ព័ត៌មានក្នុងស្រុក
ក្រុមហ៊ុនអចលនវត្ថុចុះបញ្ជីតាមប្រព័ន្ធអនឡាញថ្មីរបស់រដ្ឋ មានទុនសរុប ៤០០ លានដុល្លារ
នៅក្នុងរយៈពេលត្រឹម១ឆ្នាំ ដំបូង ក្រុមហ៊ុនចុះបញ្ជីតាមប្រព័ន្ធអនឡាញថ្មីរបស់រដ្ឋ (ឬប្រព័ន្ធថ្នាលតែមួយ) មានទុនវិនិយោគសរុបដល់ជាង ២ ៦០០ លានដុល្លារ ដែលក្នុងនោះ ទុនពីក្រុមហ៊ុនអចលនវត្ថុ រួមចំណែក ១៥% ឬស្មើនឹងប្រមាណ ៤០០លានដុល្លារ។ យោងតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ ក្រោយអនុវត្តការចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានរយៈពេល ១ឆ្នាំ ដំបូង ក្រសួងទទួលបានពាក្យស្នើសរុបជិត ៧ ០០០ សំណើ ដោយក្រសួងបានសម្រេចអនុម័ត ៦ ១៦៤ សំណើ។ ក្នុងចំណោមក្រុមហ៊ុនទាំងអស់ បើគិតជាភាគរយ អាជីវកម្មទាក់ទងនឹងសកម្មភាពអចលនទ្រព្យ មាន១០% ឬស្មើនឹងប្រមាណ ៦៣៤ក្រុមហ៊ុន។ ដោយឡែកទំហំវិនិយោគតាមវិស័យវិញ សកម្មភាពអចលនវត្ថុមាន ១៥% នៃទំហំវិនិយោគទាំងអស់។ គួរបញ្ជាក់ផងដែរថា ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាននេះ គឺជាវិធានការសំដៅលើកស្ទួយភាពប្រកួតប្រជែងរបស់កម្ពុជា និងបង្កើតបរិយាកាសវិនិយោគដែលទាក់ទាញជាងមុន។ ការធ្វើទំនើបកម្មនេះ រួមមានការកែសម្រួលដំណើរការ និងនីតិវិធីនៃការចុះបញ្ជីអាជីវកម្មនៅកម្ពុជា ដោយប្រើប្រាស់ប្រព័ន្ធបច្ចេកវិទ្យាព័ត៌មាន។ ប្រព័ន្ធថ្មីនេះត្រូវបានដាក់ឱ្យប្រើប្រាស់នៅស្ថាប័នរដ្ឋមួយចំនួន រួមមាន៖ ក្រសួងពាណិជ្ជកម្ម អគ្គនាយកដ្ឋានពន្ធដារ ក្រសួងការងារ និងបណ្តុះបណ្តាលវិជ្ជាជីវៈ ក្រសួងមហាផ្ទៃ និងក្រុមប្រឹក្សាអភិវឌ្ឍន៍កម្ពុជា៕
អានបន្ថែម
ឯកជនគ្រោងវិនិយោគបង្កើតតំបន់ទេសចរណ៍៣កន្លែង លើដីជិត៣០ហិកតា នៅខេត្តកោះកុង
ក្រុមហ៊ុនឯកជន គ្រោងនឹងវិនិយោគបង្កើតតំបន់ទេសចរណ៍ធម្មជាតិខ្នាតតូចចំនួន ៣កន្លែង លើផ្ទៃដី ប្រមាណជិត ៣០ហិកតា នៅក្រុងខេមរភូមិន្ទ និងស្រុកមណ្ឌលសីមា ខេត្តកោះកុង ។ លោក អ៊ុក ភ័ក្ត្រា អភិបាលរងខេត្តកោះកុងបានឱ្យដឹងក្នុងកិច្ចចុះពិនិត្យទីតាំងផ្ទាល់ កាលពីថ្ងៃ១៤ ខែមិថុនា