កម្ពុជា-ឡាវ ចាប់ផ្តើមបើកការដឹកជញ្ជូនឆ្លងកាត់សម្រាប់នាំចេញផលិតផលកម្ពុជា៦មុខទៅចិនជាផ្លូវការ

Proeksa Meas
1 ខែកក្កដា 2026
ព័ត៌មានអចលនទ្រព្យ
141 មើល

កិច្ចព្រមព្រៀងដឹកជញ្ជូនឆ្លងកាត់ព្រំដែនបើកទ្វារសម្រាប់ផលិតផលសំខាន់ៗចំនួនប្រាំមួយរបស់កម្ពុជា ដោយមានការដឹកជញ្ជូនដំបូងគឺផ្លែទុរេនស្រស់ឈានមុខគេ

កម្ពុជា-ឡាវ កាលថ្ងៃទី២២ ខែមិថុនា ឆ្នាំ២០២៦ បានចាប់ផ្តើមបើកការដឹកជញ្ជូនឆ្លងកាត់សម្រាប់នាំចេញផលិតផលកម្ពុជា៦មុខ ទៅកាន់ទីផ្សារចិនជាផ្លូវការ ខណៈផ្លែទុរេនចំនួន ៤កុងតឺន័រត្រូវបាននាំចេញទៅចិនដំបូងគេនៅថ្ងៃសម្ពោធនេះ។ ការសម្ពោធនេះ បានធ្វើឡើងក្រោមវត្តមានឯកឧត្តម ឌិត ទីណា រដ្ឋមន្ត្រីក្រសួងកសិកម្មកម្ពុជា និងរដ្ឋមន្ត្រីកសិកម្មឡាវ។

ឯកឧត្តម ឌិត ទីណា បានលើកឡើងថា នេះគឺសមិទ្ធផលកើតចេញពីកិច្ចខិតខំប្រឹងប្រែង និងការចរចាយ៉ាងសកម្មកន្លងរវាងក្រសួងកសិកម្ម រុក្ខាប្រមាញ់ និងនេសាទ និងក្រសួងកសិកម្មនិងបរិស្ថានឡាវ ដើម្បីបើកផ្លូវ និងសម្របសម្រួលនីតិវិធីនានា ក្នុងការបើកច្រកថ្មីសម្រាប់ការដឹកជញ្ជូនឆ្លងកាត់កសិផលខ្មែរចំនួន ៦មុខ ទៅកាន់ទីផ្សារចិន ដែលរួមមានចេក ស្វាយ អង្ករ មៀនប៉ៃលិន ម្សៅដំឡូងមី និងទុរេន»។

ឯកឧត្តមបន្តថា៖ «នេះជាសញ្ញាណវិជ្ជមាន និងជាកាលានុវត្តភាពថ្មីស្រឡាងសម្រាប់បងប្អូនកសិករ ក៏ដូចជាម្ចាស់អាជីវកម្មក្នុងវិស័យកសិកម្មនៅកម្ពុជា ក្នុងការចាប់យកឱកាស និងពង្រីកសក្តានុពលកសិផលខ្មែរនៅលើទីផ្សារអន្តរជាតិ»។

ក្រសួងកសិកម្ម បានបញ្ជាក់ទៀតថា ការបើកផ្លូវឆ្លងកាត់ជាផ្លូវការនៅពេលនេះ ធ្វើឡើងបន្ទាប់ពីភាគីកម្ពុជា និងឡាវ បានធ្វើការចរចាជាមួយគ្នាអស់រយៈពេល ៦ ខែកន្លងមក។ ច្រកថ្មីនេះ នឹងធ្វើឱ្យកម្ពុជាចំណេញពេលដឹកជញ្ជូនដែលជាធម្មតាត្រូវចំណាយពេលពី ១៥ ទៅ ២០ថ្ងៃ ហើយឥឡូវអាចបង្រួញមកត្រឹមតែ១សប្ដាហ៍តែប៉ុណ្ណោះ។

ក្រសួងបន្តថា ការបើកច្រកឆ្លងកាត់នេះនឹងធ្វើឲ្យផលដំណាំស្រស់ដូចជា ទុរេន ស្វាយ មៀនប៉ៃលិន និងកសិផលមួយចំនួនទៀតនឹងអាចនាំចេញបានដោយជោគជ័យ ក្នុងរយៈពេលខ្លី ដោយមិនមានភាពស្មុគស្មាញ ដែលធ្វើឲ្យសមត្ថភាពប្រកួតប្រជែញកសិផលកម្ពុជាកើនឡើង។ ក្រសួងក៏ជំរុញទឹកចិត្តឲ្យប្រជាកសិករ និងអាជីវករកម្ពុជា ចាប់យកឱកាសពីការបើកច្រកដឹកជញ្ជូនឆ្លងកាត់នេះផងដែរ៕ (អានបន្ថែម)