ព្រលានយន្តហោះចាស់ រៀបចំជាសួនសាធារណៈ ប្រកាសបើកឱ្យចូលទស្សនាក្នុងឱកាសថ្ងៃចូលឆ្នាំថ្មី

Proeksa Meas
14 ខែមេសា 2026
ព័ត៌មានអចលនទ្រព្យ
527 មើល

អាកាសយានដ្ឋានអន្តរជាតិភ្នំពេញ (ពោធិ៍ចិនតុង) បច្ចុប្បន្នបានរៀបចំជាសួនសាធារណៈសាកល្បង ប្រកាសបើកឱ្យសាធារណៈជន ចូលទស្សនារយៈពេល ៩ ថ្ងៃក្នុងឱកាសបុណ្យចូលឆ្នាំថ្មី ដោយមិនគិតថ្លៃ។ នេះបើតាមការសេចក្តីជូនដំណឹងរបស់អន្តរក្រសួងដែលគ្រប់គ្រងលើអតីតអាកាសយាន្ដដ្ឋានរបស់កម្ពុជា កាលថ្ងៃទី៦ ខែមេសា ឆ្នាំ២០២៦។

សេចក្តីជូនដំណឹង ដដែល បានជូនដំណឹងដល់ពលរដ្ឋទាំងអស់ មេត្តាជ្រាបថា អាកាសយានដ្ឋានអន្តរជាតិភ្នំពេញ នឹងបើកដំណើរការសាកល្បង ជាសួនសាធារណៈ ជូនសាធារណជន ចូលទស្សនាកម្សាន្ត ហាត់ប្រាណ និងលេងកីឡា ដោយមិនគិតថ្លៃ ក្នុងគោលបំណងចូលរួមអបអរសាទរក្នុង ឱកាសបុណ្យចូលឆ្នាំថ្មីប្រពៃណីជាតិខ្មែរ និងឱ្យឃើញច្បាស់ពីស្ថាបត្យកម្មនៃអាកាសយានដ្ឋានអន្តរជាតិភ្នំពេញ ដែលមានតម្លៃជាប្រវត្តិសាស្ត្រ។

ពលរដ្ឋអាចចូលទស្សនាជុំវិញតំបន់និងអគារជាច្រើន ក្នុងនោះរួមមាន អគារផ្ចិត និងប៉មបញ្ជា ហោះហើរ (Tower) ដែលត្រូវបានកសាងឡើងនៅអំឡុងទសវត្សរ៍ឆ្នាំ១៩៥០ តំបន់ជុំវិញបរិវេណអគារចេញ-ចូលអ្នកដំណើរវីអាយភី (VIP) ចំណតយន្តហោះស៊ីវិល និង តំបន់ផ្លូវរត់របស់យន្តហោះ (Runway) ជាដើម ដែល សុទ្ធសឹងតែជាតំបន់និងទីតាំងប្រវត្តិសាស្ត្រនៃវិស័យអាកាសចរស៊ីវិលកម្ពុជា។

ការបើកសាកល្បងនេះ មានរយៈពេល ៩ ថ្ងៃ គឺ ចាប់ពីថ្ងៃសៅរ៍ ទី១១ រហូតដល់ថ្ងៃអាទិត្យ ទី១៩ ខែមេសា ឆ្នាំ២០២៦ ដោយអនុញ្ញាតឱ្យប្រជាពលរដ្ឋចូលចាប់ពីម៉ោង ៥:០០ ព្រឹក ហើយត្រូវចាកចេញនៅម៉ោង ៩:០០ យប់។

អាកាសយានដ្ឋានអន្តរជាតិភ្នំពេញ (ពោធិ៍ចិនតុង) ក្រៅពីរៀបចំជាសួនសាធារណៈហើយនោះ ព្រលាននេះ ក៏បានរៀបចំបណ្តាញមន្ទីរពេទ្យជាតិ និងមន្ទីរពេទ្យបង្អែក ត្រៀមបុគ្គលិក ឧបករណ៍ និងឱសថសង្គ្រោះ ដើម្បីឆ្លើយតបគ្រប់ហេតុការណ៍ជាយថាហេតុសម្រាប់ពលរដ្ឋដែលបានចូលទទ្សនាផងដែរ៕

- Video Advertisement -

ព្រលានយន្តហោះចាស់ រៀបចំជាសួនសាធារណៈ ប្រកាសបើកឱ្យចូលទស្សនាក្នុងឱកាសថ្ងៃចូលឆ្នាំថ្មី

ព័ត៌មានដែលទាក់ទង

បារាំង ប្រសិទ្ធនាមសួនច្បារមួយកន្លែងនៅទីក្រុងធំមួយរបស់ខ្លួន ថាជា “សួនច្បារ នរោត្តម សីហនុ”