ក្រសួងប្តេជ្ញារួមគ្នាកាត់បន្ថយការប្រើប្រាស់ប្លាស្ទិកនៅតាមមន្ទីរពេទ្យ និងមណ្ឌលសុខភាព

Sommana Yan
8 ខែឧសភា 2026
ព័ត៌មានសំណង់
299 មើល

ក្រសួងសុខាភិបាល និងបរិស្ថាន ចុះអនុស្សរណៈនៃការយោគយល់គ្នា ដើម្បីលើកកម្ពស់ក្របខណ្ឌ «សុខភាពតែមួយ» សម្រាប់ប្រទេសជាតិស្អាតជាងមុន

ក្រសួងបរិស្ថាន និងក្រសួងសុខាភិបាល កាលថ្ងៃទី៣០ ខែមេសា ឆ្នាំ២០២៦ បានចុះហត្ថលេខាលើអនុស្សរណៈយោគយល់គ្នា ដើម្បីរួមគ្នាកាត់បន្ថយការប្រើប្រាស់ប្លាស្ទិក នៅតាមមន្ទីរពេទ្យ និងមណ្ឌលសុខភាពនៅទូទាំងប្រទេសកម្ពុជា។

តាមរយៈពិធីថ្លែងសារ ឯកឧត្តម ឈាង រ៉ា រដ្ឋមន្ត្រីក្រសួងសុខាភិបាល បានវាយតម្លៃខ្ពស់ចំពោះការគ្របដណ្តប់នៃគោលដៅក្របខណ្ឌសុខភាពតែមួយ ដែលតម្រូវឱ្យមានការយកចិត្តទុកដាក់ដោះស្រាយ និងលើកស្ទួយព្រមគ្នានូវសុខភាពមនុស្ស សត្វ និងបរិស្ថាន។ ឯកឧត្តមមានជំនឿថា MoU នេះ ជាត្រីវិស័យសម្រាប់មន្ទីរពេទ្យ និងមណ្ឌលសុខភាពទូទាំងប្រទេស រួមទាំងផ្នែកឯកជននឹងចូលរួមកកាត់បន្ថយការប្រើប្រាស់ប្លាស្ទិកមិនមែនវេជ្ជសាស្ត្រជាអតិបរមា ដើម្បីចូលរួមចំណែកការពារបរិស្ថានឱ្យបានស្អាតនៅកម្ពុជា។

នាឱកាស ឯកឧត្តម អ៊ាង សុផល្លែត រដ្ឋមន្រ្តីក្រសួងបរិស្ថាន បានចាត់ទុកកិច្ចសហការគ្នានៅពេលនេះ នឹងចូលរួមគាំទ្របន្ថែមទៀតដល់ការគ្រប់គ្រង និងកាត់បន្ថយការប្រើប្រាស់ផលិតផលប្លាស្ទិក ដើម្បីកម្ពុជាដែលជាផ្ទះរបស់យើង មានភាពស្អាត បៃតង គ្មានការបំពុល ក៏ដូចជាចូលរួមចំណែកក្នុងការការពារសុខភាពរបស់ប្រជាជនកម្ពុជា ឈានឆ្ពោះទៅការអភិវឌ្ឍប្រកបដោយចីរភាព។

សូមជម្រាបដែរថា ការពង្រឹងកិច្ចសហប្រតិបត្តិការរបស់ក្រសួងទាំង២នៅពេលនេះ នឹងធ្វើឱ្យសហគមន៍ តាមផ្ទះ និងតាមមន្ទីរពេទ្យ មានការផ្លាស់ប្តូរឥរិយាបថ និងការគ្រប់គ្រងសំណល់កាន់តែប្រសើរ ខណៈពេលដែលក្រសួងកំពុងបន្តអនុវត្តយុទ្ធនាការនានា សម្អាតសំរាម ប្លាស្ទិកតាមដងផ្លូវ ចែកធុងសំរាម ឡានដឹកសំរាម ម៉ូតូរឺម៉កដឹកសំរាម ចែកឡដុតសំរាម ព្រមទាំងចាត់វិធានការនានាបន្ថែមទៀត។

តាមរយៈអនុស្សរណៈខាងលើនេះ ក្រសួងបរិស្ថាន ក៏បានផ្តល់ជូនធុងសំរាម សរុប ចំនួន ៥០០០ធុង ដល់ក្រសួងសុខាភិបាល ដើម្បីផ្តល់ជូនដល់មន្ទីរពេទ្យ និងមណ្ឌលសុខភាព តាមរយៈមន្ទីរសុខាភិបាលរាជធានី ខេត្តទូទាំងប្រទេសផងដែរ៕