសម្ពោធនៅខែមិថុនា ប៉ុន្តែខ្ញុំបាននិយាយថា កុំកៀកពេក។ ដាក់សម្ពោធខែឧសភាទៅ»។

គម្រោងនេះមានប្រវែងសរុបជិត ៥៣គីឡូម៉ែត្រ ហើយត្រូវបានបើកសម្ពោធការដ្ឋានសាងសង់ជាផ្លូវការ ក្រោមអធិបតីភាពរបស់សម្តេចតេជោ ហ៊ុនសែន នាយករដ្ឋមន្ត្រីនៃកម្ពុជា កាលពីថ្ងៃទី ១៤ ខែ មករា ឆ្នាំ ២០១៩។ (អានបន្ថែម)

ក្រៅពីនេះ លោកទេសរដ្ឋមន្ត្រីក៏កំពុងពិភាក្សាអំពីលទ្ធភាពក្នុងការបើកសម្ពោធផ្លូវជាតិលេខ ៥ ដែលកំពុងសាងសង់ភ្ជាប់ពីព្រែកក្តាមទៅធ្លាម្អម និងពីធ្លាម្អមទៅបាត់ដំបង។ លោកបានបញ្ជាក់ថា ប្រសិនបើអាចធ្វើទៅបាន គម្រោងផ្លូវជាតិដ៏សំខាន់នេះនឹងសម្ពោធដាក់ឱ្យប្រើប្រាស់ជាផ្លូវការ នៅក្នុងឆ្នាំ២០២៣នេះផងដែរ។ (អានបន្ថែម)

គម្រោង២ខ្សែទៀតនោះគឺ ផ្លូវជាតិលេខ ២ និងផ្លូវជាតិលេខ ២២ ដែលក្រសួងសាធារណការក៏កំពុងជំរុញបញ្ចប់ការសាងសង់ជាស្ថាពរ ដើម្បីឈានទៅកាន់ការបើកសម្ពោធជាផ្លូវការនៅត្រឹមខែកក្កដា ឆ្នាំ២០២៣។​ គម្រោងនេះធ្លាប់ត្រូវបានពន្យារពេលសាងសង់ជាច្រើនលើកច្រើនសារ ហើយលោកទេសរដ្ឋមន្ត្រីក៏ធ្លាប់បានជំរុញឱ្យក្រុមហ៊ុនកូរ៉េ​ ដែលសាងសង់គម្រោងនេះ ត្រូវបញ្ចប់ការសាងសង់ប្រកបដោយស្តង់ដារគុណភាព។ (អានបន្ថែម)

• Road and Infrastructure