ម៉ាឡេស៊ីចាប់អារម្មណ៍ពង្រឹងខ្សែច្រវាក់ផ្គត់ផ្គង់កសិកម្ម និងបច្ចេកវិទ្យាកសិកម្មទំនើបៗនៅកម្ពុជា

• Proeksa Meas
• 15 ខែ​កក្កដា 2026
• ព័ត៌មានសំណង់
• 49 មើល

បន្ទាប់ពីកិច្ចពិភាក្សាជាយុទ្ធសាស្ត្រជាមួយសភាពាណិជ្ជកម្មកម្ពុជា មន្ត្រីម៉ាឡេស៊ីបានអញ្ជើញសហគ្រាសក្នុងស្រុកឱ្យចូលរួមពិព័រណ៍កសិកម្មលំដាប់កំពូលក្នុងតំបន់ ដើម្បីជំរុញការវិនិយោគកសិ-ឧស្សាហកម្មទ្វេភាគី។

ម៉ាឡេស៊ី បានបង្ហាញចាប់អារម្មណ៍យ៉ាងខ្លាំងក្នុងការស្វែងរកដៃគូសហការ និងវិនិយោគពង្រឹងខ្សែច្រវាក់ផ្គត់ផ្គង់កសិកម្ម និងបច្ចេកវិទ្យាកសិកម្មទំនើបៗនៅកម្ពុជា។ នេះបើយោងតាមជំនួបពិភាក្សារវាងសភាពាណិជ្ជកម្មកម្ពុជា និងទីប្រឹក្សាផ្នែកកសិកម្មនៃស្ថានទូតម៉ាឡេស៊ី កាលថ្ងៃទី៦ ខែកក្កដា ឆ្នាំ២០២៦ ក្រោមវត្តមានឯកឧត្តមឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា ជាមួយ​លោក​ Shaiful Naszri Abdul Wahid ទីប្រឹក្សាផ្នែកកសិកម្មនៃស្ថានទូតម៉ាឡេស៊ី​ ក្នុងឱកាសដែលគណៈប្រតិភូអញ្ជើញមកបំពេញបេសកកម្មការងារនៅកម្ពុជា។

នាឱកាសនោះ លោក​ Shaiful Naszri Abdul Wahid  បានលើកឡើងថា ភាគីម៉ាឡេស៊ីបានបង្ហាញនូវចំណាប់អារម្មណ៍យ៉ាងខ្លាំងក្នុងការស្វែងរកដៃគូសហការ និងពង្រឹងខ្សែច្រវាក់ផ្គត់ផ្គង់កសិកម្ម និងបច្ចេកវិទ្យាកសិកម្មទំនើបៗ។ បន្ថែមពីលើនេះ ម៉ាឡេស៊ីក៏អញ្ជើញគណៈប្រតិភូធុរកិច្ចកម្ពុជាចូលរួមព្រឹត្តិការណ៍ពិព័រណ៍កសិកម្ម វប្បកម្ម និងកសិទេសចរណ៍ម៉ាឡេស៊ី ឆ្នាំ២០២៦ ដែលជាព្រឹត្តិការណ៍កសិកម្មដ៏ធំបំផុតមួយនៅក្នុងតំបន់ ដើម្បីបើកឱកាសឱ្យធុរជនកម្ពុជាពង្រីកទីផ្សារជាមួយដៃគូវិនិយោគអន្តរជាតិ។

ជាការឆ្លើយតប ឯកឧត្តមឧកញ៉ា ងួន ម៉េងតិច បានស្វាគមន៍ និងពិភាក្សាលើកាលានុវត្តភាពធុរកិច្ច និងការវិនិយោគទ្វេភាគី ជាពិសេសផ្ដោតសំខាន់លើ វិស័យកសិកម្ម និងកសិឧស្សាហកម្ម ដែលជាវិស័យបង្គោលសេដ្ឋកិច្ចដ៏មានសក្តានុពលរបស់ប្រទេសទាំងពីរ កម្ពុជា-ម៉ាឡេស៊ី។

សូមជម្រាបដែរថា តាមរយៈជំនួបខាងលើ កម្ពុជា-ម៉ាឡរស៊ី ក៏បានប្តេជ្ញាបន្តកិច្ចសហការ និងសម្របសម្រួលសកម្មភាពជំរុញពាណិជ្ជកម្មនានា ដើម្បីបង្កលក្ខណៈងាយស្រួលដល់ធុរជននៃប្រទេសទាំងពីរ ក្នុងការទាញយកផលប្រយោជន៍ជាអតិបរមាពីឱកាសទីផ្សារដែលមានស្រាប់ និងការបង្កើតភាពជាដៃគូយូរអង្វែង ផ្ដល់ផលប្រយោជន៍ទៅវិញទៅមក៕

• business matching
• Cooperation and networking
• Business networking
• CCC