នេះថា បច្ចុប្បន្នគម្រោងទាំង៣ ស្ថិតក្នុងដំណាក់កាលត្រួតពិនិត្យ និងសិក្សាទីតាំងជាក់ស្ដែង ថាអាចធ្វើបានឬទេ។ «យើងត្រូវសិក្សាឱ្យច្បាស់លាស់ ព្រោះគម្រោងដែលដាក់ស្នើមក គឺស្ថិតនៅក្នុងដែនជម្រកសត្វព្រៃតាតៃ ក្នុងភូមិសាស្រ្ត សង្កាត់ស្មាច់មានជ័យ ក្រុងខេមរភូមិន្ទ និងឃុំប៉ាក់ខ្លង ស្រុកមណ្ឌលសីមា»។ ជាមួយគ្នានេះដែរ លោកអ៊ុក ភ័ក្ត្រា ក៏បានស្នើទៅកាន់តំណាងក្រុមហ៊ុនស្នើសុំវិនិយោគនូវចំណុចមួយចំនួនដូចជា៖ ១-ត្រូវដោះស្រាយផលប៉ះពាល់ និងសំណងនានាប្រសិនបើការអនុវត្តគម្រោងនេះបានប៉ះពាល់ដល់ទ្រព្យសម្បត្តិ ឬកម្មសិទ្ធិឯកជន។ ២-ជួយអភិវឌ្ឍហេដ្ឋារចនាសម្ព័ន្ធ និងជ្រើសរើសកម្លាំងពលកម្មពីក្នុងតំបន់ដើម្បីជួយលើកកម្ពស់កម្រិតជីវភាពប្រជាពលរដ្ឋ។ ៣-ចូលរួមថែរក្សាបរិស្ថាន ធនធានធម្មជាតិនិងជីវចម្រុះ ក្នុងនិងក្បែរទីតាំងស្នើសុំវិនិយោគ ពិសេសគឺការគ្រប់គ្រងសំណល់រឹងរាវ និងសំរាម។ ៤- ត្រូវគោរពតាមគោលការណ៍ណែនាំរបស់រាជរដ្ឋាភិបាល ក្រសួងបរិស្ថាន និងលិខិតបទដ្ឋាននានាដែលបានអនុញ្ញាតជូនក្រុមហ៊ុន និងចូលរួមសហការជាមួយអាជ្ញាធរមូលដ្ឋានប្រសិនបើមានតម្រូវការ៕
អានបន្ថែម
តើទីផ្សារ e-commerce និងទីផ្សារអចលនទ្រព្យ អាចនឹងរួមចូលគ្នាបានដែរឬទេ? ជាឱកាសឬយ៉ាងណា?
សម្រាប់អ្នកវិភាគខ្លះថា ការទិញទំនិញអនឡាញ ឬទីផ្សារ e-commerce គឺជាគូប្រជែងនៃទីផ្សារអចលនទ្រព្យ ពិសេសទីផ្សារ Retail ឬទីផ្សារផ្សារទំនើប។ ប៉ុន្តែលោក Eric Wong ដែលជាអ្នកវិភាគទីផ្សារជើងចាស់មួយរូប បានយល់ឃើញថា ហេដ្ឋារចនាសម្ព័ន្ធ e-commerce ឬកំណើននៃការប្រើប្រាស់បច្ចេកវិទ្យា គឺពិតជាចលករជំរុញទីផ្សារអចលនទ្រព្យទៅវិញទេ បើម្ចាស់អាជីវកម្មនីមួយៗចេះប្រើប្រាស់វាប្រកបដោយប្រសិទ្ធភាព។ យោងតាមតួលេខចុងក្រោយ ត្រឹមចុងឆ្នាំ ២០២០ អ្នកប្រើប្រាស់ប្រព័ន្ធទូរសព្ទនៅកម្ពុជាទាំងអស់មានដល់ទៅ ២០លាននាក់ ដែលភាគច្រើនគឺប្រើ Smartphone។ កំណើននៃការប្រើប្រាស់ Smartphone និង Internet នេះហើយគឺជាឱកាសសម្រាប់ទីផ្សារអនឡាញ ក៏ដូចជាទីផ្សារលក់រាយ (Retail) ផងដែរ។ ពីមុន ផ្សារទំនើបដែលលក់ទំនិញនានា រំពឹងទាំងស្រុងលើអតិថិជនដែលចូលទៅក្នុងហាង ប៉ុន្តែពេលនេះ ពួកគាត់អាចផ្សព្វផ្សាយផលិតផលរបស់ពួកគាត់លើប្រព័ន្ធអនឡាញ ឬក៏អាចលក់ផលិតផលតាមប្រព័ន្ធអនឡាញផ្ទាល់តែម្ដង។ ឧទាហរណ៍ ដូចជាហាងលក់សម្លៀកបំពាក់ Zendo និង Ten11 សុទ្ធសឹងតែចាប់ផ្ដើមមានប្រើប្រាស់ប្រព័ន្ធអនឡាញដើម្បីផ្សព្វផ្សាយអាជីវកម្ម។ លើសពីនេះ ក៏នៅប្រេនជាច្រើនទៀត ដូចជា La Rue និង ISSARA ក៏បានបង្កើតជាកម្មវិធីទូរសព្ទសម្រាប់ធ្វើទីផ្សារផ្ទាល់តែម្ដង។ អាជីវកម្មលក់រាយលើប្រព័ន្ធអនឡាញដែលកំពុងពេញនិយមមួយទៀតគឺ ម្លូបអាហារ […]
អានបន្ថែម
សមាគម CVEA ចង់ច្របាច់ភ្នាក់ងារអចលនទ្រព្យទាំងអស់ចូលជាប្រព័ន្ធស្ដង់ដាថ្មីមួយ ដើម្បីបង្កើតឱកាសចាប់លុយធំ
សមាជិកជាន់ខ្ពស់នៃសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានបង្ហាញគម្រោងចង់ង្កើតមហាវិទ្យាល័យបណ្ដុះបណ្ដាលភ្នាក់ងារលក់អចលនទ្រព្យឱ្យមានស្ដង់ដាជាងមុន ក៏ដូចជាចង់ច្របាច់បញ្ចូលភ្នាក់ងារទាំងអស់ទៅក្នុងប្រព័ន្ធគ្រប់គ្រងតែមួយ ដើម្បីបង្កើនឱកាសទាក់ទាញទុនវិនិយោគក្នុងវិស័យនេះឱ្យបានទ្រង់ទ្រាយធំជាងមុន។ សមាគមមានគោលបំណងបែបនេះ ក្រោយមើលឃើញពីបញ្ហាថា ភ្នាក់ងារលក់អចលនទ្រព្យនៅកម្ពុជាជាច្រើននៅខ្វះគុណភាព ហើយគ្មានប្រព័ន្ធចាត់ចែងគ្របគ្រង់ត្រឹមត្រូវ ដែលធ្វើឱ្យអ្នកវិនិយោគភាគច្រើនខ្វះទំនុកចិត្ត។ (អានបន្ថែម) យោងតាម លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុ ភ្នាក់ងារអចលនទ្រព្យនៅកម្ពុជាមានយ៉ាងហោច ៤ ម៉ឺន នាក់ដែលត្រឹមមួយផ្នែកតូចប៉ុណ្ណោះដែលឆ្លងកាត់ការអប់រំត្រឹមត្រូវ។ លោក សុខនីម បានឱ្យដឹងថា៖ «ដើម្បីដោះស្រាយបញ្ហានេះ ខាងសមាគមកំពុងពិភាក្សារឿងនេះ ចង់បង្កើតជាមហាវិទ្យាល័យសម្រាប់បណ្ដុះបណ្ដាលភ្នាក់ងារលក់អចលនទ្រព្យដោយផ្ទាល់តែម្ដង។ រឿងនេះ យើងនឹងព្យាយាមពន្លឿនធ្វើយ៉ាងណាឱ្យក្លាយជាការពិតឱ្យបាន»។ «ចំណេះដឹងរបស់ភ្នាក់ងារគឺសំខាន់ណាស់។ បើគាត់មានចំណេះដឹងខ្ពស់ ពួកគាត់មិនត្រឹមតែជាអ្នកលក់ទេ តែនៅក្លាយជាទីប្រឹក្សាផ្ដល់យោបល់ផ្នែកវិនិយោគដល់អតិថិជនទៀតផង។ ពួកគាត់នឹងជួយបើកទស្សនវិស័យរបស់អតិថិជន ឱ្យសម្លឹងឃើញឱកាសច្រើនផ្លូវ ឱកាសវែងឆ្ងាយ ហើយជាចុងក្រោយយើងចំណេញទាំងអស់គ្នា» លោកបន្ត។ លើសពីនេះ លោក លឹម សុជាតិ ប្រធានក្រុមប្រឹក្សាភិបាលនៃសមាគម CVEA និងជាអគ្គនាយកក្រុមហ៊ុន Realtor 168 C., Ltd គាំទ្រលើការបើកជាមហាវិទ្យាល័យ ហើយក៏បានបន្ថែមគំនិតមួយទៀត គឺច្របាច់បញ្ចូលភ្នាក់ងារទាំងអស់ទៅក្នុងប្រព័ន្ធគ្រប់គ្រងតែមួយ។ «បច្ចុប្បន្ន ក្រុមហ៊ុនភ្នាក់ងារអចលនទ្រព្យទាំងអស់គិតថា […]
អានបន្ថែម
អ្នកជំនាញបង្ហើបពីរបៀបរកស៊ីក្នុងទីផ្សារអចលនទ្រព្យជោគជ័យរយៈពេលយូរ
អ្នកជំនាញក្នុងវិស័យអចលនទ្រព្យជើងចាស់ ៣ រូប បានឱ្យដឹងថា ដើម្បីធ្វើឱ្យទីផ្សារអចលនទ្រព្យជោគជ័យបានរយៈពេលវែង គ្រប់ក្រុមហ៊ុនទាំងអស់ត្រូវផ្ដោតលើចំណុច ២ ធំៗ គឺអប់រំបណ្ដុះបណ្ដាលភ្នាក់ងារលក់របស់ខ្លួន និងអប់រំអតិថិជន។ លោក លឹម សុជាតិ ប្រធានក្រុមប្រឹក្សាភិបាលនៃសមាគម CVEA និងជាអគ្គនាយកក្រុមហ៊ុន Realtor 168 C., Ltd បានឱ្យដឹងថា ការរកស៊ីក្នុងវិស័យអចលនទ្រព្យអាចជោគជ័យបាន លុះត្រាតែរាល់ការទិញលក់ មាន ៣ សប្បាយ ពោលគឺ អ្នកទិញសប្បាយ អ្នកលក់សប្បាយ ហើយភ្នាក់ងារលក់ក៏សប្បាយ។ លោក លឹម សុជាតិ បានមានប្រសាសន៍ថា៖ «ដូច្នេះ យើងត្រូវបណ្ដុះបណ្ដាលទាំង ២ភាគី អប់រំតែភាគីណាមួយមិនបានទេ។ បញ្ហាដែលសង្កេតឃើញនាពេលបច្ចុប្បន្នគឺ អ្នកវិនិយោគខ្លាចអ្នកគួកជេ ឬភ្នាក់ងារលក់។ គេមានអារម្មណ៍ថា យើងទៅកោរគេ មិនមែនទៅជួយឱ្យគេចំណេញទេ»។ «ភ្នាក់ងារលក់ជាច្រើននៅកម្ពុជា អាចនិយាយបានថាខ្វះចំណេះដឹង ចង់តែពីលក់។ អ្នកវិនិយោគសួរពីឱកាស សួរពីសក្ដានុពល សួរពីរឿងផ្លូវច្បាប់ រឿងហិរញ្ញវត្ថុ រឿងអ្វីក៏មិនដឹងទាំងអស់។ ដូច្នេះចំណុចនេះ គ្រប់ក្រុមហ៊ុនទាំងអស់ត្រូវពង្រឹងស្ដង់ដាលើចំណុចទាំងអស់នេះ បើចង់ជោគជ័យ» […]
អានបន្ថែម
មានដីព្រំជាប់គ្នា គួរយល់ដឹងអំពីអ្វីខ្លះ ដើម្បីជៀសវាសវិវាទ?
