NagaWorld នឹងបញ្ឈប់បុគ្គលិក ១៣០០ នាក់ ដោយសារចំណូលធ្លាក់ចុះបណ្ដាលពីវិបត្តិកូវីដ

• Sommana Yan
• 3 ខែ​ឧសភា 2021
• ព័ត៌មានអចលនទ្រព្យ
• 340 មើល

ដោយសារតែការធ្លាក់ចុះនៃប្រាក់ចំណេញយ៉ាងគំហុកដែលបណ្តាលមកវិបត្តិកូវីដ១៩ កាស៊ីណូធំបំផុតនៅកម្ពុជា NagaWorld នឹងបញ្ឈប់បុគ្គលិកសរុបជាង ១៣០០ នាក់ ក្នុងពេលឆាប់ៗខាងមុខនេះ។ នេះបើយោងតាមសារព័ត៌មាន South China Morning Post កាលពីថ្ងៃទី ១ ឧសភា កន្លងទៅ។

បុគ្គលិកចំនួន ១៣០០ នាក់នេះ គឺស្មើនឹងជាង ១៥% នៃបុគ្គលិកសរុប ហើយដំណើរបញ្ឈប់ការងារនឹងធ្វើឡើងក្នុង ២ ទៅ ៣ សប្តាហ៍ ខាងមុខនេះជាបន្តបន្ទាប់។

ប្រភពដដែលបានបន្ថែមទៀតថា NagaWorld នឹងគណនាប្រាក់សំណង ដោយផ្អែកលើប្រាក់ខែដែលត្រូវបានកាត់រួចកាលពីឆ្នាំ ២០២០ មិនមែនប្រាក់ខែមុនកាត់នោះទេ។ ការប្រើវិធីសាស្រ្តនេះ នឹងធ្វើឱ្យបុគ្គលិកទទួលបានប្រាក់សំណងតិចជាងអ្វីដែលពួកគេគួរតែបានរាប់សិបម៉ឺនដុល្លារ។

សកម្មភាពនេះបានទទួលការរិះគន់ពីក្រុមសហជីព ដោយពួកគេលើកឡើងថា វិបត្តិកូវីដបានធ្វើឱ្យប្រទេសមួយចំនួនធំលើពិភពលោក រួមទាំងកម្ពុជាល្មើសនឹងច្បាប់ការងារ ។

ប្រធានសហជីព អ្នកស្រី ឈឹម ស៊ីថា បានប្រាប់កាសែត South China Morning Post ថា៖ «បុគ្គលិកបានប្រថុយសុវត្ថិភាពរបស់ពួកគេដើម្បីរកប្រាក់ចំណេញសម្រាប់ណាហ្គាវើល កាលពីដើមឆ្នាំ២០២០ ទោះមានជំងឺរាតត្បាតក្ដី។ ហើយនៅពេលនេះ ពួកគេត្រូវការជំនួយ ណាហ្គាវើលបែរជាធ្វើបែបនេះដាក់ពួកគាត់ទៅវិញ»។

កាសែត South China Morning Post បានព្យាយាមទាក់ទងទៅក្រសួងការងារ តែក្រសួងមិនបានឆ្លើយតបនោះទេ។

គួរបញ្ជាក់ផងដែរថា បើយោងតាមរបាយការណ៍របស់ក្រុមហ៊ុន ប្រាក់ចំណេញរបស់ NagaCorp សម្រាប់ឆ្នាំ ២០២០ ធ្លាក់ចុះប្រមាណជាង ៨០% បើធៀបនឹងឆ្នាំ២០១៩។ មូលហេតុចំបង គឺដោយសារតែក្រុមហ៊ុនបានបិទបណ្ដោះអាសន្នពីខែមេសា ដល់ខែកក្កដា ដើម្បីទប់ស្កាត់ការរីករាលដាលនៃជំងឺកូវីដ១៩។ (អានបន្ថែម)

កាលពីនៅថ្ងៃទី ០១ ខែមីនា កន្លងមកនេះ NagaCorp បានប្រកាសបិទកាស៊ីណូបណ្ដោះអាសន្នម្ដងទៀត ក្រោយបុគ្គលិកចំនួន ១១ នាក់បានធ្វើតេស្តិ៍វិជ្ជមាន។ (អានបន្ថែម)

មិនមែនតែ NagaCorp នោះទេដែលទទួលឥទ្ធិពលអវិជ្ជមានពីវិបត្តិកូវីដ ការប្រមូលចំណូលពន្ធលើវិស័យកាស៊ីណូសម្រាប់ឆ្នាំ ២០២០ សម្រេចបានថវិកាប្រមាណ ៤០ លានដុល្លារ ដែលក៏ធ្លាក់ចុះជាង ៥០% ដែរបើធៀបនឹងរយៈពេលដូចគ្នាក្នុងឆ្នាំ២០១៩។ (អានបន្ថែម)