គម្រោងសង់ផ្លូវសំខាន់១ខ្សែ ឆ្ពោះទៅកាន់ភ្នំខ្នងផ្សារ សម្រេចដំណាក់កាលសំខាន់ដោយជោគជ័យ!

• 21 ខែ​កក្កដា 2025
• Uncategorized
• 9 មើល

គម្រោងសង់ផ្លូវសំខាន់១ខ្សែ ឆ្ពោះទៅកាន់ភ្នំខ្នងផ្សារ ដែលមានទីតាំងស្ថិតនៅក្នុងភូមិសាស្រ្តខេត្តកំពង់ស្ពឺ ជាប់ជាមួយខេត្តកោះកុង កំពុងប្រព្រឹត្តទៅមុខយ៉ាងរលូន ខណៈបច្ចុប្បន្នផ្លូវនេះ ត្រូវបានបញ្ចប់ការងារចាក់ដី និងកិនពង្រាបបានស្អាតល្អហើយ។ នេះបើតាមការឱ្យដឹងពីអ្នកនាំពាក្យក្រសួងបរិស្ថាន ឯកឧត្តម ខ្វៃ អាទិត្យា នៅថ្ងៃទី១៧ ខែកក្កដា ឆ្នាំ២០២៥។

បើតាមការបញ្ជាក់របស់ឯកឧត្តមអ្នកនាំពាក្យ បានឱ្យដឹងថា ការងារសាងសង់ហេដ្ឋារចនាសម្ព័ន្ធផ្សេងៗ សម្រាប់ការអភិវឌ្ឍគោលដៅលំហែបៃតងនៅតំបន់ភ្នំខ្នងផ្សារ បានកំពុងដំណើរការទៅមុខយ៉ាងរលូនបើទោះបីជាស្ថិនក្នុងរដូវវស្សាក៏ដោយ និងមានភ្ញៀវទេសចរនៅតែបន្តធ្វើដំណើរ បានប្រសើរជាងមុន ដើម្បីទៅកម្សាន្តលើភ្នំខ្នងផ្សារជាហូរហែ។

ឯកឧត្តមបន្តថា ផ្លូវចាប់ពីវត្តតាំងបំពង់ ទៅដល់ជើងភ្នំខ្នងផ្សារ ប្រវែងជាង ៧ គ.ម បានបញ្ជប់ការចាក់ពង្រាបរួចរាល់ហើយ ដែលនេះជាការជួយសម្រួលដល់ការធ្វើដំណើរបានល្អប្រសើរ ហើយក្រសួងបរិស្ថាន ក៏បានសហការជាមួយ ស្ថាប័នពាក់ព័ន្ធ រៀបចំហេដ្ឋារចនាសម្ព័ន្ធ ដើម្បីអភិវឌ្ឍន៍គោលដៅលំហែបៃតង នៅតំបន់ខ្នងផ្សារ ដែលមានភ្នំខ្នងសំពៅ និងខ្នងផ្សារ ដោយគោរពតាមបទដ្ឋាន បច្ចេកទេសបរិស្ថាន សំដៅឈានទៅលើកកម្ពស់ជិវភាពពលរដ្ឋនៅតាមសហគមន៍មូលដ្ឋាន។

បើតាមក្រសួងបរិស្ថាន ការដ្ឋានសាងសង់ផ្លូវចូលទៅកាន់តំបន់ខ្នងផ្សារ និងហេដ្ឋារចនាសម្ព័ន្ធបម្រើឱ្យគោលដៅលម្ហែបៃតងតំបន់នោះ បានបើកសម្ពោធជាផ្លូវការ ក្រោមអធិបតីភាព ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន កាលថ្ងៃទី១៦ ខែឧសភា ឆ្នាំ២០២៥។ រហូតមកទល់ពេលនេះ គម្រោងអភិវឌ្ឍន៍រួមមាន៖ ការសាងសង់ ផ្លូវក្រាលក្រួសក្រហម (កាលថ្មម៉ិច) ប្រវែង ៧,២ គ.ម ទទឹងប្រវែង៨ម ចាប់ពីវត្តតាំងបំពង់ ដល់ជើងភ្នំឡើងតំបន់ខ្នងផ្សារ បានរៀបចំចាក់ដីនិងពង្រាបដីស្អាតរួចរាល់។ លើសពីនេះ ការសាងសង់ក្លោងទ្វារនៅច្រកឡើងភ្នំសម្រេចបាន ២៥%, ការសាងសង់បន្ទប់ទឹកស្អាតសម្រេចបាន ២០%, និង ស្នាក់ការផ្តល់ព័ត៌មានសម្រាប់ទេសចរណ៍លើភ្នំ និងបន្ទប់សង្គ្រោះបឋម សម្រេចបាន ៥%។

រីឯការស្ថាបនាផ្លូវឡើងភ្នំខ្នងផ្សារ និងការបើកការសាងសង់ផ្លូវថ្មើរ ជើងឡើងតំបន់ភ្នំខ្នងផ្សារ ចាប់ពីចំណុចជើងភ្នំ ដល់ដំណាក់ដានព្រះ មុនទៅដល់ភ្នំខ្នងផ្សារ រួមជាមួយកន្លែងចតយានយន្តរៀបចំបានមួយចំនួនផងដែរ។ ទន្ទឹមនឹងនេះ ក្រសួងក៏បានអះអាងថា ការចាប់ផ្តើមអនុវត្តគម្រោងទាំងនេះ គឺជាការឆ្លើយតបប្រសាសន៍ដឹកនាំដ៏ខ្ពង់ខ្ពស់ ពីសម្តេចធិបតី ហ៊ុន ម៉ាណែត ដើម្បីបង្កើតអនាគតថ្មីសម្រាប់តំបន់នេះ។

គួររំលឹកថា ក្រសួងបរិស្ថាន បានសម្ពោធបើកការដ្ឋានសាងសង់ហេដ្ឋារចនាសម្ព័នសំខាន់ៗមួយខ្សែនេះ នៅថ្ងៃទី១៦ ខែឧ​ស​ភា ឆ្នាំ២០២៥។៕ (អានបន្ថែម)

 

• Road and Infrastructure