តើអ្នកដឹងទេ បើតាមក្រមរដ្ឋប្បវេណី ម្ចាស់ដីបិទជិត ឬដីដែលហ៊ុមព័ទ្ធដោយដីអ្នកដទៃ អាចទាមទារឱ្យបើកច្រកចេញចូលឆ្លងកាត់ដីជិតខាងបាន ហើយបើម្ចាស់ដីជិតខាងមិនព្រម អ្នកក៏អាចប្តឹងឡើងតុលាការបានដែរ។ នេះគ្រាន់តែសិទ្ធិមួយ ក្នុងចំណោមសិទ្ធិផ្សេងៗ សម្រាប់អ្នកមានដីដែលមានព្រំជាប់គ្នា។ មកស្វែងយកទាំងអស់គ្នាថាមានសិទ្ធិអ្វីផ្សេងទៀត? ដើម្បីបញ្ជៀសបញ្ហាម្ចាស់ដីដែលមានព្រំប្រទល់ជាប់គ្នាគួរយល់ដឹងពីចំណេះដឹង និងប្រការគួរអនុវត្តមួយចំនួនដូចជា៖ ១. ការធ្វើរបងលើដីជាប់ព្រំគ្នា (ភាសាច្បាប់ ហៅថារបងអឌ្ឍសិទ្ធិ) មុនពេលធ្វើរបង ម្ចាស់ដីមានព្រំជាប់គ្នា ត្រូវសហការលើបន្ទុកចំណាយស្មើគ្នាលើការសាងសង់ ជួសជុល និងថែទាំ។ ភាគីម្ខាងនៃព្រំដី អាចបដិសេដមិនសហការចំណាយ ប៉ុន្តែភាគីម្ខាងទៀតនឹងមានសិទ្ធិទាំងស្រុងលើរបងអឌ្ឍសិទ្ធិនោះ។ (មាត្រ២២៤ នៃក្រមរដ្ឋប្បវេណី) ការធ្វើរបងនេះទៀតសោត ម្ចាស់ដីម្ខាងអាចធ្វើលយចូលដីម្ខាងទៀតក៏បាន តែត្រូវចេញសំណងក្នុងករណីមានការប៉ះពាល់ផ្សេងៗ។ ដូច្នេះ ដើម្បីជៀសវាងវិវាទ នៅពេលធ្វើរបង ភាគីទាំងសងខាងអាចស្នើសុំឱ្យអាជ្ញាធរភូមិ ឃុំ សង្កាត់ និងមន្ត្រីសុរិយោដីជួយវាស់វែងជាមុនសិន។ ២. ជញ្ជាំងជាប់គ្នា (ឬជញ្ជាំងអឌ្ឍសិទ្ធិ) មិនខុសពីរបងអឌ្ឍសិទ្ធិទេ នៅពេលសាងសង់ជញ្ជាំង ម្ចាស់ទាំងសងខាង គួរសហការចេញថ្លៃសាងសង់ស្មើៗគ្នា ហើយមានសិទ្ធិប្រើប្រាស់ និងអាស្រ័យផលបានដូចគ្នា។ ប៉ុន្តែ ក្នុងករណី ភាគីម្ខាងបានសង់ជញ្ជាំងរួចរាល់តែម្នាក់ឯង បើភាគីម្ខាងទៀតចង់សាងសង់ផ្ទះ ឬអគារភ្ជាប់ទៅនឹងជញ្ជាំងនោះ ត្រូវស្នើសុំទៅភាគីម្ចាស់ជញ្ជាំង។ លើសពីនេះ ភាគីស្នើសុំក៏ត្រូវបង់ប្រាក់ពាក់កណ្តាលនៃថ្លៃជញ្ជាំង បូកជាមួយនឹងពាក់កណ្តាលនៃថ្លៃដី […]
អានបន្ថែម
ខេត្តកែបគ្រោងបង្កើតរមណីយដ្ឋានឆ្នេរខ្សាច់កម្រិតខ្ពស់ថ្មី ២ កន្លែង
