EuroCham៖វេទិការនិងការជួបជុំគ្នាគឺល្អជាងការផាកពិន័យពន្ធដារ

• Me Wathana
• 26 ខែ​តុលា 2018
• ព័ត៌មានអចលនទ្រព្យ
• 218 មើល

វេទិការនៃការជួបជុំគ្នាគឺល្អជាងគោលនយោបាយនៃផាកពិន័យទៅលើពន្ធដារ នេះបើយោងតាមការបញ្ជាក់របស់សភាពាណិជ្ជកម្មអ៊ឺរ៉ុបEuroCham។

កាលពីថ្ងៃទី ២៥ ខែ តុលា ឆ្នាំ ២០១៨ លោក Arnaud Darc ប្រធានសភាពាណិជ្ជកម្មអ៊ឺរ៉ុបEuroCham បាន ថ្លែងក្នុងកម្មវិធី«វេទិការពន្ធដារ»ប្រចាំឆ្នាំថាការគោរពច្បាប់គឺនៅតែជាបញ្ហាក្នុងវិស័យពន្ធដារនៅកម្ពុជាហើយដើម្បីដោះស្រាយបញ្ហានេះគឺត្រូវមានការសហការកាន់តែប្រសើរជាងនេះពីស្ថាប័នពាក់ព័ន្ធ។

លោក Arnaud Darc បានឲ្យដឹងថាដើម្បីបណ្តុះវប្បធម៌នៃការគោរពច្បាប់លោកបានអំពាវនាវឲ្យមានការជួបជុំរវាងស្ថាប័នពាក់ព័ន្ធកាន់តែច្រើនជាងនេះពោលគឺ«វេទិការនៃការជួបជុំគ្នាគឺមានប្រសិទ្ធភាពជាងគោលនយោបាយផាកពិន័យ»។

ការលើកឡើងរបស់លោកក្នុងកម្មវិធីដែលមានការចូលរួមពីអ្នកជំនាញពន្ធដារនិងតំណាងក្រុមហ៊ុនសរុបជិត ៥០០ នាក់ ក្នុងនាមលោកជាតំណាងរបស់ក្រុមហ៊ុនអ៊ឺរ៉ុបកំពុងធ្វើអាជីវកម្មនៅកម្ពុជាបានសង្កេតឃើញថា «ការអនុលោមតាមច្បាប់នៅតែជាប្រធានបទក្តៅគគុក….យើងចង់អនុលោមទៅតាមច្បាប់ហើយចង់ឲ្យដៃគូប្រកួតប្រជែងរបស់យើងអនុលោមទៅតាមច្បាប់ដូចគ្នាដើម្បីឲ្យយើងអាចប្រកួតប្រជែងក្នុងទីផ្សារខណៈពួកយើងអាចរួមចំណែកដល់ការអភិវឌ្ឍជាតិ»។

បន្ថែមជាងនេះទៅទៀត លោក Arnaud Darc បានសង្កត់ធ្ងន់យ៉ាងដូច្នេះថា៖« ៥០ ភាគរយនៃចំណូលពន្ធនៅប្រទេសកម្ពុជាគឺទទួលបានពីការផាកពិន័យដែលក្នុងនោះអត្រាចំណូលពីការផាកពិន័យនៅបណ្តាប្រទេសផ្សេងគឺត្រឹមតែ ១០ ភាគរយនោះទេ»។