SC Capital បង្កើតមូលនិធិអចលនទ្រព្យ ១ប៊ីលានដុល្លារ

• 3 ខែ​តុលា 2017
• ព័ត៌មានសំណង់
• 15 មើល

SC Capital Partners បានបង្កើតមូលនិធិអចលនទ្រព្យចំនួន ១ប៊ីលានដុល្លារអាមេរិក ដើម្បីពង្រីកបន្ថែមនូវផលប័ត្រកម្មសិទ្ធិរបស់ខ្លួននៅតំបន់អាស៊ីប៉ាស៊ីហ្វិក និងអាស៊ីអាគ្នេយ៍។

ក្រុមហ៊ុនភាគហ៊ុនឯកជនដែលមានមូលដ្ឋាននៅប្រទេសសិង្ហបុរី បានបង្កើត Real Estate Capital Asia Partners V (RECAP V) ជាក្រុមហ៊ុនទី៥ ដើម្បីជាឧបករណ៍គ្រប់គ្រងការវិនិយោគរបស់ខ្លួន។ ក្រុមហ៊ុន RECAP ទី៤ បានវិនិយោគដោយជោគជ័យនូវទឹកប្រាក់ ៨៥០លានដុលា្លរ លើអចលនទ្រព្យក្នុងតំបន់បន្ទាប់ពីបិទនៅក្នុងឆ្នាំ ២០១៤ ហើយ RECAPS ពីមុន ត្រូវបានចាត់ទុកជាមូលនិធិភាគហ៊ុនផ្អែកលើអចលនទ្រព្យដែលបំពេញតួនាទីបានល្អបំផុត។

អចលនទ្រព្យនៅតំបន់អាស៊ីប៉ាស៊ីហ្វិក និងអាស៊ីអាគ្នេយ៍ គឺជាវិស័យដែលមានដំណើរការខ្ពស់និងមានភាពទាក់ទាញខ្លាំងសម្រាប់ឧបករណ៍វិនិយោគមូលនិធិភាគហ៊ុន។ យោងតាម Deal Street Asia, Morgan Stanley, Savills Investment Management និង Blackstone សុទ្ធតែកំពុងធ្វើការលើមូលនិធិភាគហ៊ុនផ្អែកលើអចលនទ្រព្យខ្នាតធំនៅអាស៊ី។