គណៈកម្មាធិការជាតិអភិវឌ្ឍតំបន់ឆ្នេរសមុទ្រកម្ពុជា កំពុងសិក្សាទីតាំងគ្រោងអភិវឌ្ឍរមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់ថ្មី ២កន្លែងបន្ថែមទៀត នៅក្នុងខេត្តកែប។ នេះបើយោងតាមកិច្ចប្រជុំរបស់រដ្ឋបាលខេត្តកែប កាលថ្ងៃទី៨ ខែមិថុនា ។ បច្ចុប្បន្នគណៈកម្មារអភិវឌ្ឍតំបន់ឆ្នេរ កំពុងពិចារណាទីតាំង ២ កន្លែង រួមមាន៖ ១.ទីតាំងឆ្នេរខ្សាច់កំសាន្ត ស្ថិតនៅភូមិថ្មី សង្កាត់ព្រៃធំ ក្រុងកែប និងទី២ ឆ្នេរខ្យាច់ធម្មជាតិអង្កោល ស្ថិតនៅភូមិអង្កោល ឃុំអង្កោល ស្រុកដំណាក់ចង្អើរខេត្តកែប។ បើតាមផែនការ តំបន់ទាំង ២ នឹងត្រូវកែប្រែទៅជាតំបន់ទេសចរណ៍ដ៏ទាក់ទាញ មានសួនច្បារ ដងផ្លូវធំៗ និងមានគន្លងផ្លូវសម្រាប់ជិះកង់ និងថ្មើជើងផងដែរ។ រដ្ឋបាលខេត្តកែប បានស្នើឱ្យក្រុមការងារពាក់ព័ន្ធ ពន្លឿនសិក្សា និងសហការគ្នាជាមួយក្រុមការងារអន្តរក្រសួងគ្រប់លំដាប់ថ្នាក់ ដើម្បីឱ្យគម្រោងមួយនេះឆាប់ទទួលបានជោគជ័យ. ឯកឧត្តម សោម ពិសិដ្ឋ អភិបាលខេត្តកែប បានលើកឡើងថា ទោះកំពុងជួបវិបិត្តកូវីដក្តី តែសកម្មភាពអភិវឌ្ឍន៍ខេត្តកែបនៅតែបន្ដ។ «គោលដៅអភិវឌ្ឍន៍រមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់នេះ គឺដើម្បីប្ដូរមុខមាត់ខេត្តកែប ជាគោលដៅទេសចរណ៍សម្រាកលំហែដ៏ប្រណីតសម្រាប់ទេសចរក្នុងស្រុក និងក្រៅស្រុក ។
អានបន្ថែម
ពន្ធដារជំរុញឱ្យអ្នកជាប់ពន្ធលើអចលទ្រព្យទាំងអស់ទៅបង់ពន្ធឱ្យបានមុនថ្ងៃផុតកំណត់
អគ្គនាយកដ្ឋានពន្ធដារ បានក្រើនរំលឹកដល់ម្ចាស់អចលនទ្រព្យទាំងអស់ឱ្យរួសរាន់ទៅប្រកាសបង់ពន្ធលើអចលនវត្ថុ ឬពន្ធលើដីធ្លីមិនបានប្រើប្រាស់របស់ខ្លួន សម្រាប់ឆ្នាំ២០២១ ឱ្យបានមុនថ្ងៃទី៣០ ខែកញ្ញា ឆ្នាំ២០២១ ដើម្បីជៀសវាងការត្រូវផាកពិន័យ។ នេះបើយោងតាមសេចក្តីជូនដំណឹងចុះថ្ងៃទី០៨ ខែ មិថុនា កន្លងមកនេះ។ អគ្គនាយកដ្ឋានពន្ធដារ បានឱ្យដឹងថាមកទល់បច្ចុប្បន្ន នៅមានម្ចាស់អចលនទ្រព្យមួយចំនួនធំនៅមិនទាន់ប្រកាសបង់ពន្ធ ដូច្នេះដើម្បីចៀសវាងបាននូវការកកស្ទះ និងការប្រជ្រៀតគ្នាមកប្រកាសបង់ពន្ធនៅថ្ងៃជិតផុតកំណត់ សូមម្ចាស់អចលនទ្រព្យចាប់ផ្ដើមប្រកាសពន្ធជាបណ្ដើរៗ។ លើសពីនេះ អគ្គនាយកដ្ឋានពន្ធដារក៏បានព្រមានផងដែរថា ចំពោះម្ចាស់អចលនទ្រព្យ ដែលខកខានមិនបានបង់ពន្ធទាន់ពេលវេលា នឹងត្រូវរងនូវទោសទណ្ឌតាមច្បាប់ជាធរមាន។
អានបន្ថែម
NagaCorp បន្តកាត់ប្រាក់ខែ និងបញ្ឈប់បុគ្គលិក ទោះមិនទាន់មានវិបត្តិហិរញ្ញវត្ថុធ្ងន់ធ្ងរក្ដី
ប្រតិបត្តិករកាស៊ីណូខ្នាតយក្សណាហ្គាវើល NagaCorp បានបញ្ជាក់ថា យុទ្ធនាការបញ្ឈប់ការងារបុគ្គលិក និងការកាត់បន្ថយប្រាក់ខែ បាននឹងកំពុងបន្តធ្វើឡើង ដោយអះអាងថានេះគឺជាវិធានការបង្កាទុកជាមុន ទោះក្រុមហ៊ុននៅមិនទាន់មានវិបត្តិហិរញ្ញវត្ថុធ្ងន់ធ្ងរក្ដី។ នេះបើយោងតាមសេចក្ដីប្រកាសរបស់ NagaCrop ចេញផ្សាយកាលពីម្សិលមិញនេះ។ សេចក្ដីប្រកាសបន្តថា ការកាត់ប្រាក់ខែ និងបញ្ឍប់បុគ្គលិកនេះ ជាការឆ្លើយតបនឹងវិបត្តិកូវីដ ខណៈកាស៊ីណូក៏ត្រូវបានបិទតាំងពីដើមខែមីនា មកម្ល៉េះ។ «យ៉ាងណាក្ដី ដើម្បីកាត់បន្ថយផលប៉ះពាល់សម្រាប់បុគ្គលិក ក្រុមហ៊ុននឹងផ្តល់ប្រាក់ឈ្នួល និងសំណងផ្លូវចិត្តបន្ថែមដល់ពួកគេ នៅក្នុងអត្រាលើសពីអ្វីដែលច្បាប់បានកំណត់» ។ ក្រុមហ៊ុនជឿថាការធ្វើបែបនេះគឺចាំបាច់បំផុត ព្រោះក្រុមហ៊ុនត្រូវតែបត់បែនតាមស្ថានការណ៍ ដើម្បីរក្សាលំនឹងហិរញ្ញវត្ថុ និងការអភិវឌ្ឍរយៈពេលវែង។ យ៉ាងណាក្ដី NagaCorp មិនបានបង្ហាញពីចំនួនបុគ្គលិកដែលត្រូវបានបញ្ឈប់នោះទេ ប៉ុន្តែបញ្ជាក់ថាគិតត្រឹមថ្ងៃចេញសេចក្ដីប្រកាស បុគ្គលិកភាគច្រើនបានចុះកិច្ចព្រមព្រៀងឈប់ការងារហើយ ខណៈនៅមានករណីខ្លះទៀតកំពុងស្ថិតក្នុងការចរចា។ គួរបញ្ជាក់ផងដែរថា ទោះកាស៊ីណូបិទទ្វារមួយរយៈពិតមែន ប៉ុន្តែក៏នៅមានប្រាក់ចំណេញ។ បើយោងតាមរបាយការណ៍របស់ក្រុមហ៊ុន ប្រាក់ចំណេញសុទ្ធសម្រាប់ឆ្នាំ ២០២០ របស់ NagaCrop មានប្រមាណ ១០២,៣ លានដុល្លារ ដែលធ្លាក់ចុះជាង ៨០% បើប្រៀបធៀបទៅនឹងប្រាក់ចំណេញសុទ្ធក្នុងឆ្នាំ ២០១៩។ (អានបន្ថែម)
អានបន្ថែម
វិភាគ៖ តើអនាគតដីឡូតិ៍នឹងក្លាយជាសំណង់អនាធិបតេយ្យឬយ៉ាងណា? ដោះស្រាយដូចម្ដេច?
អ្នកទិញដីឡូតិ៍ម្នាក់ដែលសុំហៅត្រឹមឈ្មោះ ដា អាយុ ៣២ ឆ្នាំ ជាកម្មកររោងចក្រ បានប្រាប់ទស្សនាវដ្ដីសំណង់ និងអចលនទ្រព្យថា កញ្ញាសម្រេចចិត្តទិញដីឡូតិ៍នៅម្ដុំផ្លូវជាតិលេខ ៥ ជិតឧត្ដុង ព្រោះតម្លៃទាប អាចបង់រំលោះបាន ហើយសង្ឃឹមថាថ្ងៃក្រោយទៅអាចចំណេញខ្លះ ឬទៅសង់ផ្ទះនៅទីនោះ។ កញ្ញាថា៖ «បារម្ភដែរថា ទៅអនាគតទៅ ដីឡូតិ៍នឹងក្លាយជាតំបន់អនាធិបតេយ្យ ព្រោះអ្នកណាចង់សង់អីក៏បាន ហើយគ្មានអ្នកមកគ្រប់គ្រងដូចបូរីធំៗទេ។ ប៉ុន្តែធ្វើម៉េចយើងមានលុយតិច គឺទិញតាមហ្នឹងទៅ»។ «ប៉ុន្តែអ្វីដែលត្រូវគិតពេលនេះ គឺឥឡូវមិនសូវមានចំណូល យ៉ាប់ដែរ ខុំខ្វះបង់គេ ១-២ ខែ គេចេះតែបន្ធូរបន្ថយឱ្យ តែបើយូរជាងហ្នឹងគេមិនជួយទៀតទេ មិនដឹងថាគេរឹបអូសដីវិញ ឬក៏យ៉ាងម៉េញ»។ អាជីវកម្មដីឡូតិ៍អាចនឹងក្លាយជា តំបន់អនាធិបតេយ្យទៅអនាគត បើខ្វះច្បាប់គ្រប់គ្រង ជាក់ស្ដែង អាជីវកម្មដីពុះដីឡូតិ៍លក់ បានមានសន្ទុះយ៉ាងខ្លាំងនៅកម្ពុជាក្នុងប៉ុន្មានឆ្នាំចុងក្រោយនេះ ដោយសារតម្លៃដីគឺទាបដែលសាកសម្យនឹងប្រជាជនភាគច្រើនដែលមានចំណូលមធ្យម និងក្រោមមធ្យម។ ប៉ុន្តែ សន្ទុះនេះក៏នាំមកនូវបញ្ហាផងដែរ។ អ្នកជំនាញមួយចំនួនបារម្ភថា ដោយសារបញ្ហាទំហំដីឡូតិ៍ដែលពុះលក់គឺតូច (ភាគច្រើន ៥x២០) បញ្ហាខ្វះហេដ្ឋារចនាសម្ព័ន្ធផ្លូវ ទឹក ភ្លើង និងពិសេសបញ្ហាកង្វះខាតការគ្រប់គ្រង ទៅអនាគត ដីឡូតិ៍នានាអាចនឹងក្លាយជាសំណង់អនាធិបតេយ្យខ្វះរបៀបរៀបរយ។ លើសពីនេះ តម្លៃដីឡូតិ៍ភាគច្រើនគឺទាបក៏ពិតមែន […]
អានបន្ថែម